મારા વિચારો, મારી ભાષામાં!

અમારી બીજી કોઇ ટૅગલાઇન નથી!

Archive for the ‘લિનક્સ અને ઓપનસોર્સ’ Category

ભૂલાયેલો શોખ: સંગીત

with 9 comments

.. એટલે કે મ્યુઝિક.

મારો આ બાબતમાં ટેસ્ટ એકદમ મસાલા છે. બેબી ડોલ ગીત મને ગમ્યું, ચાર બોટલ વોડકા પણ ગમ્યું. મન્ના ડે ગમે છે અને એક જમાનામાં અમે માઇકલ જેક્સનનાં ચાહક હતા. મારો ટીમ મિત્ર અમીર કહે છે તેમ, “સંગીત કદી ખરાબ હોતું નથી”. આઇપોડ આવ્યા પછી સંગીત સાંભળવાનું ઓછું થયેલું તે રનિંગ પછી ફરી શરુ થયું મુંબઇ આવ્યા પછી સંગીત સાંભળતા દોડવાનું મુશ્કેલ અને ખતરનાક હોવાથી એ પણ બંધ થયું છે. કામના સમયે સંગીત સાંભળવાનું પણ બંધ થયું છે. ફોનમાં પણ ગણ્યાં-ગાંઠ્યા ગીતો રહ્યા છે, તેમ છતાંયે કોઇક વખત સંભળાઇ જાય છે. આ પોસ્ટ યાદ આવી તેનું કારણ જોકે કર્નલ મોડ્યુલ સંગીત છે. નેટકેટ નામના બેન્ડે લિનક્સ કર્નલ મોડ્યુલ તરીકે તેમનું સંગીત રજુ કર્યું છે. જે તમે તેમની ગીટહબ રેપોઝિટોરી પરથી મેળવીને, મોડ્યુલ કમ્પાઇલ કરીને, કમાન્ડ લાઇન પર સાંભળી શકો છો! :)

નેટકેટનું સંગીત

નેટકેટનું સંગીત

કેડીઇ કોન્ફરન્સ ૨૦૧૪: તમારે કેમ જવું જોઇએ?

with 2 comments

* મારી કેડીઇ કોન્ફરન્સ વિશેની છેલ્લે લખેલ પોસ્ટ નો સંદર્ભ લઇને ફરી એ વિશે લખી રહ્યો છું. કેમ? કારણ કે, ગુજરાતને આંગણે આવી કોન્ફરન્સ થતી હોય અને એનો લાભ કોઇને ન મળે તો મને એમને ગુમાવેલ તકનું વધારે દુ:ખ થશે.

મને યાદ છે કે જ્યારે હું કોલેજમાં (૨૦૦૦-૨૦૦૪) હતો ત્યારે લિનક્સ, ઓપનસોર્સ કે કોઇ કોન્ફરન્સ એટલે શું એનું કંઇ જ્ઞાન ન હતું. જ્યારે મુંબઇ આવ્યો અને ઉત્કર્ષ પ્રોજેક્ટમાં જોડાયો ત્યારે લિનક્સ અને ઓપનસોર્સની એક નવી દુનિયા મારી સામે આવી. ત્યારે થયું કે આ જ્ઞાન મને કોલેજમાં મળ્યું હોત તો કેટલાં વર્ષો પહેલાં મેં ઓપનસોર્સમાં યોગદાન આપવાનું શરુ કરી દીધું હોત? કદાચ મારો પ્રોજેક્ટ જુદો હોત, પણ કંઇ વધુ હું કરી શકત. જો તમે અત્યારે કોલેજમાં હોવ અને આવી તક તમને મળતી હોય તો ચોક્કસ ગુમાવવા જેવી નથી જ. અને, હું તો કહું છું કે જો તમે કોલેજનાં ફેકલ્ટી, પ્રોફેસર હોવ તો – આ કોન્ફરન્સ  કે બીજી કોઇપણ ઓપનસોર્સ કોન્ફરન્સ – તમારા માટે છે. કારણ? અહીં તમને દુનિયાભરમાંથી આવેલા વ્યક્તિઓ મળશે જે ડેવલોપર છે, પણ ઓપનસોર્સમાં તેમનાં યોગદાનમાં જુદા પડી આવે છે.  દા.ત. કેડીઇ કોન્ફરન્સની વાત કરીએ તો, નિખિલ મરાઠે, અત્યારે મોઝિલા સાથે કામ કરે છે, જે ગાંધીનગરની DAIICT કોલેજનો જ છે.

અને – સારા માર્ક લાવી, સારા કેમ્પસમાં જવાનું દરેકનું સપનું હોય છે, પણ કંઇક અલગ કરવું છે? તો આવી કોઇ કોન્ફરન્સ તમને માર્ગ ચીંધશે!

કેડીઇ કોન્ફ ૨૦૧૪

with one comment

કેડીઇ કોન્ફરન્સ ૨૦૧૪

* તો હાજર છે, ૨૦૧૪ની કેડીઇ કોન્ફરન્સ, અને એ પણ ફરીથી આપણાં ગુજરાતમાં! ગયા વખતની જેમ જ આ કોન્ફરન્સ ગાંધીનગર ખાતે, DAIICT માં યોજાવાની છે. રજીસ્ટ્રેશન માટે અહીં ક્લિક કરો. આ વખતની કોન્ફરન્સ એકદમ અલગ છે, કારણ કે આ વખતે કેડીઇના જાણીતાં ડેવલોપર્સ પ્રથમ વખત અહીં આવી રહ્યા છે. દુર્ભાગ્યે, આ કોન્ફરન્સ મારી એક બીજી કોન્ફરન્સ સાથે જ છે, એટલે મારાથી આ વખતે પણ આવી શકાય એવું લાગતું નથી, છતાંય અહીં આંટો મારવાનો પૂરતો પ્રયત્ન કરવામાં આવશે. કેડીઇની સાથે-સાથ જો તમને C++ પ્રોગ્રામિંગમાં રસ હોય તો પણ અહીં હાજરી આપવા જેવી ખરી. કેડીઇ એ એકદમ મસ્ત અને વધુમાં કહીએ તો ફ્રેન્ડલી પ્રોજેક્ટ છે. એક વખત જો તમને એમાં રસ પડશે તો પેલા માનવભક્ષી (અહીં કોડભક્ષી એમ સમજવું) વાઘની જેમ તમે લોહી (અહીં કોડ એવું સમજવું) ચાખી જશો :)

ત્યાં મળીશું?

ફોન્ટબુક

with one comment

ફોન્ટબુક

ફોટો આભાર: કોકિલા મિસ્ત્રી

* ઓકે! આ ફોન્ટબુક એટલે શું? ફોન્ટબુક એટલે ભારતીય ભાષાઓનાં ફોન્ટ ડેવલોપર અને ડિઝાઇનર્સ માટેની માર્ગદર્શિકા.

થયું એવું કે છેલ્લાં કેટલાય વર્ષોમાં આપણે કેટલાય નવાં ફોન્ટ્સ ભારતીય ભાષાઓ માટે યુનિકોડમાં જોયા છે. જેમાનાં મોટાભાગના પ્રોફેશનલ ફોન્ટ ડિઝાઇનર્સ દ્વારા બનાવવામાં આવ્યા છે અને અમુક ઓપનસોર્સ ડેવલોપર્સ દ્વારા બનાવવામાં આવ્યા છે. ડિઝાઇનર્સ પાસે યુનિકોડ ફોન્ટ કઇ રીતે બનાવવા (એટલે કે ડિઝાઇન કે કલાની દ્ર્ષ્ટિએ)નું જ્ઞાન હોય પણ, યુનિકોડની અંતર્ગત માહિતી ન હોય તેવું પણ બને અને બીજી બાજુ ઓપનસોર્સ ડેવલોપર્સ (દા.ત. હું) વગેરેને ડિઝાઇન સેન્સ ન હોય (મોટાભાગે!) તે સ્વાભાવિક છે.

આ ખાઇને પૂરવા માટે એક એવા ડોક્યુમેન્ટ કે એવી માર્ગદર્શિકાની જરુર હતી જે આ ખાલી જગ્યા ઉર્ફે ખાઇને ઓછી કરે. દુર્ભાગ્યે, આપણાં ઇન્ડિક ફોન્ટ સીધા-સાદાં નથી. દા.ત. મલયાલમમાં બે પ્રકારની ફોન્ટ સ્ટાઇલ ઉપયોગમાં લેવાય છે (જૂની અને નવી). ગુજરાતીમાં અમુક અક્ષરો ઉપયોગમાં નથી, છતાંય ક્યારેક કે ઉપયોગમાં આવે છે અને ત્યારે ચોક્કસ ફોન્ટ વાપરવા હોવ ત્યારે તકલીફ ઉભી થાય છે. ફોન્ટ ડિઝાઇનર્સને આ બધી બાબતો કોઇ ચોક્કસ એક જગ્યાએથી જાણવા મળે તો આ પ્રશ્ન દૂર થઇ જાય છે (કે સહેલો બને છે).

આ માટે સૌપ્રથમ સંતોષે ગઇસાલથી એક આવી માર્ગદર્શિકા પર કામ કરવાનું શરુ કર્યું અને અમારી છેલ્લી (એટલે કે ૨૦૧૩ની) લેંગ્વેજ સમિટ વખતે આ માર્ગદર્શિકાને એક અલગ પ્રોજેક્ટ તરીકે મૂકવામાં આવી છે. તમે પણ તેમાં તમારો ફાળો આપી શકો છો. આપજો જ! કારણ કે, આ માર્ગદર્શિકા ભવિષ્યમાં એક આખા પુસ્તકનું સ્વરૂપ ધારણ કરે તેવી પૂરેપુરી શક્યતા છે.

આ પ્રોજેક્ટ ગીટહબમાં છે: https://github.com/IndicFontbook/Fontbook ફોર્ક કરો અને મોકલો તમારી પુલ રીકવેસ્ટ!

અત્યારની છેલ્લી PDF તમે અહીંથી ડાઉનલોડ કરી શકો છો: http://thottingal.in/documents/Fontbook.pdf

પુસ્તક: પેંગ્વિન ઊડી શકે છે!

with 7 comments

* વર્ષો પહેલાં ઇ.સ. પૂર્વે એપ્રિલ ૨૦૦૯માં અમારા દ્વારા આ બ્લોગ પર એક સાહસિક પોસ્ટ ‘નવું સાહસ: લિનક્સ વિશે ગુજરાતીમાં પુસ્તક‘ લખવામાં આવી હતી. અને નક્કી હતું તેમ, એના ઉપર જરાય કામ-કાજ થયું નહી. પણ, વિકિમેનિઆમાં કોઇક ચર્ચા દરમિયાન વાત નીકળી કે આવું કોઇક પુસ્તક લખવાનો સૌથી ઉત્તમ રસ્તો છે – સાથે મળીને લખવું. અને, આમ પણ, આ પુસ્તકનો કોઇ વ્યાપારિક હેતુ છે જ નહી એટલે મારે પબ્લિશર જોડે માથાકૂટ કરવાનો સવાલ જ નહોતો.

તો હાજર છે – પેંગ્વિન ઊડી શકે છે! – હવે ગીટહબ પર!

હજી માત્ર કાચી-પાકી રુપરેખા જ લખી છે. સમય મળતાં વધુ વિગતો ઉમેરતો જઇશ. અહીં તમે પણ તમારો ફાળો – જોડણી સુધારો, સંદર્ભો, ટેકનિકલ ખામીઓ – વગેરે આપી શકો છો. ફાળો આપવાનો ઉત્તમ રસ્તો ગીટહબમાં તેને ફોર્ક કરીને પુલ રીકવેસ્ટ મોકલવાનો છે. જ્યારે તમે પુલ રીકવેસ્ટ મોકલો ત્યારે ધ્યાન રાખજો કે ગીટ બ્રાન્ચનો ઉપયોગ કરો જેથી આપણાં ફેરફારો અડફેટે ન ચડે! ફાળો આપવાનો બીજો રસ્તો આ પ્રયત્ન વિશે વધુ માહિતી ફેલાવવાનો છે.

થોડા સમય પછી પુસ્તકને LaTex બંધારણમાં ફેરવવામાં આવશે, જેથી PDF અને ePub જેવા બંધારણો તરત જ શક્ય બનશે – જે હજી શીખવાનું ચાલુ છે.

અપડેટ: જો તમે ગીટહબમાં ફોર્ક કરેલ હોય, અને મારા અપડેટ્સ સાથે અપ-ટુ-ડેટ રહેવા માંગતા હોવ તો નીચેની માહિતી ઉપયોગી થશે (લિનક્સ અને મેક માટે, વિન્ડોઝ – રામ જાને!)

૧. તમારા ફોર્કમાં જાવ,

cd penguin-can-fly

૨. અપસ્ટ્રીમ તરીકે મારી ગીટ રેપોઝિટોરી ઉમેરો,

git remote add upstream git@github.com:kartikm/penguin-can-fly.git

૩. અને પછી, અપડેટ્સ મેળવો,

git fetch upstream

૪. અને, મર્જ કરો:

git merge upstream/master

મર્જ કરતાં પહેલાં જોઇ લો કે કંઇ conflict વગેરે તો નથી ને.

આજની કડીઓ

leave a comment »

* ભારતીય ભાષાઓમાંથી બ્રેઇલ લીપીમાં રુપાંતરણ કરતું સોફ્ટવેર. થેન્ક્સ ટુ નિર્ભિક અને પૂજા. અત્યારે તો દેવનાગરી–>બ્રેઇલમાં પ્રાપ્ત છે. ગુજરાતી ટેસ્ટિંગ માટે હું વોલિયન્ટર બન્યો છું. ટેસ્ટિંગ વગેરે (અને જો પાયથોન ફાવતું હોય તો, કોડ વગેરેમાં પણ!) તમારો ફાળો આપી શકો છો.

જુઓ: https://github.com/pareidolic/bharati-braille

* ક્રાયપ્ટોકેટ, પ્રાયવસીને પ્રાથમિકતા આપતી ચેટ સેવા.

* અને, એક બાત કહેના તો ભૂલ હી ગયા!!

પમી તારીખે એટલે કે ૦૫/૦૫ એ ડેબિયનની નવી આવૃત્તિ રીલીઝ (ie પ્રકટ) થઇ છે. ગેટ ઇટ વ્હાઇલ ઇટ ઇઝ હોટ! એમ તો રીલીઝ પાર્ટી વગેરે રાખવાનો પ્લાન હતો, પણ હજી સુધી ક્યાંય ગોઠવણ થઇ હોય એવા સમાચાર આવ્યા નથી. આમ પણ, હમણાંથી ડેબિયન પર ફોકસ ઓછું થાય છે, જે હવે નજીકના ભવિષ્યમાં વધારવાનો પ્લાન છે. (આવાં કેટલાંય ભવ્ય પ્લાન્સ અમે બનાવેલા છે, જોઇએ હવે મહેલ ઇંટનો બને છે કે પત્તાનો, વ્હુ નૉસ?)

પ્રોગ્રામિંગનો પ – ભાગ ૧

with 7 comments

નોંધ: અહીં ઉપરનો અક્ષર ‘પ’ છે, ‘૫’ નહી.

તમને કદાચ ખ્યાલ હશે કે એક નવું લેપટોપ લેવામાં આવ્યું હતું (વેલ, EMI પર ;)) અને એ લેપટોપનો મૂળ હેતુ એ હતો કે શ્રીમતીજી કે થોડું કોમ્પ્યુટર શીખે અને પ્રોગ્રામિંગ પણ. અમારું લક્ષ્ય એ હતું કે એક વર્ષના સમયગાળામાં નાનકડો પ્રોજેક્ટ કે કોઇ ઓપનસોર્સ પ્રોજેક્ટમાં યોગદાન આપી શકાય એટલું શીખવું. પ પરથી યાદ આવ્યું કે અમે શરુઆત પાયથોનથી કરી. શરુમાં મેં ઘરે Learning Python નામનું પુસ્તક મોકલ્યું, જેનું વજન બહુ હોવાથી તેમાં બે-ત્રણ પ્રકરણથી વધુ આગળ વધી શકાયું નહી (સંદર્ભ માટે સારું, બાકી નવાં-નવાં પ્રોગ્રામરો માટે નહી).

ત્યાર પછી અમે શરુઆત કોડએકેડમી.કોમથી કરી અને શરુઆત સારી ચાલુ રહી છે. હવે, પ્રશ્ન આવ્યો કે કોમ્પ્યુટર અને ડેબિયનમાં નવાં-નવાં લોકોને દૂર બેઠાં સોફ્ટવેર અપડેટ્સ કે કોઇ મુશ્કેલી હોય તો સપોર્ટ કેવી રીતે આપી શકાય કે કંઇ ચર્ચા કરવી હોય તો? અમારી પાસે વિકલ્પો ઘણાં હતાં,

૧. ફોન

૨. સ્કાયપે, ગુગલ હેંગઆઉટ

૩. ચેટિંગ (જીટોક વગેરે)

શરુમાં અમે ફોન અને ચેટિંગથી ચલાવ્યું, પણ છેવટે મારે ssh ની જરુર ઉભી થઇ અને અમારે no-ip.org ની સહાય લેવી પડી. તેમ છતાંય, teamviewer પણ એક સારો અને સરળ ઉપાય છે. વધુમાં ડેબિયન માટે તેનું પેકેજ પણ સરસ છે (તે વાઇનની ઉપર ચાલે છે, એ આખી વાત અલગ છે! અને ઓપનસોર્સ નથી એ બીજી વાત છે).

જો કોઇને ખબર ન હોય તો એક બીજો સરસ ઉપાય ‘ઓપન ઇથરપેડ‘ છે. જેમાં ચેટિંગ વત્તા વ્હાઇટબોર્ડનો સમાવેશ થઇ જાય છે.

અમારા આ સાહસ પર બીજી પોસ્ટ ફરી ક્યારેક!

KDE માટે OPW

with 2 comments

* ફૂલ ફોર્મ કરીએ તો Outreach Program for Women!

પહેલાં Gnome અને હવે પછી KDE એ ઓપનસોર્સમાં સ્ત્રીઓના યોગદાનનો ફાળો વધારવા માટે GSoC જેવો એક કાર્યક્રમ શરુ કર્યો છે. જે સ્ત્રીઓએ પહેલાં ભાગ ન લીધો હોય તેઓ આમાં ભાગ લેવા માટે એપ્લિકેશન કરી શકે છે. જરુરી નથી કે તમને કોડિંગ આવડતું હોય. તમે ભાષાંતર, ડિઝાઇન, મદદ દસ્તાવેજો વગેરેમાં પણ ફાળો આપી શકો છો. GSoC ની જેમ પસંદ થયેલ ઉમેદવારોને ૫૦૦૦ ડોલર વત્તા ૫૦૦ ડોલર મળશે. માત્ર ત્રણ મહિનાનાં કામ માટે આ કંઇ ઓછું ન કહેવાય. વધુમાં, એક વખત ઓપનસોર્સનો સ્વાદ ચાખ્યા પછી આ કાર્યક્રમની અપેક્ષા એ રહે કે તમે કાર્યક્રમ પૂરો થયા પછી પણ તમારું યોગદાન ચાલુ રાખો.

વધુ વિગતો નીચેની કડીઓ પરથી મળી શકશે:

૧. http://mail.kde.org/pipermail/kde-soc/2013-March/000856.html

૨. https://community.kde.org/OutreachProgramForWomen

(મોડે મોડે ખબર પડી કે અત્યારે તો માત્ર ૧ જ જગ્યા છે. પણ, આ વધવાની શક્યતા ખરી!)

ઓપનસોર્સમાં યોગદાન કેવી રીતે આપશો? ભાગ ૨

leave a comment »

ભાગ ૦ અને ભાગ ૧ પછી હવે હાજર છે ભાગ ૨. એટલે કે ભાગ-મ-ભાગ — ઓપનસોર્સ તરફ? :)

વેલ, ટેકનિકલ યોગદાન એ પહેલાં બે હપ્તામાં જોયેલા યોગદાનથી ખાસ અલગ નથી. તમે જો કોડિંગ કરી શકતા હોવ કે પછી ટેકનિકલ સાઉન્ડ હોવ તો, તમે કોઇ પણ પ્રોજેક્ટમાં તમારું યોગદાન આપી શકો છો. ધ્યાન એ રાખવું કે કોમ્યુનિકેશન-કોમ્યુનિટી મુદ્દો અહીં પણ મજબૂત હોવો જરુરી છે. સારું કોડિંગ કરનાર, સારો કોમ્યુનિટી મેમ્બર બને તે જરુરી નથી! નીચે થોડાંક મુદ્દાઓ લખ્યા છે, જે મારા નાનકડાં અનુભવોને આધારે છે. સુધારા-વધારા માટે સૂચનો આવકાર્ય છે. આ સીરીઝની બ્લોગ-પોસ્ટ્સ હું સમયાંતરે અપડેટ્સ કરતો રહીશ.

૧. ધીમી શરુઆત.

ધીરુભાઇ ઝિંદાબાદ. ધીરુભાઇ અમર રહો. (ઓપનસોર્સની) દુનિયા મુઠ્ઠીમાં કરી લેવા માટે હંમેશા ધીમી શરુઆત કરવી. દા.ત. કર્નલમાં યોગદાન આપવું હોય અને કમ્પાઇલ કર્યા વગર એ પ્રકારના પ્રશ્નો તમે સીધાં જ કર્નલનાં મેઇલિંગ લિસ્ટમાં જઇને પૂછો તો, સારા જવાબોની અપેક્ષા (કે આશા – તમને જે ગમે તે) રાખવી નહી. PS: આપણાં ભારતીયો આ પ્રકારના સવાલો કર્નલ મેઇલિંગ લિસ્ટમાં પૂછવા માટે ફેમસ છે (અને બીજી બાજુ હોશિંયાર, હોનહાર કર્નલ ડેવલોપર્સ ભારતમાંથી પણ છે!).

૨. ગીટહબ, બિટબકેટ કે ગિટોરિઅસ.

આ ત્રણ વેબસાઇટ્સ તમારા કોડિંગને દુનિયા સુધી પહોંચાડશે. વત્તા ગીટહબ, બિટબકેટ, ફોર્ક અને પુલ રિકવેસ્ટનાં સરસ ફીચર્સ ધરાવે છે એટલે તમે ગમે તે પ્રોજેક્ટમાં યોગદાન આપી શકશો. એકદમ સરળ અને સુંદર.

૩. રીઇન્વેન્ટિંગ ધ વ્હીલ.

^^ આ ન કરવું. કોલેજમાંથી બહાર પડીએ ત્યારે આપણી ઇચ્છા પોતાની ઓપરેટિંગ સિસ્ટમ બનાવવાની હોય છે. એમ કરવાની જરુર નથી, કારણ કે લિનક્સ કે પહેલેથી ચાલી રહેલા સારાં પ્રોજેક્ટને શ્રેષ્ઠ બનાવીએ એ જ ઘણું છે (આ લખીને તમારી ઇચ્છા પર હું કુહાડો નથી મારતો, પણ કોમ્યુનિટી સાથે જોડાવવું એ નવી કોમ્યુનિટી બનાવવા કરતાં સરળ છે!).

૪. મોટિવેશન.

મોટિવેશન આપવું અને જાળવી રાખવું. અહીં તેની જરુર પડશે!

૫. ઉદાહરણો.

ટેકનિકલ યોગદાન આપવા માટે બેસ્ટ પ્રોજેક્ટ્સ: કેડીઇ (C++, Qt, Python વગેરે), પાયથોન (C, Python), ડેબિયન, (તમને જે કંઇ આવડે તે!), ફાયરફોક્સ (આ પાનું જોવા જેવું છે).  વત્તા, જો તમે તાજેતરમાં થયેલી કેડીઇ કોન્ફરન્સ વિશેની વિવિધ પોસ્ટ્સ વાંચી હોય તો, ઓપનસોર્સમાં ઝંપલાવવાનો ઉત્તમ રસ્તો, કોઇ કોન્ફરન્સમાં જવું અને ત્યાં ડાયરેક્ટ ડેવલોપર્સ જોડે જ્ઞાન મેળવવું.

તો, આ સીરીઝ અહીં પૂરા થાય છે!! સમય મળશે તો આપણે આવાં મુદ્દાઓ ચર્ચતા રહીશું!!

ઓપનસોર્સમાં યોગદાન કેવી રીતે આપશો? ભાગ ૧

with 7 comments

* ભાગ ૦ વાંચવા ને બદલે તમે જો સીધાં અહીં આવ્યા હોવ તો, તે પહેલાં વાંચી લેવા વિનંતી (ઓકે, અત્યારે તો ચાલશે)!

સોફ્ટવેર એન્જિનિયર્સ માટે સામાન્ય રીતે ઓપનસોર્સમાં યોગદાન આપવું સરળ છે, પણ જો કોઇ સોફ્ટવેર એન્જિનિયર્સ ન હોય તો (એટલે કે ટેકનિકલ બેકગ્રાઉન્ડ ન હોય તો)? તો પણ, તમે આ અદ્ભૂત ચળવળમાં તમારું યોગદાન અને યથાશક્તિ ફાળો આપી શકો છો. કેવી રીતે? આપણે તે અહીં જોઇએ.

૧. ગ્રાફિક્સ, ડિઝાઇન, આર્ટવર્ક

કેડીઈ આર્ટવર્ક

જો તમને સારી કલાત્મક દ્રષ્ટિ હોય અને તમે જીમ્પ કે ઇન્કસ્કેપ જેવાં કાર્યક્રમો વાપરી શકતાં હોવ તો, બધાં જ ઓપનસોર્સ પ્રોજેક્ટ તમને આવકારશે. જીમ્પ અને ઇન્કસ્કેપ હવે શીખવા એટલાં અઘરાં નથી અને દરેક ઓપનસોર્સ પ્રોજેક્ટમાં સરસ મજાનાં લોગો, આઇકન્સ કે વિઝ્યુલ ઇફેક્ટ્સ બનાવનારની ખૂબ જ ડિમાન્ડ હોય છે. દા.ત. કેડીઇ ઇન્ડિયાનું આર્ટવર્ક

૨. ફોન્ટ્સ

ફોન્ટ્સ, ખાસ કરીને ભારતીય ભાષાઓમાં ફોન્ટ બનાવનારની ભારે માંગ છે. ગુજરાતી ઓપનસોર્સ ફોન્ટ્સ જેવાં કે, લોહિત, રેખા, આકાર અને કલાપીમાં તમારું યોગદાન આવકાર્ય છે (છેલ્લાં ત્રણ હું સંભાળી રહ્યો છું, એટલે તો ખાસ જરુર છે!!)

૩. ડોક્યુમેન્ટેશન (દસ્તાવેજ, મદદ વગેરે)

કોઇ પણ પ્રોજેક્ટમાં તાતી જરુર મદદ કે ડોક્યુમેન્ટેશન લખવાની હોય છે, કારણ કે આ કામ બોરિંગ છે! બોરિંગની સાથોસાથ એટલું જ મહત્વનું છે. બધાંને ડોક્યુમેન્ટેશન જોઇએ, પણ કોઇ તેને લખવા તૈયાર હોતું નથી એટલે આ પણ ઝડપી લેવા જેવી તક છે, જો તમને આ કામ બોરિંગ ન લાગતું હોય તો! લિનક્સમાં તમે શરુઆત man પાનાંઓથી કરી શકો છો. (આ પાછો બીજો વાઇડ વિષય છે, ફરી ક્યારેક ઊંડાણમાં ઉતરીશું.)

PS: ઢગલાબંધ ડોક્યુમેન્ટેશન.

૪. ભાષા સંબંધિત પ્રોજેક્ટસ (ભાષાંતર, ઇનપુટ મેથ્ડ્સ વગેરે)

ભાષાંતર એટલે કે અનુવાદ – ખાસ કરીને સોફ્ટવેરને ભારતીય ભાષાઓમાં અનુવાદ કરવાં, કરેલો અનુવાદ સુધારવા અને સંભાળવા, ખાસ્સી મહેનત અને માણસોની જરુર છે. લોકો ભલે કહે કે, અંગ્રેજી બધાંને આવડે, પણ આપણે જાણીએ છીએ કે શહેરથી ૧૦ કિલોમીટર દૂર જાવ એટલે અંગ્રેજી  કેટલું લોકપ્રિય છે એ ખબર પડી જાય છે. કોમ્પ્યુટરનો ઉપયોગ સામાન્ય માણસ પોતાની ભાષામાં કરી શકે એ માટે ટેકનિકલ અનુવાદકો જરુરી છે. લગભગ દરેક પ્રોજેક્ટસમાં translator ની જરુરિયાત હોય જ છે. એટલે, ઓલ આર વેલકમ!

થોડાક ઉદાહરણો: ટક્સપેઇન્ટ, ટોર, કેડીઇ, ગ્નોમ, દ્રુપલ, વર્ડપ્રેસ.

ભાષા સંબંધિત બીજાં પ્રોજેક્ટ્સમાં ઇનપુટ મેથ્ડ્સ, ડિક્શનરી, સંબંધિત ટુલ્સ જેવાં કે કી-બોર્ડ લેઆઉટ વગેરે પણ એટલાં જ જરુરી છે. આવા પણ ઘણાં પ્રોજેક્ટસ છે. એમાં તમે નોન-ટેકનિકલ ઇનપુટ્સ જેવાં કે ટેસ્ટિંગ વગેરે આપી શકો છો.

કેટલીક રમતો જેવી કે KGeography કે Ktouch પણ તૈયાર જ છે, તમારી મદદ લેવા માટે!

૫. વિકિપીડિઆ

હા. વિકિપીડિઆમાં તમારું યોગદાન ઓપનસોર્સ-ઓપન કન્ટેન્ટમાં જ ગણાય એટલે ચિંતા નહી. વિકિપીડિઆમાં ટેકનિકલ યોગદાન કઇ રીતે કરવું એ કાલે જોઇશું.

અને છેલ્લે, કંઇ નહી તો,

૬. બગ રીપોર્ટિંગ

એટલે કે કંઇ મુશ્કેલી આવી હોય તો ડેવલોપર્સને જાણ કરો. ઉબુન્ટુમાં તમે લૉન્ચપેડ કે ડેબિયનમાં reportbug જેવાં રેડીમેઇડ ટુલ્સ તૈયાર જ છે. દરેક પ્રોજેક્ટ્સને પોતાનું ‘બગ ટ્રેકર’ હોય છે જે તમે વાપરી શકો છો. જોકે પહેલાં આ જ પ્રકારનો કોઇ બગ હાજર છે કે નહી તેની ખાતરી કરી લેવાથી તમારો અને લોકોનો સમય બચી જશે.

આવતી કાલે (અથવા પરમ દિવસે), ટેકનિકલ યોગદાન કેવી રીતે આપવું એના પર જોઇશું.

ઓપનસોર્સમાં યોગદાન કેવી રીતે આપશો? ભાગ ૦

with 17 comments

* સામાન્ય રીતે આ પ્રકારનાં લેખો તમને અંગ્રેજી કે બીજી ભાષાઓમાં ઢગલાબંધ મળી જશે. એટલે, જો તમે ત્યાં વાંચેલું જ હોય તો, આ પોસ્ટ છોડી શકો છો, તેમ છતાંય આ લેખની ગુણવત્તા વધારવાના પ્રાયોગિક સૂચનો સહર્ષ આવકાર્ય છે.

આ ઓપનસોર્સ છે શું?

ઓપનસોર્સ એટલે કંઇ રહસ્યમય વસ્તુ નથી! ઓપન એટલે ગુજરાતીમાં શબ્દનું ભાષાંતર કરીએ તો ખૂલ્લું અને સોર્સ એટલે સ્ત્રોત કે કોડ. તેમ છતાંય, અહીં ઓપનનો અર્થ ‘મુક્ત’ પર લેવો.

અને આ ફ્રી સોફ્ટવેર શું છે?

તમે ફ્રી સોફ્ટવેર અને ઓપનસોર્સ એમ બે શબ્દો વારંવાર મારા બ્લોગમાં સાંભળ્યા હશે. ફ્રી સોફ્ટવેર એ અલગ પ્રકારની ચળવળ છે. ઓપનસોર્સ સોફ્ટવેર મોટાભાગે વધુ પ્રચલિત શબ્દપ્રયોગ છે, પણ અંતે તો હેમનું હેમ એમ બન્ને શબ્દો એકબીજાં માટે વાપરી શકાય છે (ક્યારેક નહી, પણ તેની વાત પછી ક્યારેક!)

ઓપનસોર્સ સોફ્ટવેરનાં ઉદાહરણો?

સૌથી લોકપ્રિય ઉદાહરણ આપવું હોય તો – લિનક્સ (કે લાઇનક્સ. જેવો જેનો ઉચ્ચાર!). પછીથી, ફાયરફોક્સ, થન્ડરબર્ડ ઇમેલ ક્લાયન્ટ, પિડગિન મેસેન્જર ક્લાયન્ટ, એનડ્રોઇડ (આ અંગે થોડા મતભેદો છે, તેમ છતાંય..) અને ઢગલાબંધ બીજા સોફ્ટવેર.

શરુઆત ક્યાંથી કરવી જોઇએ?

આપણે ત્રણ ભાગમાં શરુઆત કરીએ,

૦. સામાન્ય સમજ અને પરિચય
૧. નોન-ટેકનિકલ યોગદાન.
૨. ટેકનિકલ યોગદાન.

આ પ્રથમ લેખમાં બન્ને માટે સામાન્ય શીખવાની વસ્તુ પર ધ્યાન આપીશું. ધ્યાનમાં રાખજો કે જે ઉદાહરણ હું લઇશ એ ઉદાહરણ તરીકે જ હશે. ઓપનસોર્સનો ફાયદો એ કે એક કામ માટે તમને એકથી વધુ વિકલ્પો મળી રહે છે. હું અહીં એક રસ્તો બતાવીશ. એવું જ કામ કરવાના બીજા હજાર રસ્તાઓ હાજર છે.

અહીં આપણે ત્રણ વસ્તુનો પરિચય કરીશું.

૧. એડિટર (દા.ત. vim), ૨. વર્ઝન કંટ્રોલ સિસ્ટમ (દા.ત. Git), ૩. કોમ્યુનિકેશન અને કોમ્યુનિટી (મેઇલિંગ લિસ્ટ, IRC, બગ ટ્રેકિંગ વગેરે). આપણે ધારી લઇએ કે તમે લિનક્સ વાપરી રહ્યા છો. લિનક્સનો તમારી પાસે ન હોય તો, અત્યારે ડેબિયન, ઉબુન્ટુ, ફેડોરા જેવા કેટલાંય વિકલ્પો તમારી પાસે છે. એક ઉપાય તરીકે તમે virtualbox જેવા સોફ્ટવેર પણ વાપરી શકો છો, પણ સૌથી ઉત્તમ ઉપાય, લિનક્સ જાતે જ ઇન્સ્ટોલ (સ્થાપિત) કરવાનો છે. પણ, એ આ લેખનો સ્કોપ નથી! :) (પણ, તમને ગુગલ સર્ચ કરતાં આવડે તો, તમે ૧૦ મિનિટમાં લિનક્સ તમારા મશીનમાં ઇન્સ્ટોલ કરી શકો છો!)

૧. એડિટર

એડિટર એટલે આપણાં ગુ.સ.ના માનનીય સંપાદકશ્રી નહી, પણ એડિટર એટલે એવો કાર્યક્રમ જે આપણને કોમ્પ્યુટરમાં ટાઇપ કરવા દે. નોટપેડ, વર્ડપેડ થી માંડીને લિનક્સમાં જીએડિટ, ઇમેક્સ કે વિમ એડિટરના ઉદાહરણો છે. તમારે માટે લિનક્સમાં વિમ શીખવાનું સલાહ ભર્યું છે, તેમ છતાંય જીએડિટ, કેટ કે કેરાઇટ પણ ચાલે. આ બધાં એડિટર તમને ગમતી પ્રોગ્રામિંગ ભાષાનું બંધારણ (ie સિનટેક્સ્ટ) હાઇલાઇટ કરે છે. યાદ રાખો કે, તેઓ IDE નથી.

vim શીખવા માટે આ પુસ્તક સરસ છે.

૨. વર્ઝન કંટ્રોલ સિસ્ટમ

એક વર્ઝન કંટ્રોલ સિસ્ટમ કાફી છે. દા.ત. Subversion અથવા Git.

Git માટે જુઓ નીચેની કડીઓ:

૧. Git પુસ્તક

૨. Git બ્રાન્ચિંગ વિશે સરસ માહિતી

૩. Git ખ્યાલો સરળ ભાષામાં

છેલ્લી બે કડીઓ થોડી એડવાન્સ છે, એટલે સીધું જ ત્યાં જંપલાવવું નહી.

૩. કોમ્યુનિકેશન અને કોમ્યુનિટી

૧ અને ૨ – ટેકનિકલ પુલમાં ડૂબકી મારે છે, પણ ઓપનસોર્સમાં સૌથી મોટી વસ્તુ કોમ્યુનિકેશન અને કોમ્યુનિટી છે. ઓપનસોર્સનો અર્થ જ એ કે સાથે મળીને કામ કરવું. લગભગ દરેક ઓપનસોર્સ પ્રોજેક્ટ એક કે વધુ મેઇલિંગ લિસ્ટ, IRC ચેનલ ધરાવે છે, જેને તમે સબસ્ક્રાઇબ કરીને બધી ઇમેલ્સ મેળવી શકો છો. તમારા પ્રશ્નો પૂછી શકો છો અને કોઇ તેનો જવાબ આપશે. જોકે, નીચેની વિગતો ધ્યાનમાં રાખવી.

૧. તમારો સવાલ પૂછતાં પહેલાં જે તે પ્રોજેક્ટનાં FAQs, README કે તેનાં મેન્યુઅલ વાંચી લેવા. નહી તો લોકો તમને કહેશે, RTFM!

૨. તરત જ જવાબની આશા રાખવી નહી. ધીરજના ફળ મીઠાં. કારણ કે, તમારી જેમ લોકો પોતાના ફ્રી સમયમાં પ્રોજેક્ટમાં યોગદાન આપે છે, એટલે તરત જવાબ આપવા કોઇ બંધાયેલું નથી.

૩. નમ્રતા એ સદ્ગુણ છે, એનો ઉપયોગ અહીં વારંવાર કરવો.

ઓકે, આ બધું એક જ પોસ્ટમાં સમજાવવું શક્ય નથી, એ માટે જાત મહેનત જિંદાબાદ કે પછી આપ મૂઆ સ્વર્ગે જવાતું નથી, વગેરે વગેરે કહેવતો યાદ રાખવી અને અહીં કોમેન્ટ્સમાં તમારા સવાલો પૂછતા. બીજો ભાગ કાલે અથવા પરમ દિવસે.

કેડીઇ કોન્ફરન્સ!

with 7 comments

કેડીઇ

* કેડીઇ ઉર્ફે KDE કોન્ફરન્સ, અને એ પણ આપણાં અમદાવાદ (ઓકે, ગાંધીનગરમાં?). હા! ગાંધીનગરની જાણીતી શૈક્ષણિક સંસ્થા DA-IICT ખાતે ૨૩-૨૪ ફેબ્રુઆરીના રોજ KDE Meetup થવાની છે. હવે, તમને થાય કે મારે (એટલે કે તમારે) એમાં શું કરવા જવું જોઇએ?

૧. પહેલું કારણ, ગુજરાતમાં ઓપનસોર્સની કોન્ફરન્સ-મીટ અપ બહુ ઓછી થાય છે. આ એક સુવર્ણ મોકો છે કે તમે ઓપનસોર્સ જોડે ગાઢ પરિચય કરી શકો. ડેવલોપર્સને મળી શકો અને મોટિવેશન મેળવી શકો.

૨. DA-IICT કોલેજ ઢગલાબંધ GSoC સ્ટુડન્ટ્સ ધરાવે છે. જો તમે કોલેજમાં હોવ તો, GSoC પણ તમારા માટે મોટિવેશન બની શકે છે!

૩. જો તમે પહેલેથી ઓપનસોર્સ ડેવલોપર હોવ તો નેટવર્કિંગ માટે તમારા માટે સરસ તક છે. આ કોન્ફરન્સ ડેવલોપર્સ માટે છે, એટલે તમને ન ગમતું માર્કેટિંગ ક્રેપ અહીં જોવા મળશે નહી.

૪. DA-IICT નું કેમ્પસ સરસ છે! ;)

૫. KDE એ awesome છે. હવે awesome નું ગુજરાતી શું થાય? ધાક ઉપજાવનારું, ભયાનક, દારુણ, ભીષણ ;) પણ, ડરતા નહી. KDE એ ખરેખર અંગ્રેજીનું awesome છે!

બદ્નસીબે, ઓફિસનાં એકદમ ટાઇટ ટાઇમ-ટેબલને કારણે અહીં હું હાજરી નહી આપી શકું પણ, કેટલાય મિત્રો અહીં તમને જોવા મળશે. પ્રદિપ્તો, વિશેષ, યશ, શાંતનુ, વગેરે – awesome લોકો છે.

ચૂકતા નહી!

રજીસ્ટ્રેશન અહીં કરાવો. જો તમને રસ હોય કે ના હોય, તો આ બ્લોગ પોસ્ટ બીજાં કોલેજનાં વિદ્યાર્થીઓને પહોંચાડવા વિનંતી.

PS: યશની આ પોસ્ટ વધુ માહિતી આપશે.

foss.in: ૨૦૧૨ અહેવાલ

with one comment

* તો હાજર છે, નાનકડો અહેવાલ ઉર્ફે રીપોર્ટ, foss.in નો.

દિવસ ૧:

આગલા દિવસે ખબર પડી કે PG થી કોન્ફરન્સની સીધી જ બસ છે. વાહ, બીજું શું જોઇએ? સવારે ઇડલી-સંભાર+કોફીનો બ્રેકફાસ્ટ કરીને તરત બસમાં બેઠો અને અડધો કલાકમાં foss.in પહોંચી ગયો ત્યારે લાંબી લાઇનમાં ઉભા રહીને મારું કોન્ફરનસ ટેગ લીધું. ત્યાં પછી વાસુદેવ, અરવિંદ અને પ્રવીણ મળ્યા. સ્વાભાવિક રીતે કુશાલ, કિરણ (જેસ), ગૌરવ, સિધ્ધેશ, વિજય ગુપ્તા અને બીજા કેટલાય લોકો ઘણાં સમયે મળ્યા. આ વખતે લાઇવ સ્ટ્રિમીંગ પણ hasgeek.tv પરથી કરાતું હતું એટલે તમે હોલ-૧ નું જીવંત પ્રસારણ જોઇ શકાતું હતું.

ડેબિયન વાપરતા NIT કાલિકટના કેટલાંક સ્ટુડન્ટ્સને મળ્યો, જે જોઇને મને બહુ મજા આવી. અને, OpenShift વાળાની બોટલ ઓપર આકારની પેનડ્રાઇવ બહુ હીટ રહી. પણ, એક જ મળી એટલે બીજા કોઇને આપી શકાશે નહી ;)

બપોરે લંચમાં ચિંતન અને વિરલ સચદે મળ્યા ત્યારે ગુજરાતીમાં સંવાદો કરવાની મજા આવી. લંચ પછીના સેશન આમ તો ભારે પડે, પણ અમે તો હેકરસ્પેસમાં બેઠા-બેઠા ડેબિયન પર ચર્ચાઓ જ કરી. ઘણાં નવાં લોકોનો પરિચય થયો. સાંજે Gene Koganની હેકરટોક સરસ રહી. પ્રોસેસિંગ અને OpenFramework વડે આર્ટ વત્તા ઓપનસોર્સનો જાદુ જોવા જેવો હતો!

ડિનર માટે ઝૈનાબ, ગૌરવ, કરુણાકર, દેવદાસ અને રામકી જોડે ક્યાંક બહાર જવાનું હતું અને બેંગ્લોરમાં ડિનર માટે દૂર જવું એથી વધુ કષ્ટદાયક કામ એકેય નથી. તેમ છતાંય અમે Koshy’s ખાતે ડિનર નક્કી કર્યું. ઠીક-ઠીક ડિનર ખાધા પછી ક્યાંક આઇસક્રીમ ખાવા ગયા ત્યાં અમે Death By Chocolate પસંદ કર્યો અને ખરેખર એટલી ચોકલેટ ખાધા પછી Death ના થાય તો જ નવાઇ ;)

ત્યાંથી PG પર રીક્ષામાં આવ્યો અને સ્વાભાવિક રીતે રીક્ષાવાળા જોડે સારી એવી મગજમારી થઇ (ના થાય તો જ નવાઇ!).

દિવસ ૨:

બીજા દિવસની શરુઆત અને અંત Ulrich Drepper ની ટોકથી. બન્ને બહુ જોરદાર અને ભારે. મોટાભાગે અમે હેકરસ્પેસમાં જ બેઠા હતા. ડેલિગેટ કીટમાં સરસ મજાનો મગ મળ્યો જે હવે મારી કોફીની જરુરિયાતને સંતોષશે. વૈભવને પણ બે વર્ષ પછી મળ્યો ત્યારે foss.in ની જૂની યાદો તાજી થઇ ગઇ.

બીજા દિવસે અમે મોટાભાગે હેકરસ્પેસમાં જ બેસીને ડેબિયન ઉપર કામ કર્યું (કામ ઓછું, વાતો વધુ ;). systemd પરની ટોક માણી. લંચ સરસ હતું. અને, ખરેખર આ વખતે ત્રણેય દિવસ બહુ ખાધું ;)

ડિનર KDE.in પબ્લિક જોડે. સ્મિત, વિરાંચ, આદિત્ય અને રોહન. પીઝ્ઝા ઝાપટ્યાં વત્તા ટેકનોલોજી, ફિલ્મો અને પુસ્તકોની અખૂટ વાતો.

દિવસ ૩:

ત્રીજા દિવસે અમારું Debian Tutorial આગલા દિવસે રાત્રે નક્કી કર્યા પ્રમાણે છેલ્લી ઘડીએ ઉમેરવામાં આવ્યું. આ પ્રકારના ટ્યુટોરિઅલ તમે રનટાઇમ પર ઉમેરી શકતા હોવ તો એની મજા અલગ છે. બપોર પછી હોવા છતાં ડેબિયન ટ્યુટોરિઅલ રુમ ભરેલો હતો. લગભગ પોણા બે કલાક સુધી સતત અમે ડેબિયન શું છે, તેમાં કેવી રીતે તમે યોગદાન આપી શકો છો અને પેકેજિંગ કેવી રીતે કરવું તેના પર ચર્ચા વત્તા પ્રેક્ટિકલ્સ બતાવ્યું. જોકે ઘણાં મહત્વના મુદ્દાઓ રહી ગયા પણ, બે કલાકમાં તે બધું જ સમજાવવું શક્ય નહોતું (એમ તો બે દિવસ પણ ઓછા પડે પણ, જાત મહેનત ન કરો તો શું કામનું?). પછી, અમે નાનકડી કી-સાઇનિંગ પાર્ટી રાખી. તેજેશનો અહીં પરિચય થયો અને ક્રિપ્ટોપાર્ટી ડિસેમ્બરના અંતમાં રાખવાનું નક્કી થયું છે.

અને, સરસ મજાનું Panel Discussion! લેનાર્ડ પોટ્ટરિંગ હોય એટલે બધાંને મજા જ આવે!

છેલ્લી હેકરટોક અલગ હતી. એ હતી Usability વત્તા મેજીક પર. મજા આવી, પણ પછી ત્યારબાદના રોક-શોમાં હું ન રોકાયો. કારણ? મને એમ કે હવે મારે મારી ફ્લાઇટ પકડી ઘરે જવાનું છે. હું ભૂલી ગયો હતો કે હું તો બેંગ્લોરમાં જ છું. ઓહ. હોમ સિકનેસ અને હું તરત પાછો PGમાં આવી ગયો. કોઇને ગુડ-બાય કહેવાનું રહી ગયું હોય તો – sorry!

ફોસ.ઇન ૨૦૧૨ના ફોટાઓ.

ફોસ.ઇન ૨૦૧૨ના મોબાઇલ વડે પાડેલા ફોટાઓ.

foss.in: ઐતહાસિક અહેવાલો ૨

leave a comment »

બીજો ભાગ હાજર જ છે.

* ૨૦૦૬:

૨૦૦૬ની મુલાકાત વિશેષ રહી. કારણ? કારણ કે હું અને કોકી – ie સહપરિવાર ગયેલા. થેન્ક્સ ટુ, foss.in ટીમ કે જેમણે મારી સાથે કોકીની હોટલની એરેજમેન્ટ કરી આપેલી (એટલે કે જોડે જ, કેવી વાત કરો છો?). અને, બીજી સરસ વાત કે આ વખતે હું પહેલી વાર ડેબિયન પર ટોક આપવાનો હતો. મારો વિષય હતો: “હાઉ ટુ બીકમ થર્ડ ઇન્ડિયન ડેબિયન ડેવલોપર?” વેલ, હું થર્ડ ડીડી ના બન્યો પણ સાતમો બન્યો ખરો! મારી ટોક સારી રહી અને સારા એવા સવાલો મને પૂછાયા અને મેં સારા એવા જવાબો પણ આપ્યા! આ વખતે પણ ઘણાં લોકોનો પરિચય થયો. કપિલ, જ્હોન (jewel) – આ બે ડેબિયન ડેવલોપર્સ ત્યાં હાજર હતા. બાકી, અમારી રેગ્યુલર કોમ્યુનિટી તો ખરી જ. પ્રૂફ? આ ફોટો ;)

અને, મારો અને કોકીનો અત્યાર સુધીનો બેસ્ટ ફેમિલી ફોટો આ ઇવેન્ટમાં જ લેવાયેલો. મારી ફેસબુક પ્રોફાઇલ પર તે જોવા મળી શકશે.

* ૨૦૦૭:

આ વખતે પણ ઇવેન્ટ હતી ખાસ-મ-ખાસ કારણ કે અમે ડેબિયન-ઉબુન્ટુ પ્રોજેક્ટ ડે નું આયોજન કર્યું હતું, જ્યાં સળંગ આખો દિવસ ડેબિયન પર ટોક-વર્ક શોપ થવાની હતી. ધાર્યા કરતાં ઓછાં લોકો આવ્યા, પણ આ વખતે ડેબિયન પ્રોજેક્ટ લીડર (એ સમયના) – સામ હોસેવર અને ક્રિસ્ટિઅન પેરીઅર (ડેબિયન i18n ગુરુ) ત્યાં આવેલા. એમની જોડે ઘણું નવું શીખવા મળ્યું વત્તા અંકિતની જગ્યાએ ફાયરફોક્સ-મોઝિલા લોકલાઇઝેશનની ટોક પણ આપી. અમારા પ્રોજેક્ટ ડે માં સન માઇક્રોસિસ્ટમનો એક માર્કેટિંગ વાળો ઘુસી ગયેલો જે સોનાની થાળીમાં ગોબા જેવું થયેલું, પણ ઓવરઓલ અમારો પ્રોજેક્ટ ડે સરસ ગયેલો.

આ ખાસ ઇવેન્ટ એટલા માટે પણ હતી કે મારો એક જોબ ઇન્ટરવ્યુ IISC ની સીડીઓ પર બેસીને થયેલો (અને પછી હું બેંગ્લોર ગયેલો.. ડોન્ટ રીમાઇન્ડ મી ધેટ!) તો બીજી બાજુ જૂની જોબમાંથી હેન્ડઓવર કરવાનું ભયંકર પ્રેશર પણ હતું.

PS: ક્રિસ્ટિઅન પેરીઅરનો રીપોર્ટ

* ૨૦૦૮:

વેલ, ૨૦૦૮માં હું foss.in માં નહોતો ગયેલો ;) કારણ? લૉ હેંગિગ ફ્રુટ્સ.

ધેટ્સ ઓલ. ૨૦૦૯ કંઇ ઐતહાસિક ન કહેવાય એટલે તેના વિશે ખાસ લખતો નથી. ૨૦૧૨ નો અહેવાલ રવિવારે કે સોમવારે આપવામાં આવશે.

foss.in: ઐતહાસિક અહેવાલો ૧

leave a comment »

* ૨૦૧૦માં foss.in ચૂકી જવાયા પછી અને ૨૦૧૧માં આયોજન ન થવાથી, ૨૦૧૨ની foss.in મુલાકાત ખાસ બની રહેશે એવું લાગે છે. મારા માટે ખાસ એટલે કે ૨૦૦૪ પછી પહેલી વાર એક ‘સામાન્ય મુલાકાતી’ની જેમ જવાનું થશે. ૨૦૦૫, ૨૦૦૬, ૨૦૦૭ અને ૨૦૦૯ – આ વર્ષો દરમિયાન હું ‘સ્પિકર’ હતો. ૨૦૦૪માં હું અને કુનાલ સાથે ગયેલા ત્યારે ઇવેન્ટનું નામ Linux Bangalore હતું. મારો લિનક્સ, ફ્રી સોફ્ટવેર-ઓપનસોર્સ સાથેનો સંબંધ foss.in ને કારણે જ ગાઢ થયો એમ કહી શકાય. અને, લાગે છે કે આ પોસ્ટ બહુ મોટ્ટી થશે, કારણ કે મારો વિચાર ૨૦૦૪ થી ૨૦૦૭ ના અનુભવો લખવાનો છે. એ સમયે આ બ્લોગ નહોતો (૨૦૦૬માં હતો, પણ કોણ જાણે કેમ, મેં આ વિશે કંઇ પોસ્ટ ન કરેલું! ૨૦૦૭માં ખાલી પોસ્ટ જ અને ૨૦૦૮માં તો અલગ કારણોસર મુલાકાત ન લઇ શકાઇ). તો શરુ કરીએ ૨૦૦૪ થી?

૨૦૦૪:

૨૦૦૪, હમમ. ૨૦૦૪ એટલે કે મુંબઇનો શરુઆતી સમય. (જોકે હું તો મુંબઇમાં છેક જાન્યુઆરી એન્ડ થી હતો જ.) નિરવ ટૉક આપવાનો હતો અને અમારી પાસે એવું કંઇ હતું નહી એટલે અમે ખાલી એટેન્ડ કરવાના હતા. કુનાલ જોડે થોડા સમય પહેલાં પરિચય થયેલો અને સરખી વિચારસરણીને કારણે પરિચય મિત્રતામાં પરિણમ્યો. તેણે બેંગ્લોર જોયેલું હતું એટલે અમે બન્નેએ ટ્રેન-હોટેલ ટિકિટ જોડે બુક કરાવેલી. ૨૨ કલાકની સરસ મુસાફરી પછી અમે મેજેસ્ટિક પાસે કોઇક હોટલમાં રહેલા એવું યાદ છે. એ વખતે Linux Bangalore એ IISC ખાતે હતી અને પ્રમાણમાં નજીક જગ્યા હતી એટલે આવવા-જવાનો વાંધો નહોતો આવતો.

ત્રણ દિવસ દરમિયાન બહુ મજા આવી. કોન્ફરન્સ તો માણી વત્તા બેંગ્લોરમાંય ફર્યા. સાયન્સ મ્યુઝિયમ અને કબન પાર્ક વગેરે. ફોટાઓ પડ્યા છે, પણ ક્યાં છે એ યાદ નથી. ૨૦૦૪ની ખાસ યાદો કહેવી હોય તો, એમ.જી. રોડ પરથી ખરીદેલું એક મેગેજીન જેમાં ડેબિયનની સીડી આવેલી. જેના વડે મેં ઘરે પહેલી વાર ડેબિયન ઇન્સ્ટોલ કરેલું અને પછીની ઘટનાઓ-દુર્ઘટનાઓનાં તમે સાક્ષી છો જ. ૨૦૦૪માં પહેલી વખત મયંક-શશાંક શર્માને મળેલો એ પણ એક યાદગાર ક્ષણ હતી.

સૌથી ભયંકર યાદ હોય તો પહેલી વાર વિમાની મુસાફરી કરવાની. એ વખતે ઉડતી હતી તે સહારા એરલાઇન્સમાં પંખા વાળા વિમાનમાં પંખાની બાજુમાં મારી વિન્ડો સીટ હતી. વેલ, માત્ર નિરવ જ સમજી શકે છે કે સિવાય મને બીજી કઇ બીક હતી :)

PS: એ વખતની અંગ્રેજી બ્લોગની પોસ્ટ

૨૦૦૫:

૨૦૦૪ અને ૨૦૦૫ વચ્ચે મારું ઇવોલ્યુશન થોડું થયું અને મેં મોનો અને લોકલાઇઝેશન એવા વિષય પર ટોક આપેલી. સ્વાભાવિક રીતે નિરવે પ્રેઝન્ટેશન વત્તા કન્સ્પટમાં સારી એવી મદદ કરેલી. ઇવેન્ટ આ વખતે બેંગ્લોર પેલેસ ગ્રાઉન્ડમાં હતી. મોટા-મોટા હોલ બનાવેલા. આ ઇવેન્ટ મારા માટે ખાસ હતી કારણકે, જલધર વ્યાસ અમેરિકાથી ડેબિયનની ટોક માટે આવેલા અને સ્પિકર તરીકે મને ખાસ ટ્રીટમેન્ટ મળેલી. આ વખતે રોક શો વગેરે પણ ખાસ આકર્ષણ હતા. ૨૦૦૫માં પણ અમે દરેક રાતે ડિનર માટે અલગ-અલગ જગ્યાએ ગયેલા એમાં વિન્ડસર પબ ખાસ યાદ છે.

૨૦૦૫માં ખબર પડી કે લોકો સામે પ્રેઝન્ટેશન આપવું એ કેટલું અઘરું છે (જોકે મારી ટોકમાં ખાસ કોઇ પબ્લિક નહોતી એ સારી વાત હતી!). ઘણું શીખવા મળ્યું. કેટલાય નવાં લોકોનો પરિચય થયો અને નવાં મિત્રો બન્યા. ૨૦૦૫ની મુસાફરી સરળ રહી, કારણ કે સ્પિકર હોવાના નાતે બન્ને વખતહવાઇ મુસાફરી કરવા મળેલી. એ વખતે નવું-નવું હતું એટલે બહુ મજા આવેલી.

PS: ૨૦૦૫ની અંગ્રેજી પોસ્ટ્સ: , , અને .

PS 2: અરર, હું આવું ગંદુ અંગ્રેજી ધરાવતો હતો? (હજી પણ ધરાવું છું. ડોન્ટ વરી ;)).

૨૦૦૬-૨૦૦૭-૨૦૦૮ હવે પછીનાં ભાગ-૨ માં.

Follow

Get every new post delivered to your Inbox.

Join 2,372 other followers