કંઈ ન લખવા બદલ..
* આજ-કાલ બ્લોગ પર કંઈ લખી શકાતું નથી. કારણ?
૧. દાંત મેં સડન. કારણ? RCT એટલે કે રુટ કેનાલ ટ્રિટમેન્ટ. તેમ છતાં, બે દિવસથી ભયંકર દુખાવો થઈ રહ્યો છે. પેઈનકિલર અત્યારે મારો પરમ મિત્ર બની સાથ આપે છે..
૨. કવિનની સ્કૂલ. એક બેગ અને એક વોટર-બોટલની વાટ લાગ્યા પછી અમને સમજાયું કે મા-બાપ બિચારા કેમ કહેવાય છે..
૩. ટ્વીટર-આઈડેન્ટિકા-ફેસબુકનું ડેડલી કોમ્બિનેશન. છતાં, બ્લોગ એટલે બ્લોગ.
બીજાં સમાચારો,
૧. આ શનિવારે બરોડામાં ઓપનસુઝે-ઉબુન્ટુની રીલીઝ પાર્ટી છે. જેને આ વિશે ખબર છે એટલે આ બન્ને શું બલા છે – તેઓ માટે આ પાનાં પર નોંધણી કરવા માટે અંતરપૂર્વક આવકાર. હું ત્યાં એકાદ-બે પ્રેઝન્ટેશન આપવાનો છું.
૨. ફોસ.ઈન/૨૦૦૯માં મારી (એટલે કે વર્કઆઉટ-અને-બોફ (BOF)) પસંદગી થઈ ગયેલ છે. ટીકીટના મોટા પ્રશ્નનું પણ નિરાકરણ આવી ગયું છે – એટલે મજા આવશે.
કવિન અને શાળાનો પ્રથમ દિવસ
* કવિનનો આજે શાળામાં પ્રથમ દિવસ હતો. લિટલ જીનિયસ નામની એક બંગલામાં ચાલતી શાળા (એટલે કે સ્કૂલમાં) તેને મૂકવામાં આવ્યો છે. સ્કૂલ ઠીક-ઠીક છે, કંઈ વધારે પડતી હાઈપ વાળી નથી. ઘરથી નજીક છે અને મને પોસાય તેવી ફી છે. કવિનને લઈ જઈને પહેલાં ફોર્મ-ફી વગેરે ભર્યા. સ્કૂલના સંચાલક જોડે થોડી વાત-ચીત કરી, તે દરમિયાન કવિન રમવામાં મશગૂલ થઈ ગયો. હું થોડી વાર પછી ઘરે આવ્યો અને એકાદ કલાક પછી કવિનને ખેંચીને ઘરે લાવવો પડ્યો. એને એમ કે સ્કૂલ એટલે બહાર પડેલા હિંચકામાં રમ્યા કરવાનું! આશા રાખીએ છીએ કે કવિન તેના ટીચર્સને ભારે ના પડે અને સરખી રીતે ભણવાનું-રમવાનું-શીખવાનું ચાલુ કરે 
અને, હા. કવિનની સ્કૂલ અંગ્રેજી મિડિયમમાં છે. જોઈએ છીએ, કેટલી પોઅમ અમારે શીખવી પડે છે..
ખાલી ઘર
* બે દિવસથી દાંતના દુખાવા (અને પછી RCT) અને પેટનાં પરાક્રમને કારણે ઓફિસમાં નથી ગયો, પણ આ બાજુ કવિન-કોકી પણ ઘરમાં નથી – એટલે કે પાલનપુર ગયા છે. ખાલી ઘર કોને કહેવાય તે અત્યારે ફરી સમજાય છે. અરે, રવિવારે કવિન મારી મમ્મી જોડે બહાર ગયેલો ત્યારે પણ હું-કોકી કંટાળી ગયેલા, છેવટે શોપિંગ કરવા માટે નીકળી પડ્યા! અને, અત્યારે કવિન જોડે (આ લખતાં-લખતાં) વાત થઈ તો તેણ કહ્યુ, “પપ્પા, અમે આવીએ જ છીએ!”
લાસ્ટ.fm
* લાસ્ટ.એફએમ એ સરસ મજાની સાઈટ છે. તેમાં તમે તમારા સંગીત વગાડનાર ઉર્ફે મ્યુઝિક પ્લેયરમાં વાગતા ગીત-સંગીતને લોકો સુધી વહેંચી શકો છો – વહેંચી શકવાનો અર્થ તમે કયા પ્રકારનું સંગીત સાંભળો છો તે બીજાને ખબર પડી શકે છે. આ પરથી લાસ્ટ.એફએમ તમને કદાચ ગમી શકે તેવા ગીત-સંગીતનું સૂચન કરે છે. તમે તેને ફેસબુક વગેરેમાં પણ ઉમેરી શકો છો. ટૂંકમાં, સોશિયલ નેટવર્કિંગનું વધુ એક માધ્યમ. જો કે લાસ્ટ.એફએમ એ ક્લોઝ્ડ સોર્સ સાઈટ છે – તમારો ડેટા તેમનો થઈ શકે છે. આવો ડર ના રાખવો હોય તેમનાં માટે લીબરે.એફએમ પણ છે.
અને હા, સૌથી વધુ મને તેમનો બ્લોગ ગમ્યો. જો તમે ટેકનોલોજીનાં શોખીન જીવ હોવ તો તમને પણ ગમશે.
એક વાક્ય જે ૧૪૦ અક્ષરોમાં ન સમાયું..
Most people are idiots, and being a manager means you’ll have to deal with it, and perhaps more importantly, that _they_ have to deal with _you_
ઉપરનું વાક્ય ૧૪૦ અક્ષરોમાં સમાતું નહોતું, એટલે ટ્વીટર કે આઈડેન્ટી.કાની જગ્યાએ અલગ પોસ્ટ તરીકે મૂક્યું છે. છે ને એકદમ બરોબર?
(સોર્સ: http://lwn.net/Articles/358701/ અને http://www.mjmwired.net/kernel/Documentation/ManagementStyle )
ઇનગ્લોરિયસ બાસ્ટર્ડ્સ: એક વધુ રીવ્યુ
* મને ખબર છે કે દિવ્ય ભાસ્કર કંઈ આ ફિલમનો રીવ્યુ લખવાનું નથી. પણ, જોયું કે, હરસુખભાઈએ અને ટર્મિનેટરે પહેલા જ લખી નાખ્યો છે – છતાં પણ, લાલચ રોકી શકતો નથી! થયું એવું કે ઈશિતા અને હું ગુરૂવારે મળ્યા અને નક્કી કર્યું કે ચાલો મુવી જોવા જઈએ. કવિન અને ટોરેન્ટીનો આ બન્ને ડેડલી કોમ્બિનેશનને કારણે મેં કોકીને વધુ આગ્રહ ન કર્યો અને તેણે પણ બપોરની ઊંઘ વધુ પસંદ કરી. શનિવારે બપોરે હું ટીકીટ લેવા ગયો ત્યારે, ટીકીટ આપવા વાળે ટીકીટ આપતી વખતે ઉચ્ચારમાં જે લોચા કર્યા તે પરથી લાગ્યું કે મુવી જોવા વાળા ૨૦થી વધુ લોકો નહીં હોય 
ઈશિતા અને નિતેશ મને ત્યાં મળ્યા.
ઇનગ્લોરિયસ બાસ્ટર્ડ્સ જો તમને ઈતિહાસ – વિશ્વ યુધ્ધ ૨ અને તેને લગતી ઘટનાઓનો ખ્યાલ હોય તો જોવાની વધુ મજા આવે. અને, થેન્ક્સ ટુ, સફારી મેગેઝિન – મને આ મુવીના આજુ-બાજુ બનતી ઘટનાઓ વિશે જાણકારી હતી – તે ઈશિતા અને નિતેશને સમજાવવામાં મદદરુપ થઈ! મુવીની શરૂઆત જ્યુ હન્ટર તરીકે ઓળખાતા કર્નલ હાન્સ લન્ડાની મુલાકાત ફ્રાન્સમાં એક કુંટુંબ સાથે થાય છે. એ વખતના અભિનયથી જ હાન્સ આપણા પર ઊંડો પ્રભાવ છોડી દે છે. શોસાના ભાગી જવામાં સફળ થાય છે અને થોડા વર્ષ પછી એક થિયેટર ચલાવતી હોય છે. આ બાજુ અમેરિકન જ્યુસ લોકોનો એક સમૂહ નાઝીઓનો ખાતમો બોલાવવા મેદાને પડે છે. શોસાના અને તેનો નિગ્રો નોકર બન્ને મળીને થિયેટરમાં નાઝી ગુણગાન ગાતી એક ફિલ્મનાં પ્રિમિયર વખતે ભેગા થયેલા હિટલર, ગોબેલ્સ, બોરમાન અને બીજા ટોચનાં અફસરોને ઉડાવી દેવાનો પ્લાન બનાવે છે. બાસ્ટર્ડ્સ લોકોનો પ્લાન એવો જ હોય છે – પણ, હાન્સ વચમાં આવે છે અને તે બાસ્ટર્ડ્સ જોડે સોદો કરીને કંઈક અલગ વિચારે છે. છતાં પણ, જે થવાનું હોય છે તે થાય છે. શું થાય છે – તે માટે જો મુવી હજી પણ ચાલી રહ્યું હોય તો – જોઈ લેવું!
બૈર્નાર સાથે મુલાકાત
* બૈર્નાર (એમ તો અંગ્રેજીમાં Bernard લખાય, પણ ફ્રેંચમાં આ રીતે ઉચ્ચાર કરાય!) અને હું આઈ.આર.સી. પર મળેલા. પછી, વાત-ચીતમાં ઓળખાણ થોડી વધી અને ખબર પડી કે બૈર્નાર દંપતિ ગુજરાત આવે છે (મિસિસ બૈર્નાર નવસારી-ગુજરાતી છે). તો, અમે ક્યાંક મળવાનું નક્કી કર્યું અને છેવટે ઓફિસથી નજીક પડે એ રીતે સાંજે સી.જી.રોડ પર થોડા દિવસ પહેલાં મળ્યા. એમ.એમ. પર એક ખૂણામાં બેઠા અને વાતો શરૂ કરી. બૈનાર્ડ હિન્દી સારી રીતે જાણે છે અને હવે ગુજરાતી પણ જાણી રહ્યો છે અને અમારી મોટાભાગની વાતો ગુજરાતી ભાષા અને કોમ્પ્યુટરની આસ-પાસ રહી. ખાસ કરીને ફ્રાંસમાં ફ્રેન્ચ ભાષા અંગે કેવી પરિસ્થિતિ છે – તેનો એક દાખલો મને યાદ રહી જશે. ફ્રાંસમાં જો તમે સોફ્ટવેર બનાવો કે વેચો તો – તમારે ફરજીયાત ફ્રેંચ ઈન્ટરફેસ આપવો જ પડે, તેના સિવાય કોઈ તે વાપરે જ નહીં! બીજો દાખલો – કોમ્પ્યુટરના માઊસ ને ગુજરાતીમાં પણ માઊસ કહે છે – જ્યારે ફ્રાંસમાં માઊસ માટેનો ફ્રેંચ શબ્દ – Souris – જ વપરાય. તમે માઊસ કહો તો કોઈ સમજે નહીં. કહેવાની જરૂર છે કે ફ્રાંસમાં રહેવું હોય તો ફ્રેંચ શીખવું જ પડે!
આવી ઘણી વાતોથી મજા આવી ગઈ. પણ, હું ઓફિસમાંથી વચ્ચેથી આવ્યો હતો અને બૈનાર્રને અમદાવાદના બીજા છેડે જવાનું હતું. એટલે, રીક્ષા નક્કી કરી બૈનાર્ડને વિદાય આપી. તે પહેલાં અમે નીચેનો સરસ મજાનો ફોટો પડાવ્યો, જે બૈનારે ફ્રાંસ ગયા પછી મને મોકલ્યો – એટલે મેં આ પોસ્ટ લખી
નૂતન વર્ષાભિનંદન
* નવાં વર્ષનાં અભિનંદન અને નવા વર્ષમાં તમે સૌ કોઈ મજા-જલ્સા કરો. બીજું શું? નવા વર્ષમાં ફાસ્ટ ફૂડ ખાવા છતાં તમારું પેટ તમારો સાથ આપે, ખોટું બોલવા છતાં તમારું ભલું થાય, નિંદા કરવા છતાં તમારી પ્રશંસા થાય તેવી અંતરની શુભેચ્છાઓ. અને, આ બધી શુભેચ્છાઓ મારા પર પણ લાગુ પડે તેવો સ્વાર્થ પણ ખરો…
ગુગલ: કેટલું બધું લોકપ્રિય!
* આજે મમ્મી કવિન માટે મુંબઈથી નવો નાઈટ ડ્રેસ લાવી અને પછી અમને ખાતરી થઈ કે ગુગલ માત્ર સર્ચ એન્જિન, જીમેલ કે વેવ પૂરતું જ લોકપ્રિય નથી..
