આજની કડીઓ

* ભારતીય ભાષાઓમાંથી બ્રેઇલ લીપીમાં રુપાંતરણ કરતું સોફ્ટવેર. થેન્ક્સ ટુ નિર્ભિક અને પૂજા. અત્યારે તો દેવનાગરી–>બ્રેઇલમાં પ્રાપ્ત છે. ગુજરાતી ટેસ્ટિંગ માટે હું વોલિયન્ટર બન્યો છું. ટેસ્ટિંગ વગેરે (અને જો પાયથોન ફાવતું હોય તો, કોડ વગેરેમાં પણ!) તમારો ફાળો આપી શકો છો.

જુઓ: https://github.com/pareidolic/bharati-braille

* ક્રાયપ્ટોકેટ, પ્રાયવસીને પ્રાથમિકતા આપતી ચેટ સેવા.

* અને, એક બાત કહેના તો ભૂલ હી ગયા!!

પમી તારીખે એટલે કે ૦૫/૦૫ એ ડેબિયનની નવી આવૃત્તિ રીલીઝ (ie પ્રકટ) થઇ છે. ગેટ ઇટ વ્હાઇલ ઇટ ઇઝ હોટ! એમ તો રીલીઝ પાર્ટી વગેરે રાખવાનો પ્લાન હતો, પણ હજી સુધી ક્યાંય ગોઠવણ થઇ હોય એવા સમાચાર આવ્યા નથી. આમ પણ, હમણાંથી ડેબિયન પર ફોકસ ઓછું થાય છે, જે હવે નજીકના ભવિષ્યમાં વધારવાનો પ્લાન છે. (આવાં કેટલાંય ભવ્ય પ્લાન્સ અમે બનાવેલા છે, જોઇએ હવે મહેલ ઇંટનો બને છે કે પત્તાનો, વ્હુ નૉસ?)

વોટ ફોર…

* આ આપણી સ્ટાન્ડર્ડ ચૂંટણી વિશે પોસ્ટ નથી.

અત્યારે ડેબિયન પ્રોજેક્ટ લીડર (એટલે કે DPL) માટે ચૂંટણી ચાલી રહી છે. ડેબિયન પ્રોજેક્ટમાં મજાકમાં કહેવાય છે કે, વોટ અર્લી, વોટ ઓફન. અને, ખરેખર તમે એક કરતાં વધુ વખત મત આપી શકો છો, તમારો જે છેલ્લો મત સ્વીકાર થાય તે ગણાય છે. વોટિંગ અને આખી સિસ્ટમ પણ અદ્ભૂત છે. અહીં None of the above ને તમે તમારો મત આપી શકાય છે. વોટિંગ પૂરૂ કર્યા પછી કોણે-કોણે વોટ આપ્યો તેની માહિતી મળે છે (જેથી ઇનએક્ટિવ ડેવલોપર્સનો ટ્રેક રાખી શકાય!), કોને આપ્યો તે નહી. જો તમારે તમારો મત બરોબર રેકોર્ડ થયો છે એ ચકાસવું હોય તો તમારી GPG કીનો ઉપયોગ કરીને તમે તે કરી શકો છો. અહીં દરેકને ચૂંટણી લડવાની તક છે (તો સામે પક્ષે ઢગલાબંધ જવાબો આપવાની તૈયારી પણ રાખવી પડે).

પરિણામ પંદર તારીખની આસપાસ આવવાની શક્યતા છે (શક્યતા નહી, નક્કી જ છે). લગભગ ત્રણેય ઉમેદવારો મજબૂત છે, એટલે વોટ કોને આપવો એ નક્કી થતું નહોતું, છેવટે વોટનો ઇમેલ મોકલી દેવાયો અને બરોબર મળી ગયો છે તેવો જવાબી ઇમેલ પણ તરત આવ્યો ત્યારે શાંતિ થઇ (થોડા વર્ષ પહેલાં આવા કોઇ વોટિંગ દરમિયાન મારો રિજેક્ટ થયેલો વોટ સ્પામમાં ગયેલો અને મને વોટિંગ પૂરુ થયાં પછી ખબર પડેલી )

અપડેટ્સ – ૮૩

* નવું લેપટોપ. એટલે કે વિશલિસ્ટ – ૧ (ઉચ્ચાર: વિશલિસ્ટ માઇનસ વન!). નવું લેપટોપ અમે ખાસ વ્યક્તિ માટે લીધું જેના પર હક્કથી ડેબિયન સ્થાપન કરવામાં આવ્યું અને અત્યારે તેના પર મૂળભૂત સ્થાપનોની પ્રક્રિયા ચાલી રહી છે.

* છેલ્લાં એક અઠવાડિયાથી તબિયત ઠીક નહોતી. પેલી ટોપી લેવા માટે ફરીથી એમ.જી. રોડ ગયો ત્યારની કંઇક ગરબડ હતી. એકાદ દિવસ તાવ અને શરદી પછી એકાદ દિવસ ભયંકર માથું દુખવા આવ્યું (સામાન્ય રીતે મને ક્યારેય માથું દુખતું નથી. ના, બ્લોગબાબાઓની પોસ્ટ્સ વાંચીને પણ નહી!). ત્યારબાદ શરદી-ખાંસી. બે-ત્રણ દિવસથી વાતાવરણ પણ વિચિત્ર હતું એટલે પછી પેલાં બહુ બધાં આઇસક્રીમની જગ્યાએ બધો દોષ વાતાવરણ પર ઢોળવામાં આવ્યો

ઓપનસોર્સમાં યોગદાન કેવી રીતે આપશો? ભાગ ૨

* ભાગ ૦ અને ભાગ ૧ પછી હવે હાજર છે ભાગ ૨. એટલે કે ભાગ-મ-ભાગ — ઓપનસોર્સ તરફ?

વેલ, ટેકનિકલ યોગદાન એ પહેલાં બે હપ્તામાં જોયેલા યોગદાનથી ખાસ અલગ નથી. તમે જો કોડિંગ કરી શકતા હોવ કે પછી ટેકનિકલ સાઉન્ડ હોવ તો, તમે કોઇ પણ પ્રોજેક્ટમાં તમારું યોગદાન આપી શકો છો. ધ્યાન એ રાખવું કે કોમ્યુનિકેશન-કોમ્યુનિટી મુદ્દો અહીં પણ મજબૂત હોવો જરુરી છે. સારું કોડિંગ કરનાર, સારો કોમ્યુનિટી મેમ્બર બને તે જરુરી નથી! નીચે થોડાંક મુદ્દાઓ લખ્યા છે, જે મારા નાનકડાં અનુભવોને આધારે છે. સુધારા-વધારા માટે સૂચનો આવકાર્ય છે. આ સીરીઝની બ્લોગ-પોસ્ટ્સ હું સમયાંતરે અપડેટ્સ કરતો રહીશ.

૧. ધીમી શરુઆત.

ધીરુભાઇ ઝિંદાબાદ. ધીરુભાઇ અમર રહો. (ઓપનસોર્સની) દુનિયા મુઠ્ઠીમાં કરી લેવા માટે હંમેશા ધીમી શરુઆત કરવી. દા.ત. કર્નલમાં યોગદાન આપવું હોય અને કમ્પાઇલ કર્યા વગર એ પ્રકારના પ્રશ્નો તમે સીધાં જ કર્નલનાં મેઇલિંગ લિસ્ટમાં જઇને પૂછો તો, સારા જવાબોની અપેક્ષા (કે આશા – તમને જે ગમે તે) રાખવી નહી. PS: આપણાં ભારતીયો આ પ્રકારના સવાલો કર્નલ મેઇલિંગ લિસ્ટમાં પૂછવા માટે ફેમસ છે (અને બીજી બાજુ હોશિંયાર, હોનહાર કર્નલ ડેવલોપર્સ ભારતમાંથી પણ છે!).

૨. ગીટહબ, બિટબકેટ કે ગિટોરિઅસ.

આ ત્રણ વેબસાઇટ્સ તમારા કોડિંગને દુનિયા સુધી પહોંચાડશે. વત્તા ગીટહબ, બિટબકેટ, ફોર્ક અને પુલ રિકવેસ્ટનાં સરસ ફીચર્સ ધરાવે છે એટલે તમે ગમે તે પ્રોજેક્ટમાં યોગદાન આપી શકશો. એકદમ સરળ અને સુંદર.

૩. રીઇન્વેન્ટિંગ ધ વ્હીલ.

^^ આ ન કરવું. કોલેજમાંથી બહાર પડીએ ત્યારે આપણી ઇચ્છા પોતાની ઓપરેટિંગ સિસ્ટમ બનાવવાની હોય છે. એમ કરવાની જરુર નથી, કારણ કે લિનક્સ કે પહેલેથી ચાલી રહેલા સારાં પ્રોજેક્ટને શ્રેષ્ઠ બનાવીએ એ જ ઘણું છે (આ લખીને તમારી ઇચ્છા પર હું કુહાડો નથી મારતો, પણ કોમ્યુનિટી સાથે જોડાવવું એ નવી કોમ્યુનિટી બનાવવા કરતાં સરળ છે!).

૪. મોટિવેશન.

મોટિવેશન આપવું અને જાળવી રાખવું. અહીં તેની જરુર પડશે!

૫. ઉદાહરણો.

ટેકનિકલ યોગદાન આપવા માટે બેસ્ટ પ્રોજેક્ટ્સ: કેડીઇ (C++, Qt, Python વગેરે), પાયથોન (C, Python), ડેબિયન, (તમને જે કંઇ આવડે તે!), ફાયરફોક્સ (આ પાનું જોવા જેવું છે).  વત્તા, જો તમે તાજેતરમાં થયેલી કેડીઇ કોન્ફરન્સ વિશેની વિવિધ પોસ્ટ્સ વાંચી હોય તો, ઓપનસોર્સમાં ઝંપલાવવાનો ઉત્તમ રસ્તો, કોઇ કોન્ફરન્સમાં જવું અને ત્યાં ડાયરેક્ટ ડેવલોપર્સ જોડે જ્ઞાન મેળવવું.

તો, આ સીરીઝ અહીં પૂરા થાય છે!! સમય મળશે તો આપણે આવાં મુદ્દાઓ ચર્ચતા રહીશું!!

ઓપનસોર્સમાં યોગદાન કેવી રીતે આપશો? ભાગ ૧

* ભાગ ૦ વાંચવા ને બદલે તમે જો સીધાં અહીં આવ્યા હોવ તો, તે પહેલાં વાંચી લેવા વિનંતી (ઓકે, અત્યારે તો ચાલશે)!

સોફ્ટવેર એન્જિનિયર્સ માટે સામાન્ય રીતે ઓપનસોર્સમાં યોગદાન આપવું સરળ છે, પણ જો કોઇ સોફ્ટવેર એન્જિનિયર્સ ન હોય તો (એટલે કે ટેકનિકલ બેકગ્રાઉન્ડ ન હોય તો)? તો પણ, તમે આ અદ્ભૂત ચળવળમાં તમારું યોગદાન અને યથાશક્તિ ફાળો આપી શકો છો. કેવી રીતે? આપણે તે અહીં જોઇએ.

૧. ગ્રાફિક્સ, ડિઝાઇન, આર્ટવર્ક

જો તમને સારી કલાત્મક દ્રષ્ટિ હોય અને તમે જીમ્પ કે ઇન્કસ્કેપ જેવાં કાર્યક્રમો વાપરી શકતાં હોવ તો, બધાં જ ઓપનસોર્સ પ્રોજેક્ટ તમને આવકારશે. જીમ્પ અને ઇન્કસ્કેપ હવે શીખવા એટલાં અઘરાં નથી અને દરેક ઓપનસોર્સ પ્રોજેક્ટમાં સરસ મજાનાં લોગો, આઇકન્સ કે વિઝ્યુલ ઇફેક્ટ્સ બનાવનારની ખૂબ જ ડિમાન્ડ હોય છે. દા.ત. કેડીઇ ઇન્ડિયાનું આર્ટવર્ક

૨. ફોન્ટ્સ

ફોન્ટ્સ, ખાસ કરીને ભારતીય ભાષાઓમાં ફોન્ટ બનાવનારની ભારે માંગ છે. ગુજરાતી ઓપનસોર્સ ફોન્ટ્સ જેવાં કે, લોહિત, રેખા, આકાર અને કલાપીમાં તમારું યોગદાન આવકાર્ય છે (છેલ્લાં ત્રણ હું સંભાળી રહ્યો છું, એટલે તો ખાસ જરુર છે!!)

૩. ડોક્યુમેન્ટેશન (દસ્તાવેજ, મદદ વગેરે)

કોઇ પણ પ્રોજેક્ટમાં તાતી જરુર મદદ કે ડોક્યુમેન્ટેશન લખવાની હોય છે, કારણ કે આ કામ બોરિંગ છે! બોરિંગની સાથોસાથ એટલું જ મહત્વનું છે. બધાંને ડોક્યુમેન્ટેશન જોઇએ, પણ કોઇ તેને લખવા તૈયાર હોતું નથી એટલે આ પણ ઝડપી લેવા જેવી તક છે, જો તમને આ કામ બોરિંગ ન લાગતું હોય તો! લિનક્સમાં તમે શરુઆત man પાનાંઓથી કરી શકો છો. (આ પાછો બીજો વાઇડ વિષય છે, ફરી ક્યારેક ઊંડાણમાં ઉતરીશું.)

PS: ઢગલાબંધ ડોક્યુમેન્ટેશન.

૪. ભાષા સંબંધિત પ્રોજેક્ટસ (ભાષાંતર, ઇનપુટ મેથ્ડ્સ વગેરે)

ભાષાંતર એટલે કે અનુવાદ – ખાસ કરીને સોફ્ટવેરને ભારતીય ભાષાઓમાં અનુવાદ કરવાં, કરેલો અનુવાદ સુધારવા અને સંભાળવા, ખાસ્સી મહેનત અને માણસોની જરુર છે. લોકો ભલે કહે કે, અંગ્રેજી બધાંને આવડે, પણ આપણે જાણીએ છીએ કે શહેરથી ૧૦ કિલોમીટર દૂર જાવ એટલે અંગ્રેજી  કેટલું લોકપ્રિય છે એ ખબર પડી જાય છે. કોમ્પ્યુટરનો ઉપયોગ સામાન્ય માણસ પોતાની ભાષામાં કરી શકે એ માટે ટેકનિકલ અનુવાદકો જરુરી છે. લગભગ દરેક પ્રોજેક્ટસમાં translator ની જરુરિયાત હોય જ છે. એટલે, ઓલ આર વેલકમ!

થોડાક ઉદાહરણો: ટક્સપેઇન્ટ, ટોર, કેડીઇ, ગ્નોમ, દ્રુપલ, વર્ડપ્રેસ.

ભાષા સંબંધિત બીજાં પ્રોજેક્ટ્સમાં ઇનપુટ મેથ્ડ્સ, ડિક્શનરી, સંબંધિત ટુલ્સ જેવાં કે કી-બોર્ડ લેઆઉટ વગેરે પણ એટલાં જ જરુરી છે. આવા પણ ઘણાં પ્રોજેક્ટસ છે. એમાં તમે નોન-ટેકનિકલ ઇનપુટ્સ જેવાં કે ટેસ્ટિંગ વગેરે આપી શકો છો.

કેટલીક રમતો જેવી કે KGeography કે Ktouch પણ તૈયાર જ છે, તમારી મદદ લેવા માટે!

૫. વિકિપીડિઆ

હા. વિકિપીડિઆમાં તમારું યોગદાન ઓપનસોર્સ-ઓપન કન્ટેન્ટમાં જ ગણાય એટલે ચિંતા નહી. વિકિપીડિઆમાં ટેકનિકલ યોગદાન કઇ રીતે કરવું એ કાલે જોઇશું.

અને છેલ્લે, કંઇ નહી તો,

૬. બગ રીપોર્ટિંગ

એટલે કે કંઇ મુશ્કેલી આવી હોય તો ડેવલોપર્સને જાણ કરો. ઉબુન્ટુમાં તમે લૉન્ચપેડ કે ડેબિયનમાં reportbug જેવાં રેડીમેઇડ ટુલ્સ તૈયાર જ છે. દરેક પ્રોજેક્ટ્સને પોતાનું ‘બગ ટ્રેકર’ હોય છે જે તમે વાપરી શકો છો. જોકે પહેલાં આ જ પ્રકારનો કોઇ બગ હાજર છે કે નહી તેની ખાતરી કરી લેવાથી તમારો અને લોકોનો સમય બચી જશે.

આવતી કાલે (અથવા પરમ દિવસે), ટેકનિકલ યોગદાન કેવી રીતે આપવું એના પર જોઇશું.

ઓપનસોર્સમાં યોગદાન કેવી રીતે આપશો? ભાગ ૦

* સામાન્ય રીતે આ પ્રકારનાં લેખો તમને અંગ્રેજી કે બીજી ભાષાઓમાં ઢગલાબંધ મળી જશે. એટલે, જો તમે ત્યાં વાંચેલું જ હોય તો, આ પોસ્ટ છોડી શકો છો, તેમ છતાંય આ લેખની ગુણવત્તા વધારવાના પ્રાયોગિક સૂચનો સહર્ષ આવકાર્ય છે.

આ ઓપનસોર્સ છે શું?

ઓપનસોર્સ એટલે કંઇ રહસ્યમય વસ્તુ નથી! ઓપન એટલે ગુજરાતીમાં શબ્દનું ભાષાંતર કરીએ તો ખૂલ્લું અને સોર્સ એટલે સ્ત્રોત કે કોડ. તેમ છતાંય, અહીં ઓપનનો અર્થ ‘મુક્ત’ પર લેવો.

અને આ ફ્રી સોફ્ટવેર શું છે?

તમે ફ્રી સોફ્ટવેર અને ઓપનસોર્સ એમ બે શબ્દો વારંવાર મારા બ્લોગમાં સાંભળ્યા હશે. ફ્રી સોફ્ટવેર એ અલગ પ્રકારની ચળવળ છે. ઓપનસોર્સ સોફ્ટવેર મોટાભાગે વધુ પ્રચલિત શબ્દપ્રયોગ છે, પણ અંતે તો હેમનું હેમ એમ બન્ને શબ્દો એકબીજાં માટે વાપરી શકાય છે (ક્યારેક નહી, પણ તેની વાત પછી ક્યારેક!)

ઓપનસોર્સ સોફ્ટવેરનાં ઉદાહરણો?

સૌથી લોકપ્રિય ઉદાહરણ આપવું હોય તો – લિનક્સ (કે લાઇનક્સ. જેવો જેનો ઉચ્ચાર!). પછીથી, ફાયરફોક્સ, થન્ડરબર્ડ ઇમેલ ક્લાયન્ટ, પિડગિન મેસેન્જર ક્લાયન્ટ, એનડ્રોઇડ (આ અંગે થોડા મતભેદો છે, તેમ છતાંય..) અને ઢગલાબંધ બીજા સોફ્ટવેર.

શરુઆત ક્યાંથી કરવી જોઇએ?

આપણે ત્રણ ભાગમાં શરુઆત કરીએ,

૦. સામાન્ય સમજ અને પરિચય
૧. નોન-ટેકનિકલ યોગદાન.
૨. ટેકનિકલ યોગદાન.

આ પ્રથમ લેખમાં બન્ને માટે સામાન્ય શીખવાની વસ્તુ પર ધ્યાન આપીશું. ધ્યાનમાં રાખજો કે જે ઉદાહરણ હું લઇશ એ ઉદાહરણ તરીકે જ હશે. ઓપનસોર્સનો ફાયદો એ કે એક કામ માટે તમને એકથી વધુ વિકલ્પો મળી રહે છે. હું અહીં એક રસ્તો બતાવીશ. એવું જ કામ કરવાના બીજા હજાર રસ્તાઓ હાજર છે.

અહીં આપણે ત્રણ વસ્તુનો પરિચય કરીશું.

૧. એડિટર (દા.ત. vim), ૨. વર્ઝન કંટ્રોલ સિસ્ટમ (દા.ત. Git), ૩. કોમ્યુનિકેશન અને કોમ્યુનિટી (મેઇલિંગ લિસ્ટ, IRC, બગ ટ્રેકિંગ વગેરે). આપણે ધારી લઇએ કે તમે લિનક્સ વાપરી રહ્યા છો. લિનક્સનો તમારી પાસે ન હોય તો, અત્યારે ડેબિયન, ઉબુન્ટુ, ફેડોરા જેવા કેટલાંય વિકલ્પો તમારી પાસે છે. એક ઉપાય તરીકે તમે virtualbox જેવા સોફ્ટવેર પણ વાપરી શકો છો, પણ સૌથી ઉત્તમ ઉપાય, લિનક્સ જાતે જ ઇન્સ્ટોલ (સ્થાપિત) કરવાનો છે. પણ, એ આ લેખનો સ્કોપ નથી! (પણ, તમને ગુગલ સર્ચ કરતાં આવડે તો, તમે ૧૦ મિનિટમાં લિનક્સ તમારા મશીનમાં ઇન્સ્ટોલ કરી શકો છો!)

૧. એડિટર

એડિટર એટલે આપણાં ગુ.સ.ના માનનીય સંપાદકશ્રી નહી, પણ એડિટર એટલે એવો કાર્યક્રમ જે આપણને કોમ્પ્યુટરમાં ટાઇપ કરવા દે. નોટપેડ, વર્ડપેડ થી માંડીને લિનક્સમાં જીએડિટ, ઇમેક્સ કે વિમ એડિટરના ઉદાહરણો છે. તમારે માટે લિનક્સમાં વિમ શીખવાનું સલાહ ભર્યું છે, તેમ છતાંય જીએડિટ, કેટ કે કેરાઇટ પણ ચાલે. આ બધાં એડિટર તમને ગમતી પ્રોગ્રામિંગ ભાષાનું બંધારણ (ie સિનટેક્સ્ટ) હાઇલાઇટ કરે છે. યાદ રાખો કે, તેઓ IDE નથી.

vim શીખવા માટે આ પુસ્તક સરસ છે.

૨. વર્ઝન કંટ્રોલ સિસ્ટમ

એક વર્ઝન કંટ્રોલ સિસ્ટમ કાફી છે. દા.ત. Subversion અથવા Git.

Git માટે જુઓ નીચેની કડીઓ:

૧. Git પુસ્તક

૨. Git બ્રાન્ચિંગ વિશે સરસ માહિતી

૩. Git ખ્યાલો સરળ ભાષામાં

છેલ્લી બે કડીઓ થોડી એડવાન્સ છે, એટલે સીધું જ ત્યાં જંપલાવવું નહી.

૩. કોમ્યુનિકેશન અને કોમ્યુનિટી

૧ અને ૨ – ટેકનિકલ પુલમાં ડૂબકી મારે છે, પણ ઓપનસોર્સમાં સૌથી મોટી વસ્તુ કોમ્યુનિકેશન અને કોમ્યુનિટી છે. ઓપનસોર્સનો અર્થ જ એ કે સાથે મળીને કામ કરવું. લગભગ દરેક ઓપનસોર્સ પ્રોજેક્ટ એક કે વધુ મેઇલિંગ લિસ્ટ, IRC ચેનલ ધરાવે છે, જેને તમે સબસ્ક્રાઇબ કરીને બધી ઇમેલ્સ મેળવી શકો છો. તમારા પ્રશ્નો પૂછી શકો છો અને કોઇ તેનો જવાબ આપશે. જોકે, નીચેની વિગતો ધ્યાનમાં રાખવી.

૧. તમારો સવાલ પૂછતાં પહેલાં જે તે પ્રોજેક્ટનાં FAQs, README કે તેનાં મેન્યુઅલ વાંચી લેવા. નહી તો લોકો તમને કહેશે, RTFM!

૨. તરત જ જવાબની આશા રાખવી નહી. ધીરજના ફળ મીઠાં. કારણ કે, તમારી જેમ લોકો પોતાના ફ્રી સમયમાં પ્રોજેક્ટમાં યોગદાન આપે છે, એટલે તરત જવાબ આપવા કોઇ બંધાયેલું નથી.

૩. નમ્રતા એ સદ્ગુણ છે, એનો ઉપયોગ અહીં વારંવાર કરવો.

ઓકે, આ બધું એક જ પોસ્ટમાં સમજાવવું શક્ય નથી, એ માટે જાત મહેનત જિંદાબાદ કે પછી આપ મૂઆ સ્વર્ગે જવાતું નથી, વગેરે વગેરે કહેવતો યાદ રાખવી અને અહીં કોમેન્ટ્સમાં તમારા સવાલો પૂછતા. બીજો ભાગ કાલે અથવા પરમ દિવસે.

જીમેલ મીટર

* જીમેલ મીટર એ એક રસપ્રદ વેબસાઇટ છે, પણ જો તમે તમારા ઇમેલની પ્રાઇવેટ રાખવા માંગતા હોવ તો, તેનો ઉપયોગ ન કરતાં! તેમ છતાંય એક મહિનો તેને ટેસ્ટ આપવામાં આવ્યો અને,

જાન્યુઆરી મહિનામાં,

* ૩૩૨૯ ઇમેલ ૭૭૪ લોકો તરફથી મળ્યા જેમાં ૧૪.૫૭% મને મોકલવામાં આવ્યા હતા. એ તો સારું છે કે કેટલાય મેઇલિંગ લિસ્ટ ગયા મહિનાથી અનસબસ્ક્રાઇબ કરવામાં આવ્યા અને અમુકને ડાયજેસ્ટ મોડ પર લઇ જવામાં આવ્યા. નહિતર, આ આંકડો પાંચેક હજાર ઉપર પહોંચી જાત.

* ૧૦૨ ઇમેલ ૫૪ લોકોને મોકલવામાં આવ્યા. એવરેજ એક વ્યક્તિને ૨ ઇમેલ જ!

* ૩૦% ઇમેલમેં કચરાપેટીમાં નાખ્યા.

* સૌથી લાંબી ઇમેલ-શૃંખલા સ્વાભાવિક રીતે ડેબિયનનાં મેઇલિંગ લિસ્ટમાં સર્જાઇ હતી. ટોપ ૧૦માં ૮ તો ડેબિયન જ છે.

* અને સૌથી રસપ્રદ આલેખ મને લાગતો હોય તો,

ચાલો ત્યારે, નવા મહિનાની શરુઆત પણ ઢગલાબંધ ઇમેલથી થઇ છે. ક્યારેક તો એમ થાય છે કે આપણે સોફ્ટવેર ડેવલોપર છીએ કે ઇમેલ રીપ્લાયર

અપડેટ્સ – ૭૭

૭૭મી અપડેટ્સ પોસ્ટ નિમિત્તે ૭ અપડેટ્સ!

* ઓહ. હેલ્લો બેંગ્લુરુ.

* ટ્રેનની મુસાફરી >>> પ્લેનની મુસાફરી. ખાસ કરીને લોકો અને સિક્યોરીટીના નામ પર થતાં વિચિત્ર ચેકિંગના કારણે. સિક્યોરીટીને એટલી પણ ખબર ન હોય કે રાઉટરનું એરિયલ હાનિકારક ન હોય? વેલ, છેલ્લે એમને એમાં કંઇ હાનિકારક ન લાગ્યું અને મારું રાઉટર બિન-એરિયલ તડપતાં રહી ગયું.

* નવાઇની વાત કહેવાય કે હું આ વખતે એક પણ વસ્તુ ભૂલીને આવ્યો નથી. પણ, એમ કંઇ મિ. મર્ફી આપણને છોડે ખરા? અમદાવાદથી કેમેરાની બેગ, હાર્ડડિસ્ક અને બીજી વસ્તુઓ લાવવાના પ્લાન પર ચાવી ફરી વળી!

* પગ સલામત, તો જૂતિયાં બહોત. કંઇ નવા શૂઝ લેવાના નથી થયા. આ તો જરા કહેવત યાદ આવી ગઇ.

* ઢેટણેટેં.. દોડવાનું ફરી નિયમિત શરુ કરી દેવામાં આવ્યું છે! (એટલે કે આજથી)

* આવતી કાલે એક લોકલ કોલેજમાં (જે ગામના છેડે છે) ડેબિયન પર સેશન-લેક્ચર આપવા જવાનું છે, એટલે ફરી પાછી લગભગ એરપોર્ટ સુધીની બોરિંગ મુસાફરી કરવાની છે.

* અને હા, બધાંને હેપ્પી પ્રજાસત્તાક દિવસ!

આજની કડીઓ

* ધ સેટઅપ. આ સેટઅપ સાઇટમાં જાણીતા (વેલ, ટૅકનોલોજી કે એવાં બીજા અનેક ક્ષેત્રોમાં) લોકોનાં હાર્ડવેર સેટઅપ અંગે ઇન્ટરવ્યુ લે છે. ચાર જ પ્રશ્નો. એમાંથી ડેબિયન ડેવલોપર Joey Hess અને હાર્ડવેર હેકર Andrew Huangનું સેટઅપ વાંચવા જેવું છે. કોઇક દિવસ અમે પણ આ સાઇટમાં આવીશું નહિતર પછી આવી એક બ્લોગ પોસ્ટ તો અહીં મૂકી તો શકાશે

હવે, નીચેની કડીઓ, ટ્વિટરમાંથી:

* ડકડકગોનું ટર્મિનલ ઇમ્યુલેટર. મસ્ત છે!

* હા, હા. માઇક્રોસોફ્ટને આ અભિયાન ભારે પડ્યું!

* બે સરસ PDFs,

૧. 10 PRINT BASIC પ્રોગ્રામિંગ યાદ છે? તો આ પુસ્તક તમારા માટે છે.

૨. જીમ્પ મેગેઝિન બે ભાગ પ્રકાશિત થયા છે અને બંને સરસ છે. મને જોકે વિસ્તૃત રીતે જોવાનો સમય મળ્યો નથી, પણ જીમ્પ શીખવા માટે બેસ્ટ રીસોર્સ.

foss.in: ૨૦૧૨ અહેવાલ

* તો હાજર છે, નાનકડો અહેવાલ ઉર્ફે રીપોર્ટ, foss.in નો.

દિવસ ૧:

આગલા દિવસે ખબર પડી કે PG થી કોન્ફરન્સની સીધી જ બસ છે. વાહ, બીજું શું જોઇએ? સવારે ઇડલી-સંભાર+કોફીનો બ્રેકફાસ્ટ કરીને તરત બસમાં બેઠો અને અડધો કલાકમાં foss.in પહોંચી ગયો ત્યારે લાંબી લાઇનમાં ઉભા રહીને મારું કોન્ફરનસ ટેગ લીધું. ત્યાં પછી વાસુદેવ, અરવિંદ અને પ્રવીણ મળ્યા. સ્વાભાવિક રીતે કુશાલ, કિરણ (જેસ), ગૌરવ, સિધ્ધેશ, વિજય ગુપ્તા અને બીજા કેટલાય લોકો ઘણાં સમયે મળ્યા. આ વખતે લાઇવ સ્ટ્રિમીંગ પણ hasgeek.tv પરથી કરાતું હતું એટલે તમે હોલ-૧ નું જીવંત પ્રસારણ જોઇ શકાતું હતું.

ડેબિયન વાપરતા NIT કાલિકટના કેટલાંક સ્ટુડન્ટ્સને મળ્યો, જે જોઇને મને બહુ મજા આવી. અને, OpenShift વાળાની બોટલ ઓપર આકારની પેનડ્રાઇવ બહુ હીટ રહી. પણ, એક જ મળી એટલે બીજા કોઇને આપી શકાશે નહી

બપોરે લંચમાં ચિંતન અને વિરલ સચદે મળ્યા ત્યારે ગુજરાતીમાં સંવાદો કરવાની મજા આવી. લંચ પછીના સેશન આમ તો ભારે પડે, પણ અમે તો હેકરસ્પેસમાં બેઠા-બેઠા ડેબિયન પર ચર્ચાઓ જ કરી. ઘણાં નવાં લોકોનો પરિચય થયો. સાંજે Gene Koganની હેકરટોક સરસ રહી. પ્રોસેસિંગ અને OpenFramework વડે આર્ટ વત્તા ઓપનસોર્સનો જાદુ જોવા જેવો હતો!

ડિનર માટે ઝૈનાબ, ગૌરવ, કરુણાકર, દેવદાસ અને રામકી જોડે ક્યાંક બહાર જવાનું હતું અને બેંગ્લોરમાં ડિનર માટે દૂર જવું એથી વધુ કષ્ટદાયક કામ એકેય નથી. તેમ છતાંય અમે Koshy’s ખાતે ડિનર નક્કી કર્યું. ઠીક-ઠીક ડિનર ખાધા પછી ક્યાંક આઇસક્રીમ ખાવા ગયા ત્યાં અમે Death By Chocolate પસંદ કર્યો અને ખરેખર એટલી ચોકલેટ ખાધા પછી Death ના થાય તો જ નવાઇ

ત્યાંથી PG પર રીક્ષામાં આવ્યો અને સ્વાભાવિક રીતે રીક્ષાવાળા જોડે સારી એવી મગજમારી થઇ (ના થાય તો જ નવાઇ!).

દિવસ ૨:

બીજા દિવસની શરુઆત અને અંત Ulrich Drepper ની ટોકથી. બન્ને બહુ જોરદાર અને ભારે. મોટાભાગે અમે હેકરસ્પેસમાં જ બેઠા હતા. ડેલિગેટ કીટમાં સરસ મજાનો મગ મળ્યો જે હવે મારી કોફીની જરુરિયાતને સંતોષશે. વૈભવને પણ બે વર્ષ પછી મળ્યો ત્યારે foss.in ની જૂની યાદો તાજી થઇ ગઇ.

બીજા દિવસે અમે મોટાભાગે હેકરસ્પેસમાં જ બેસીને ડેબિયન ઉપર કામ કર્યું (કામ ઓછું, વાતો વધુ . systemd પરની ટોક માણી. લંચ સરસ હતું. અને, ખરેખર આ વખતે ત્રણેય દિવસ બહુ ખાધું

ડિનર KDE.in પબ્લિક જોડે. સ્મિત, વિરાંચ, આદિત્ય અને રોહન. પીઝ્ઝા ઝાપટ્યાં વત્તા ટેકનોલોજી, ફિલ્મો અને પુસ્તકોની અખૂટ વાતો.

દિવસ ૩:

ત્રીજા દિવસે અમારું Debian Tutorial આગલા દિવસે રાત્રે નક્કી કર્યા પ્રમાણે છેલ્લી ઘડીએ ઉમેરવામાં આવ્યું. આ પ્રકારના ટ્યુટોરિઅલ તમે રનટાઇમ પર ઉમેરી શકતા હોવ તો એની મજા અલગ છે. બપોર પછી હોવા છતાં ડેબિયન ટ્યુટોરિઅલ રુમ ભરેલો હતો. લગભગ પોણા બે કલાક સુધી સતત અમે ડેબિયન શું છે, તેમાં કેવી રીતે તમે યોગદાન આપી શકો છો અને પેકેજિંગ કેવી રીતે કરવું તેના પર ચર્ચા વત્તા પ્રેક્ટિકલ્સ બતાવ્યું. જોકે ઘણાં મહત્વના મુદ્દાઓ રહી ગયા પણ, બે કલાકમાં તે બધું જ સમજાવવું શક્ય નહોતું (એમ તો બે દિવસ પણ ઓછા પડે પણ, જાત મહેનત ન કરો તો શું કામનું?). પછી, અમે નાનકડી કી-સાઇનિંગ પાર્ટી રાખી. તેજેશનો અહીં પરિચય થયો અને ક્રિપ્ટોપાર્ટી ડિસેમ્બરના અંતમાં રાખવાનું નક્કી થયું છે.

અને, સરસ મજાનું Panel Discussion! લેનાર્ડ પોટ્ટરિંગ હોય એટલે બધાંને મજા જ આવે!

છેલ્લી હેકરટોક અલગ હતી. એ હતી Usability વત્તા મેજીક પર. મજા આવી, પણ પછી ત્યારબાદના રોક-શોમાં હું ન રોકાયો. કારણ? મને એમ કે હવે મારે મારી ફ્લાઇટ પકડી ઘરે જવાનું છે. હું ભૂલી ગયો હતો કે હું તો બેંગ્લોરમાં જ છું. ઓહ. હોમ સિકનેસ અને હું તરત પાછો PGમાં આવી ગયો. કોઇને ગુડ-બાય કહેવાનું રહી ગયું હોય તો – sorry!

ફોસ.ઇન ૨૦૧૨ના ફોટાઓ.

ફોસ.ઇન ૨૦૧૨ના મોબાઇલ વડે પાડેલા ફોટાઓ.

foss.in: ઐતહાસિક અહેવાલો ૨

બીજો ભાગ હાજર જ છે.

* ૨૦૦૬:

૨૦૦૬ની મુલાકાત વિશેષ રહી. કારણ? કારણ કે હું અને કોકી – ie સહપરિવાર ગયેલા. થેન્ક્સ ટુ, foss.in ટીમ કે જેમણે મારી સાથે કોકીની હોટલની એરેજમેન્ટ કરી આપેલી (એટલે કે જોડે જ, કેવી વાત કરો છો?). અને, બીજી સરસ વાત કે આ વખતે હું પહેલી વાર ડેબિયન પર ટોક આપવાનો હતો. મારો વિષય હતો: “હાઉ ટુ બીકમ થર્ડ ઇન્ડિયન ડેબિયન ડેવલોપર?” વેલ, હું થર્ડ ડીડી ના બન્યો પણ સાતમો બન્યો ખરો! મારી ટોક સારી રહી અને સારા એવા સવાલો મને પૂછાયા અને મેં સારા એવા જવાબો પણ આપ્યા! આ વખતે પણ ઘણાં લોકોનો પરિચય થયો. કપિલ, જ્હોન (jewel) – આ બે ડેબિયન ડેવલોપર્સ ત્યાં હાજર હતા. બાકી, અમારી રેગ્યુલર કોમ્યુનિટી તો ખરી જ. પ્રૂફ? આ ફોટો

અને, મારો અને કોકીનો અત્યાર સુધીનો બેસ્ટ ફેમિલી ફોટો આ ઇવેન્ટમાં જ લેવાયેલો. મારી ફેસબુક પ્રોફાઇલ પર તે જોવા મળી શકશે.

* ૨૦૦૭:

આ વખતે પણ ઇવેન્ટ હતી ખાસ-મ-ખાસ કારણ કે અમે ડેબિયન-ઉબુન્ટુ પ્રોજેક્ટ ડે નું આયોજન કર્યું હતું, જ્યાં સળંગ આખો દિવસ ડેબિયન પર ટોક-વર્ક શોપ થવાની હતી. ધાર્યા કરતાં ઓછાં લોકો આવ્યા, પણ આ વખતે ડેબિયન પ્રોજેક્ટ લીડર (એ સમયના) – સામ હોસેવર અને ક્રિસ્ટિઅન પેરીઅર (ડેબિયન i18n ગુરુ) ત્યાં આવેલા. એમની જોડે ઘણું નવું શીખવા મળ્યું વત્તા અંકિતની જગ્યાએ ફાયરફોક્સ-મોઝિલા લોકલાઇઝેશનની ટોક પણ આપી. અમારા પ્રોજેક્ટ ડે માં સન માઇક્રોસિસ્ટમનો એક માર્કેટિંગ વાળો ઘુસી ગયેલો જે સોનાની થાળીમાં ગોબા જેવું થયેલું, પણ ઓવરઓલ અમારો પ્રોજેક્ટ ડે સરસ ગયેલો.

આ ખાસ ઇવેન્ટ એટલા માટે પણ હતી કે મારો એક જોબ ઇન્ટરવ્યુ IISC ની સીડીઓ પર બેસીને થયેલો (અને પછી હું બેંગ્લોર ગયેલો.. ડોન્ટ રીમાઇન્ડ મી ધેટ!) તો બીજી બાજુ જૂની જોબમાંથી હેન્ડઓવર કરવાનું ભયંકર પ્રેશર પણ હતું.

PS: ક્રિસ્ટિઅન પેરીઅરનો રીપોર્ટ

* ૨૦૦૮:

વેલ, ૨૦૦૮માં હું foss.in માં નહોતો ગયેલો કારણ? લૉ હેંગિગ ફ્રુટ્સ.

ધેટ્સ ઓલ. ૨૦૦૯ કંઇ ઐતહાસિક ન કહેવાય એટલે તેના વિશે ખાસ લખતો નથી. ૨૦૧૨ નો અહેવાલ રવિવારે કે સોમવારે આપવામાં આવશે.

foss.in: ઐતહાસિક અહેવાલો ૧

* ૨૦૧૦માં foss.in ચૂકી જવાયા પછી અને ૨૦૧૧માં આયોજન ન થવાથી, ૨૦૧૨ની foss.in મુલાકાત ખાસ બની રહેશે એવું લાગે છે. મારા માટે ખાસ એટલે કે ૨૦૦૪ પછી પહેલી વાર એક ‘સામાન્ય મુલાકાતી’ની જેમ જવાનું થશે. ૨૦૦૫, ૨૦૦૬, ૨૦૦૭ અને ૨૦૦૯ – આ વર્ષો દરમિયાન હું ‘સ્પિકર’ હતો. ૨૦૦૪માં હું અને કુનાલ સાથે ગયેલા ત્યારે ઇવેન્ટનું નામ Linux Bangalore હતું. મારો લિનક્સ, ફ્રી સોફ્ટવેર-ઓપનસોર્સ સાથેનો સંબંધ foss.in ને કારણે જ ગાઢ થયો એમ કહી શકાય. અને, લાગે છે કે આ પોસ્ટ બહુ મોટ્ટી થશે, કારણ કે મારો વિચાર ૨૦૦૪ થી ૨૦૦૭ ના અનુભવો લખવાનો છે. એ સમયે આ બ્લોગ નહોતો (૨૦૦૬માં હતો, પણ કોણ જાણે કેમ, મેં આ વિશે કંઇ પોસ્ટ ન કરેલું! ૨૦૦૭માં ખાલી આ પોસ્ટ જ અને ૨૦૦૮માં તો અલગ કારણોસર મુલાકાત ન લઇ શકાઇ). તો શરુ કરીએ ૨૦૦૪ થી?

૨૦૦૪:

૨૦૦૪, હમમ. ૨૦૦૪ એટલે કે મુંબઇનો શરુઆતી સમય. (જોકે હું તો મુંબઇમાં છેક જાન્યુઆરી એન્ડ થી હતો જ.) નિરવ ટૉક આપવાનો હતો અને અમારી પાસે એવું કંઇ હતું નહી એટલે અમે ખાલી એટેન્ડ કરવાના હતા. કુનાલ જોડે થોડા સમય પહેલાં પરિચય થયેલો અને સરખી વિચારસરણીને કારણે પરિચય મિત્રતામાં પરિણમ્યો. તેણે બેંગ્લોર જોયેલું હતું એટલે અમે બન્નેએ ટ્રેન-હોટેલ ટિકિટ જોડે બુક કરાવેલી. ૨૨ કલાકની સરસ મુસાફરી પછી અમે મેજેસ્ટિક પાસે કોઇક હોટલમાં રહેલા એવું યાદ છે. એ વખતે Linux Bangalore એ IISC ખાતે હતી અને પ્રમાણમાં નજીક જગ્યા હતી એટલે આવવા-જવાનો વાંધો નહોતો આવતો.

ત્રણ દિવસ દરમિયાન બહુ મજા આવી. કોન્ફરન્સ તો માણી વત્તા બેંગ્લોરમાંય ફર્યા. સાયન્સ મ્યુઝિયમ અને કબન પાર્ક વગેરે. ફોટાઓ પડ્યા છે, પણ ક્યાં છે એ યાદ નથી. ૨૦૦૪ની ખાસ યાદો કહેવી હોય તો, એમ.જી. રોડ પરથી ખરીદેલું એક મેગેજીન જેમાં ડેબિયનની સીડી આવેલી. જેના વડે મેં ઘરે પહેલી વાર ડેબિયન ઇન્સ્ટોલ કરેલું અને પછીની ઘટનાઓ-દુર્ઘટનાઓનાં તમે સાક્ષી છો જ. ૨૦૦૪માં પહેલી વખત મયંક-શશાંક શર્માને મળેલો એ પણ એક યાદગાર ક્ષણ હતી.

સૌથી ભયંકર યાદ હોય તો પહેલી વાર વિમાની મુસાફરી કરવાની. એ વખતે ઉડતી હતી તે સહારા એરલાઇન્સમાં પંખા વાળા વિમાનમાં પંખાની બાજુમાં મારી વિન્ડો સીટ હતી. વેલ, માત્ર નિરવ જ સમજી શકે છે કે સિવાય મને બીજી કઇ બીક હતી

PS: એ વખતની અંગ્રેજી બ્લોગની પોસ્ટ

૨૦૦૫:

૨૦૦૪ અને ૨૦૦૫ વચ્ચે મારું ઇવોલ્યુશન થોડું થયું અને મેં મોનો અને લોકલાઇઝેશન એવા વિષય પર ટોક આપેલી. સ્વાભાવિક રીતે નિરવે પ્રેઝન્ટેશન વત્તા કન્સ્પટમાં સારી એવી મદદ કરેલી. ઇવેન્ટ આ વખતે બેંગ્લોર પેલેસ ગ્રાઉન્ડમાં હતી. મોટા-મોટા હોલ બનાવેલા. આ ઇવેન્ટ મારા માટે ખાસ હતી કારણકે, જલધર વ્યાસ અમેરિકાથી ડેબિયનની ટોક માટે આવેલા અને સ્પિકર તરીકે મને ખાસ ટ્રીટમેન્ટ મળેલી. આ વખતે રોક શો વગેરે પણ ખાસ આકર્ષણ હતા. ૨૦૦૫માં પણ અમે દરેક રાતે ડિનર માટે અલગ-અલગ જગ્યાએ ગયેલા એમાં વિન્ડસર પબ ખાસ યાદ છે.

૨૦૦૫માં ખબર પડી કે લોકો સામે પ્રેઝન્ટેશન આપવું એ કેટલું અઘરું છે (જોકે મારી ટોકમાં ખાસ કોઇ પબ્લિક નહોતી એ સારી વાત હતી!). ઘણું શીખવા મળ્યું. કેટલાય નવાં લોકોનો પરિચય થયો અને નવાં મિત્રો બન્યા. ૨૦૦૫ની મુસાફરી સરળ રહી, કારણ કે સ્પિકર હોવાના નાતે બન્ને વખતહવાઇ મુસાફરી કરવા મળેલી. એ વખતે નવું-નવું હતું એટલે બહુ મજા આવેલી.

PS: ૨૦૦૫ની અંગ્રેજી પોસ્ટ્સ: ૧, ૨, અને ૩.

PS 2: અરર, હું આવું ગંદુ અંગ્રેજી ધરાવતો હતો? (હજી પણ ધરાવું છું. ડોન્ટ વરી ).

૨૦૦૬-૨૦૦૭-૨૦૦૮ હવે પછીનાં ભાગ-૨ માં.

અપડેટ્સ – ૭૦

* પરંપરાથી વિરુધ્ધ આ પોસ્ટ રવિવારે સવારે જ પોસ્ટ કરવામાં આવે છે. એક વાત અહીં સ્પષ્ટ કરી દઉં કે દર અઠવાડિયાની અપડેટ્સ પોસ્ટનું ડ્રાફ્ટિંગ ત્રણ-ચાર દિવસ ચાલે છે. જે કંઇ અપડેટ જેવું લાગે તે એક પછી એક ઉમેરવામાં આવે છે, કારણ કે માણસની મેમરી અપગ્રેડેબલ નથી. એ વાત પરથી યાદ આવ્યું કે મારા લેપટોપની રેમ અપગ્રેડ કરવાની છે!

* PG અને ઓફિસમાં લોકો દિવાળી મનાવવા માટે પોત-પોતાનાં ઘરે ગયા છે અને અમે અહીં એકલા-એકલા મિઠાઇઓ ખાઇશું

* ગયા અઠવાડિયાનો રનિંગ કાર્યક્રમ અત્યંત સફળ રહ્યો. વ્યવસ્થિત રીતે ત્રણ 10K (કુલ ૩૧ કિમી), એક 20.4K (એમ તો હાફ મેરેથોનનો પ્લાન હતો, પણ ઓહ ટ્રાફિક!) અને એક 5K દોડ વોક પૂરી કરવામાં આવી (અને મજા આવી!). અમારો રનિંગ પાર્ટનર મિ. મુથુ જોકે ગુરુવારે એના ઘરે ઉપડી ગયો એટલે એકલા દોડવાનું ઠીક-ઠીક રહ્યું. અહીં ADR ગ્રુપ કેટલું મિસ થાય છે એ ખબર પડી ગઇ!!

બેંગ્લોર મિડનાઇટ (હાફ) મેરેથોન માટે રજીસ્ટર કરવામાં આવ્યું છે. રાત્રે ૧૨ વાગે શરુ થશે. એક જ વાતનો ડર છે કે, દોડતા-દોડતા ઝોકું ન આવી જાય બપોરે ઉંઘ લઇ લેવી પડશે અને સાંજે રેડબુલનો ડોઝ.

* દુનિયાનું કોઇ કી-બોર્ડ પરફેક્ટ હોતું નથી. મારા થિંકપેડમાં બે વિચિત્ર કી (ઓ) છે. એ છે, Page Backward, Page Forward અને છે ક્યાં ખબર છે? એરો કી (ઓ) ની જોડે. હવે, એમાં થાય એવું કે ક્યાંક વેબસાઇટમાં ફોર્મ ભરતા હોઇએ તો, એરોની જગ્યાએ ભૂલથી Page Backward દબાઇ જાય તો, બધી મહેનત બાતલ જાય. આજે એવું થયું એનો અફસોસ બે-ત્રણ દિવસ સુધી રહેશે (પેમેન્ટ ભરતાં ભરતાં.. ).

ઉપાય તરીકે છેવટે, તેને Page Up અને Page Down કી (ઓ) બનાવી દેવાઇ. મારી ~/.Xmodmap ફાઇલમાં,

keysym XF86Back = Page_Up
keysym XF86Forward = Page_Down

ઉમેરી દેવામાં આવ્યું. તો શું? દરરોજની માથાકૂટ પૂરી.  ઓકે, કી (ઓ) કરતાં આ કળો શબ્દ સારો!

PS: આવો જ કેપ્સલોકનો અનુભવ.

અપડેટ્સ – ૬૭

* foss.in/2012 નું રજીસ્ટ્રેશન કરાવી દેવામાં આવ્યું છે. ૨૦૦૪ પછી પહેલી વાર ડેલિગેટ કે વિઝિટર બનીને જઇ રહ્યો છું એટલે મજા આવશે. થોડી સ્પિકર રુમની મજાક ગુમાવીશ પણ બધાં મિત્રો ફરી મળશે એનાથી મોટી મજા શું?

.. અને બેંગ્લોર અલ્ટ્રાનો કાર્યક્રમ (લગભગ) પડતો મૂકવામાં આવ્યો છે. હજી એકાદ મહિના સુધી એટલે જ્યાં સુધી ખાવા-પીવાની બરોબર સગવડ ન થાય ત્યાં સુધી લાંબું દોડવું ન જોઇએ એવું લાગે છે. તેમ છતાંય, નિયમિત દોડવાનું તો ચાલુ જ છે. (હમણાં જ ખબર પડી કે અલ્ટ્રાની રજીસ્ટ્રેશન તારીખ લંબાવાઇ છે.. તો કદાચ..). બીજી એક બેંગ્લોર મિડનાઇટ રન છે. લેટ્સ સી.

* શનિવારે ડેબિયન મિત્ર વાસુદેવને ત્યાં ધામા નાખવામાં આવ્યા હતા અને ડેબિયન પર કામ-કાજ, બગ ફિક્સિસ અને વાતચીતનો દોર ચાલ્યો હતો. વચ્ચે સમય કાઢીને અમે જમવા પણ ગયા અહીં આવ્યા પછી પહેલી વાર કેમેરામાં ક્લિક કરવાનો મોકો મળ્યો, પણ કંઇ ખાસ ફોટોસ્ લેવામાં ન આવ્યા. Sankey Tank નો એક રાઉન્ટ વત્તા મલ્લેશ્વરમ વિસ્તારમાં થોડું રખડવામાં આવ્યું. વર્ષો પછી BMTC ની બસોમાં મુસાફરી કરાઇ. એ માટેની પૂર્વ શરત એક જ કે તમને બસ નંબર ખબર હોવી જઇએ નહીતો, ગોતી લ્યા, ગોતી લ્યા (કન્નડમાં ગોતી લ્યા એટલે મને ખબર નથી , થેન્ક્સ ટુ પિનલભાઇ!)

* કવિન અત્યારે ઘરમાં ‘એકહથ્થું’ શાસન ચલાવે છે, એવા સમાચાર મળ્યા છે. પાટાનો લાભ ઉઠાવીને તે ગઇકાલે સોસાયટીની વેશભૂષા સ્પર્ધામાં ‘મમી’ બન્યો હતો

મજાની વાત એ કે ‘મમી’ બનવાનો વિચાર એનો પોતાનો હતો. કદાચ પિરામીડ રન ગેમમાંથી આવ્યો હોય. જે હોય તે, મને બહુ ગર્વ થયો

અપડેટ્સ – ૫૨

* ગઈકાલે ADR June Run હતી (ટેકનિકલી જુલાઈ મહિનો હતો, પણ અમે એને જુન જ ગણીશું ). ૧૫ કિમી (૧૪.૭૯ કિમી – જો એકદમ ચોકસાઈથી ગણો તો), સમય ૧.૪૪ મિનિટ. ૩૦ મિનિટ પછી ડાબા પગમાં સરસ મજાનો દુખાવો થયો અને ગતિ ધીમી રાખી, પણ મજા આવી ગઈ. પછી, સરસ મજાનો બ્રેકફાસ્ટ હવે દર રવિવારે મહિને પહેલો રવિવાર એ ADR રનિંગનો ફિક્સ રાખવામાં આવ્યો છે. કોઈપણ જોડાઈ શકે છે. નોન-મેમ્બર્સ માટે નોમિનલ ફી હોય છે, જે રસ્તે પૂરા પાડવામાં આવતા પાણી, એનર્જી ડ્રિંક્સ અને વ્યવસ્થા વગેરે માટે લેવામાં આવે છે. જો તમારે મેમ્બર બનવું હોય તો, મારો સંપર્ક કરી શકો છો.

અને હા, હૈદરાબાદ હાફ-મેરેથોન મારી પ્રથમ હાફ-મેરેથોન બનશે!

* એક સેકન્ડ કેટલો બધો હાહાકાર મચાવી શકે? લીપ સેકન્ડનું પરાક્રમ.

* ફાઈનલી, એંગ્રી બર્ડ્સની ટી-શર્ટ લેવામાં આવી છે!

PS: આ બ્લોગના વાચકો જાગૃત છે.