મારા વિચારો, મારી ભાષામાં!

* આગલી પોસ્ટમા લખ્યું હતું તેમ આવનારા વર્ષમાં અમુક સંકલ્પો લેવાનાં છે. તો એકાદ દિવસ ગાળીને એક મોટી… યાદી બનાવી છે.

૧. બે નવી પ્રોગ્રામિંગ લેંગવેજ ઉર્ફે ભાષાઓ શીખવી.

૨. ગિટારનાં ક્લાસીસમાં જોડાવું અને શીખવું. આવતા વર્ષની ન્યૂ યર પાર્ટીમાં (એટલે કે ૨૦૧૦ની) કાર્યક્રમ આપવો.

૩. ફેસબુક અને ઓરકુટનું વ્યસન ઘણું ઓછું કરવું. ટ્વીટર-આઈડેન્ટિકા પણ.

૪. મૂર્ખ લોકોની સંગત ટાળવી.

૫. ના કહેતા શીખવું.

૬. ૧૦૦ પુસ્તકો વાંચવા. તે માટેનું નવું કબાટ બનાવડાવવું..

૭. કવિનને કોમ્પ્યુટર શીખવાડવાનું શરૂ કરવું.

૮. ઓછામાં ઓછા બે વ્યક્તિઓને ઓપનસોર્સમાં યોગદાન આપતા કરવા.

૯. ડેબિયન માટે ગુગલ સમર ઓફ કોડમાં પ્રતિનિધિત્વ કરવું.

૧૦. પાસપોર્ટ બનાવવો!!!!

૧૧. હાર્ડવેર અને ઈલેકટ્રોનિક્સ પર ધ્યાન આપવું અને શીખવાની શરૂઆત કરવી.

અગિયાર વસ્તુઓ બહુ મોટી ન કહેવાય પણ એમાંની એક-એક ચુન-ચુન કે લીધેલી છે!

અને છેલ્લે,

૧૨. આ પોસ્ટ દરરોજ વાંચવી.

* તો, નવા વર્ષ માટેનું તમારું રીઝોલ્યુલેશન શું છે? મારો તો કંઈ ખાસ પ્લાન નથી હા, પ્લાન જે કંઈ છે તે ૧ તારીખે બ્લોગ પોસ્ટ તરીકે મૂકવાનો પ્લાન છે!!

* તમે તો યાર ભારે કરી, તિવારીજી. ટાઈગર વુડ્સને પણ પાછળ રાખી દીધો. આ માટે તો તમને પર્સન ઓફ ધ યર નો ખિતાબ મળવો જોઈએ. ટાઈગર તો હજી જુવાનિયો છે જ્યારે તમે ૮૬ વર્ષનાં હોવા છતાં, તમારી જુવાનીનો પરિચય આપ્યો. તમે તો યાર ભારે કરી, તિવારીજી!!

* ગઈકાલે રાત્રે ૧.૫ દિવસ મુંબઈ જઈને આવ્યો. ૧.૫ દિવસ એટલા માટે કે રાતની ટ્રેનની ટીકીટ ન મળવાથી, અમે ગુજરાત એક્સપ્રેસમાં શુક્રવારે બપોરે ૪ વાગે ત્યાં પહોંચ્યા અને કર્ણાવતી એક્સપ્રેસમાં રવિવારે ૧.૩૦ વાગે તો મારે ઘરેથી નીકળી જવું પડ્યું. કવિનને ક્રિસમસ વેકેશન પડ્યું તેનો ફાયદો ઉઠાવીને મુંબઈની મજા બન્ને જણાં માણશે. ઘરે આરામ કર્યો. કાર્તિકનાં ઢોંસા ખાધા. થોડી શોપિંગ કરી. કવિનને મજા આવી ગઈ કારણ કે, તેને હવે રમાડવા વાળા ઢગલાબંધ લોકો હતા.

ટ્વીટર પર થોડુંક અપટેડ હું કરતો રહેતો હતો, પણ ત્રણ દિવસ ઈમેલની ગેરહાજરીથી મને કંઈ બહુ ફરક ન પડ્યો! લેપટોપ લઈ ગયેલો તે ખાલી એમનેએમ વજન ઉપાડવાની કસરત કરી તેમ કહેવાય તો ખોટું નહીં!! હા, ત્યાંથી મારું જુનું કોમ્પ્યુટર લેતો આવ્યો – એટલે વધુ એક ડેબિયન મશીન!! મજા આવશે. મોનિટર નવું લેવું પડશે – ત્યાં સુધી ટીવીથી ચાલી જશે.

* હમણાં ગુગલ મેપ્સ મચડતો હતો ત્યારે અચાનક નજર પડી કે કોમર્સ છ રસ્તા પર આવેલ અમારા સમાજની મેવાડા હોસ્ટેલ (આખું નામ: કે.આર. મિસ્ત્રી છાત્રાલય) ની જગ્યા એ “મેવાડ હોસ્પિટલ” બતાવી રહ્યું છે!! હવે, અહીં ક્યાં બગ રીપોર્ટ કરવો તે મને ખબર નથી. જો કે આજ-કાલ હોસ્પિટલ એટલો પ્રોફિટેબલ બિઝનેશ છે કે હોસ્ટેલનાં ટ્રસ્ટીઓ ક્યારે હોસ્ટેલ બંધ કરી હોસ્પિટલ ચાલુ કરી દે તે કહેવાય નહી!!

* ફ્રી કલ્ચર ઈવેન્ટમાં મને એક ભાઈ મળ્યા જે પ્રોહિબિશન.ઈન નામની સરસ મજાની વેબસાઈટ ચલાવે છે. જોવા અને વાંચવા જેવી છે, જેમને ખાસ પ્રકારનાં પીણાંનો શોખ હોય હવે, આ વખતે સરકારે પોલીસને હુકમ કર્યો છે કે ૩૧મીની રાતે દારુનું એક ટીપું પણ વેચાવું (કે વેચશો) નહી. અરર, આ તો ખોટું થયું. અમદાવાદીઓની પાસે આનો ઉપાય છે. તો, હાજર છે એવા જ કેટલાંક ઉપાયો:

૧. કોઈ પણ સોડાની લારી પર જાવ. તમને બિયર, રમ કે વ્હિસ્કી જેવો સ્વાદ અને દેખાવ ધરાવતા વિવિધ શરબત કે સોડા મળશે. આખરે તો આ પાપી મન ને જ મનાવવાનું છે ને?

દા.ત. નીચેનો ફોટો

(નોંધ: બિયર પીવા બેઠા હોય ત્યારે બોટલનાં લેબલમાંથી જોડણીની ભૂલો ન કાઢવી જોઈએ )

૨. ટ્રોપિકાના કે રીઅલનું ગ્રેપ જ્યુશ ખરીદો. રેડ વાઈન પીતા હોય તેમ મસ્તીથી પીઓ (હું આમ જ કરું છું).

૩. માઉન્ટ-આબુ, દિવ, દમણ એમને એમ કંઈ લોકો જાય છે? ભલા માણસ..

* હું એવા ધર્મમાં નથી માનતો કે જ્યાં ભક્તો તાળાંમાં રહેતા ભગવાનના દર્શન કરવા માટે ભાગંભાગ કરે અને કચડાઈ મરે. મને યાદ છે કે જ્યારે અમે શ્રીનાથજી દર્શન માટે ગયેલા ત્યારે મંદિર બંધ હતું. મને થયું કે આ શું? અને હું (અને મામા અને ધવલ) દર્શન માટે નહોતા ગયેલા. તેના કરતાં અમે બજારમાં રખડેલા અને પછી આગળ ઉદેપુર જવા માટે નીકળી ગયેલા..

* ગઈકાલે સેપ્ટ, અમદાવાદ ખાતે ફ્રી કલ્ચર રોડ શૉનું આયોજન થયું હતું. અમેરિકાથી આવેલા એલિઝાબેથ, ડીન અને બેન – આ ત્રણેય જણાં આખા ભારતમાં ફ્રી કલ્ચર વિશેની જાણકારી અને સમજણ વધે તે માટે ફરી રહ્યા છે. એમના અને ફ્રી કલ્ચર વિશે વધુ જાણવા માટે આ પાનું વાંચો.

હું ત્યાં પહોંચ્યો ત્યારે સમય મને સેપ્ટનાં દરવાજા આગળ મળ્યો. ૪ વાગે તો અમે પહોંચી ગયા અને પછી ખબર પડી કે કાર્યક્રમ ૫ વાગે છે અને ઓડિટોરિયમની જ્ગ્યાએ આગળની લોનમાં રાખેલ છે. અમે ગયા ત્યારે સ્પીકર પર રોક સંગીત વાગતું હતું અને લાઈટ્સ વગેરેની ગોઠવણ થતી હતી.

એટલે અમારું કામ લોનમાં બેસવાનું હતું. તે પહેલા રુતુલ જોષી જે સેપ્ટમાં પ્રોફેસર છે અને મારો સ્કૂલ સિનિયર પણ છે. તેમની સાથે ઘણી વાતો કરી. પાંચેક વાગ્યાની આસપાસ સામ્યક બરોડાથી આવી પહોંચ્યો અને અમારા વચ્ચે સારી એવી ચર્ચા થઈ જે અત્યારે રહસ્ય હોવાથી અહીં મૂકી શકાય તેમ નથી. સામ્યક, ખરું ને?

થોડા સમય પછી ફ્રી કલ્ચર રોડ શૉની શરૂઆત થઈ. પ્રો. શંકર જેઓએ આ શૉ સેપ્ટમાં કરવાની જવાબદારી લીધી – તેઓએ પરિચય સાથે શરૂઆત કરી.

પછી, એલિઝાબેથે પોતાના પરિચય અને લો સ્કૂલમાં લોયર બનવાની જગ્યાએ એ કઈ રીતે ફ્રી કલ્ચર મુવમેન્ટમાં જોડાઈ અને ફ્રી કલ્ચર વિશેનું સરસ પ્રેઝન્ટેશન આપ્યુ.

તેના પછી બેન અને ડીને ફ્રીકલ્ચર.ઓર્ગ અને ઓપનવિડીઓએલાયન્સ.ઓર્ગ વિશે સરસ પ્રેઝન્ટેશન રજૂ કર્યું. આ બન્ને સાઈટ્સની કડીઓ નીચે આપેલ છે. આ પછી મેં પાંચ મિનિટમાં યુનિકોડથી વેબસાઈટ જગત એટલે કે ઈન્ટરનેટ કઈ રીતે બદલાઈ રહ્યું છે તેના વિશે એક પ્રેઝન્ટેશન આપ્યું. અને તે તમે મારા ગીટહબ ટોક પાનાં પરથી લઈ શકો છો. પછી, બધા જોડે સરસ મજાની વાતોમાં ઘણો સમય ગયો. ફોટો-સેશન વગેરે થયું. મારી પાસે માત્ર મોબાઈલ હોવાથી જ્યાં સુધી અજવાળું હતું ત્યાં સુધી ફોટા લેવાયા!

રાત્રે ૮ વાગ્યાની આસપાસ ઓફિસ પાછો આવ્યો ત્યારે ઢગલાબંધ કામ બાકી પડ્યું હતું

કડીઓ:
ફ્રીકલ્ચર.ઓર્ગ
ઓપનવિડીઓએલાયન્સ.ઓર્ગ
ડીએનએનો લેખ

* વિકિપીડિયાને ટ્રેનમાં કે હવાઈ મુસાફરી વખતે મિસ કરો છો? તમારા બચ્ચા કે બચ્ચાંઓને વિકિપીડિયાનો સરળ ઉપયોગ કોમ્પ્યુટરનો ઉપયોગ કર્યા વગર શીખવાડવો છે? કંઈક નવું હેકિંગ કરવું છે – કારણ કે, તે મુક્ત સોર્સ એટલે કે ઓપન સોર્સ છે?

તો હાજર છે – વિકિરીડર. ઓપનમોકો નામનો ઓપનસોર્સ હાર્ડવેર અને સોફ્ટવેર વાળો મોબાઈલ બનાવ્યો તે કંપની લઈને આવે છે, વિકિરીડર. ૯૯ ડોલર એટલે કે લગભગ ૫૦૦૦ની આસપાસ મળતા અને હથેળીમાં સમાઈ જતા આ ડિવાઈસમાં અનેક ક્ષમતાઓ ભરેલી છે. વધુ લખું તે પહેલા જુઓ વિકિરીડરની વેબસાઈટ.

તેનો કોડ અહીંથી ડાઉનલોડ કરી શકાય છે.

* ઘણાં દિવસ પર હાજર છે, ચિત્ર-વિચિત્રનો ભાગ ૪.

૧. ટી-શર્ટ. લાગણી દુભાવવી નહી!!

૨. રીક્ષા ચાલકની વાટ. ધ વિલેજ, હિમાલય મોલ, અમદાવાદ.