ફરક!

* થોડા સમય પહેલા મને કોઇએ ઇન્ડિયાપ્લાઝાનું ગિફ્ટ વાઉચર મોકલ્યું (ખબર નહીં, પણ કોઇ દયાળુ આત્માએ કે પછી ઇન્ડિયાપ્લાઝા વાળાઓએ..). મેં પપ્પા માટે ફાધર્સ ડે માટે પેન ડ્ાઇવ અને એક ટેબલ ક્લોકનો ઓર્ડર આપ્યો. ટેબલ ક્લોક તો અઠવાડિયામાં આવી ગઇ પણ પેન ડ્રાઇવ ન આવી. ફાધર્સ ડે આવીને ગયો પણ કોઇ સમાચાર નહીં! પછી તપાસ કરીતો ખબર પડી કે પેન ડ્રાઇવ આઉટ-ઓફ-સ્ટોક છે. મેં કહ્યું કંઇ વાંધો નહીં, બીજી કોઇ મોકલો. તેમનો ફોન આવ્યો કે અમે તમને બીજી પેન ડ્રાઇવ મોકલીએ છીએ. મે કહ્યું કંઇ વાંધો નહીં, મોકલો ભાઇ. થોડા દિવસ સુધી કોઇ સમાચાર નહીં. પાછી ફરિયાદ કરી તો ખબર પડી કે બીજી પેન ડ્રાઇવ પણ આઉટ-ઓફ-સ્ટોક છે! મેં કહ્યું કે ચાલો, ઓર્ડર કેન્સલ કરો યાર! એના કરતાં તો બજારમાંથી પેન ડ્રાઇવ લઇને કુરિયર કરી હોત તો સારું હોત!

જ્યારે આ બાજુ મોઝિલા ફાયરફોક્સ ૩.૫ની પાર્ટી માટે મારું બોક્સ પાંચ દિવસમાં પહોંચી જશે. સાથે મને કુરિયર ક્યાં પહોંચ્યું તેની સંપૂર્ણ વિગત દર્શાવતો ટ્રેકિંગ નંબર પણ આપવામાં આવ્યો છે. થેન્ક્સ યુપીએસ!

૩૭૭ કે ૩૭૦

* કુનાલે લખ્યું તેમ હાઇકોર્ટે ૩૭૭મી કલમની વિરુધ્ધમાં ચુકાદો આપ્યો – પણ કોઇને યાદ આવે છે ૩૭૦મી કલમ? કાશ્મીરની ૯૦ ટકા મુશ્કેલીઓનું નિવારણ આ કલમ નાબૂદ કરવાથી આવી શકે છે તેમ મારું માનવુ છે. હા, જોકે હવે, બહુ જ મોડુ થઇ ગયુ છે. જમ્મુ-કાશ્મીરમાં તમે અંગત મિલ્કત ન ધરાવી શકો પણ, જમ્મુ-કાશ્મીર બેન્ક ગુજરાતનાં અમદાવાદમાં સી.જી.રોડ પર પોતાની મિલ્કત ધરાવી શકે! ધન્ય છે ભારતનાં બંધારણને!!

બ્લોગ પોસ્ટિંગ મહિનો

* આ મહિનો – એટલે કે જુલાઇ મહિનો `નેશનલ બ્લોગ પોસ્ટિંગ મંથ` છે. વધુ માહિતી માટે જુઓ વર્ડપ્રેસનું આ એનાઉન્સમેન્ટ. અને પ્રોજેક્ટનું વેબ પાનું. તો એમાં આપણે શું કરવાનું? કંઇ નહીં. માત્ર દરરોજ એક પોસ્ટ કરવાની – આખા મહિના દરમિયાન..

તો તમે ભાગ લો છો કે નહીં?

કવિનની સાયકલ

* આખરે, કવિનને સાયકલ મળી અને મારી સાયકલ વિશેની તપાસ શરૂ થઇ (કારણ: પેટ્રોલના ભાવ ચાર રૂપિયા વધી ગયા છે..)

ફાયરફોક્સ ૩.૫!

* હા, તમે હવે એટલે કે આજથી ફાયરફોક્સ ૩.૫ મેળવી શકશો! તો, શું ખાસ વાત છે આ ફાયરફોક્સ ૩.૫માં?

૧. તમે હવે બંધ કરેલ ટેબ કે વિન્ડોને Undo કરી શકો છો.

૨. પ્રાઇવેટ બ્રાઉઝિંગ – એટલે કે તમે મુલાકાત લીધેલ વેબસાઇટ્સની હિસ્ટરી, કૅશ, કુકીસ વગેરેની નોંધ નહીં લેવાય.

૩. ૭૦ કરતા વધુ ભાષાઓમાં પ્રાપ્ત (ગુજરાતી તો ખરું જ! હવે મેક માટે પણ ગુજરાતી આવૃત્તિ મળી શકશે).

૪. HTML5, વધુ સારી ઝડપ ધરાવતું જાવાસ્ક્રિપ્ટ એન્જિન અને ઘણા બધા આંતરિક સુધારાઓ!

અત્યારે જ ડાઉનલોડ કરો!

જુઓ: સ્પ્રેડફાયરફોક્સ.કોમ, ફાયરફોક્સ ફેસબુક પાનું અને પ્રકાશન નોંધો.

ખાસ નોંધ: જો તમે IE (ઇન્ટરનેટ એક્સપ્લોરર) વાપરતાં હોવ તો, તમે ફાયરફોક્સ વાપરવા માટે આ પાનાંની મુલાકાત લો.

હોલિવુડ બસ્તી!

* મને એમ કે આ મજાકનું નામ હશે – પણ આ તો ઓફિશિઅલ નામ લાગે છે..

મોટો નકશો જુઓ

કહેવતો!

* ના, હું આજે કોઇ મારી પોતાની કહેવતો મૂકતો નથી!

પણ, ગુજરાતીલેક્સિકોનમાં હવે તમે નવી ગુજરાતી-અંગ્રેજી કહેવતો અને નવો વિભાગ અંગ્રેજી-ગુજરાતી કહેવતો માણી શકશો. તેને ટેસ્ટ કરો અને જો કંઇ મુશ્કેલી કે ભૂલ જણાય તો અમને ઇન્ફો એટ ગુજરાતીલેક્સિકોન.કોમ પર અચૂક ઇમેલ કરો..

મેક: ૧ વર્ષ

* આજે મારા ધોળિયા મેકનું એક વર્ષ પૂરું થયું. જો કે હવે, એ ધીમે-ધીમે ઘઉં વર્ણું બની રહ્યું છે. અને હા, એપલ કંપનીએ હમણાં સરસ મજાનું ૧૩” નું એલ્યુમીનીયમ બૉડી ધરાવતું મેકબુક-પ્રો બહાર પાડ્યું છે. ભાવ દેખવા જેવા નથી!!

તમે શું કરશો?

* ગઇકાલે લોકશક્તિ એક્સપ્રેસની રાહ જોતો બોરીવલીનાં પ્લેટફોર્મ નં ૪ પર ઊભો હતો ત્યારે એક ભાઇ મારી પાસે આવ્યા અને કહ્યું કે, મારે સુરત જવું છે. મેં કહ્યું, તો જાવ ને.. એ ભાઇ મારા મજાકનાં સૂરને પારખીને પછી દયામણા સ્વરે બોલ્યા કે મારે સુરત જવું છે અને મારી ટીકીટ મારા મિત્ર પાસે રહી ગઇ છે, હું ગાડી ચૂકી ગયો છું અને મારી પાસે માત્ર ૨૦ રૂપિયા જ છે. તમે મને બાકીના ૧૮ રૂપિયા આપશો? થોડી વાર વિચાર કર્યો અને મેં તેને ૨૦ રૂપિયા આપ્યા.

૧. તે કદાચ ખોટું પણ બોલતો હોય.

૨. તે સાચું બોલતો હોય.

ગમે તે હોય, પણ મેં એ વિચારીને આપ્યા કે આવું જો મારી જોડે થાય અને કોઇ મને રૂપિયા ન આપે તો? મારી જગ્યાએ તમે હોવ તો શું કરશો? અાજ-કાલ માણસો પાંચ વર્ષથી ઓળખતાં હોય તો પણ વિશ્વાસ નથી કરતાં તો પાંચ સેકંડની વાત પરથી તમે કોઇને કંઇ આપશો?

થેંક યુ, પપ્પા..

* તમને ખબર છે કે આજે ફાધર્સ ડે છે, મને પણ ખબર છે. પણ, હું તમને સાંજે ફોન કરીશ, કદાચ ભૂલી પણ જઇશ. અને તમે એ જ ભોળપણમાં સામે જવાબમાં થેંક યુ ની જગ્યા એ સામે, હેપ્પી ફાધર્સ ડે કહેશો. અને અમે હસીશું, પણ હવે એ બરાબર છે, હું પણ પિતા ઉર્ફે છું ને!

યાદ છે જ્યારે હું પહેલી વાર મુંબઇ આવ્યો ત્યારે તમે મને કેટ-કેટલી જગ્યાએ ફેરવેલો? ગ્રાંટ રોડ પરથી લઇને ચોર-ગલી જેવી જગ્યાઓ જેથી બીજી વાર ભૂલથી પણ હું ના જાઉં! અને પહેલી વાર લોકલમાં બેઠો ત્યારે ટ્રેનમાં કેવી રીતે ચડવું તેની ટીપ્સ અને ટ્રીક્સ! જે મેં ઘણાં લોકોને વહેંચેલી છે. ભૂલ્યા વગર તમે મારા માટે જમવાનું બનાવીને રાખતા. હું ટીફીન ન ખાઉં તો ધમકાવી નાખતા અને યાદ રાખીને દરરોજ કંઇક ફ્રુટ લાવતા..

હજી પણ તમે એવા જ છો – એ જ લોકલ ટ્રેનમાં એવી જ રીતે ફરો છો – અને મારી જગ્યાએ કવિન માટે કંઇકને કંઇક લાવો છો. થેંક યુ પપ્પા! થેંક્સ!