મારા વિચારો, મારી ભાષામાં!

અમારી બીજી કોઇ ટૅગલાઇન નથી!

Posts Tagged ‘વેકેશન

અપડેટ્સ-૧૩૭

with 4 comments

* ગઇકાલે અર્નવને મળ્યો અને વાતો કરવાની અને ગપ્પાં મારવાની મજા આવી ગઇ. તેને અમેરિકન ડ્રીમ માટે અભિનંદન અને શુભેચ્છાઓ.

* કવિન અઠવાડિયાંનું વેકેશન માણીને ઘરે પાછો આવી ગયો છે. ડ્રોઇંગ રુમ અસ્ત-વ્યસ્ત થઇ ગયો છે. કાર્ટૂનના અવાજો આવવા લાગ્યા છે. તેને ગિફ્ટમાં મળેલું હેલિકોપ્ટર અમે ઉડાવ્યું પણ એ એવું પટકાયું કે પછી થયું કે એ માત્ર રેતી વાળી જમીન પરથી ઉડાવવું જ સારું રહેશે. એટલે, રવિવારે ક્યાંક જવામાં આવશે.

* મારી ડ્યુઆથલોન તૈયારી ચાલી રહી છે. સાયકલ હજી સર્વિસમાં છે. આજે સાંજે સાયકલનો ફરી એક ટેસ્ટ કરવામાં આવશે. બાકી તૈયારીમાં તો ખાસ કશું છે જ નહી. (હા, જોડે એર પંપ, સ્પેર ટ્યુબ, ટી-શર્ટ, મોજાં, હેલ્મેટ, લાઇટ્સ, ખજૂર-કેળાં, બિસ્કિટ, પાણી, વોલિની સ્પ્રે, પંકચર કીટ, એલન કીનો પોર્ટેબલ સેટ, સ્વિસ આર્મી નાઇફ, હેન્ડ સેનિટાઇઝર, ગ્લોવ્સ, એકસ્ટ્રા ચડ્ડી, ઘડિયાળ, હાર્ટ રેટ બેલ્ટ, પૈસા, વોલેટ, મોબાઇલ, સાઇકલનું તાળું-ચાવી, ચોકલેટ-પીપર, પેન-નોટપેડ પણ લેવામાં આવશે ;)) રસ્તાનો અભ્યાસ કર્યો છે, પણ જોડે તેનું GPX વર્ઝન લેવામાં આવ્યું છે. સ્ટાર્ટિંગ પોઇંટ પર પહોંચવા માટે જ મારે થોડી મહેનત કરવી પડશે એ વિચારથી જ મને ટેન્શન થઇ રહ્યું છે. જો એક વળાંક ખોટો લીધો તો સીધો ૧૦ થી ૧૨ કિલોમીટરનો ફટકો છે! :O

* માત્ર જ ચાર દિવસ (શનિ-રવિ સાથે!) વેકેશન લીધું છે, તો આ દિવસોમાં શું કરવું એ પ્રશ્ન છે. તેમાંથી ૧૧x૧૧ કલાક તો મુસાફરીમાં જશે. એટલે, હવે મોટા વેકેશનની જરુર વર્તાય રહી છે.

* બાકી શાંતિ જ છે. હવે, કેસર કેરીઓની રાહ જોવાય છે.

છેલ્લી અપડેટ એટલે કે અપડેટ્સ – ૧૧૮

with 2 comments

* લ્યો ત્યારે, છેલ્લી અપડેટ્સનો લ્હાવો લો.

* છેલ્લાં થોડાં દિવસોથી અત્યંત વ્યસ્ત છું. પ્લાન કે અપ્લાનમાં લખ્યા મુજબ કોઇ ધાર્યુ કાર્ય થયું નથી એટલે એકાદ બંગાળી તાંત્રિકબાબાની પાસે નવાં વર્ષમાં મુલાકાત લેવામાં આવશે તેવો પ્લાન છે.

* કવિન અત્યારે તેનું વેકેશન ભરપૂર માણી રહ્યો છે. ક્રિસમસનું વેકેશન અહીં સામાન્ય છે, અને સરવાળે મને તો સમયનો બગાડ લાગે છે, કારણ કે એટલી રજાઓ દિવાળીમાં ઓછી થઇ જાય છે વત્તા ઉત્તરાયણ યોગ્ય રીતે માણવા મળતી નથી (પછીનાં અને આગલાં દિવસોમાં પરીક્ષાઓ છે એવું જાણવા મળ્યું છે!)

* ચિરાગભાઇની ચાણક્ય મંત્ર મંગાવવામાં આવી છે અને તેની રાહ જોવાઇ રહી છે.

તો, ૨૦૧૪નાં નિર્ણયોથી આ પોસ્ટનો અંત લાવીએ?

૧. કોઇ પ્લાન ન કરવો. પ્લાનનો પણ પ્લાન ન કરવો.

૨. બોલીવૂડ મુવીઓ ન જોવાં.

૩. બ્લોગ પર વધુ ધ્યાન આપવું.

૪. કેટલાંક પ્રોજેક્ટ્સ પડતાં મૂકવાં. ફોકસ.

૫. ફોક્સ જેવાં લોકોથી દૂર રહેવું કે પછી કંટાળીને જાતે જ ફોક્સ બનવું.

૬. કંઇક નવું શીખવાને બદલે, જે છે તેના પર વધુ ધ્યાન આપવું.

૭. દોડવાનું-સાયકલિંગ ચાલુ રાખવું. તેનાં અલગ ધ્યેયો છે, જે પછી ક્યારેક.

૮. વિશલિસ્ટ અપડેટ કરવું!!

તો, હેપ્પી નવું વર્ષ. આવતાં વર્ષે મળીશું.

એ આવ્યા અમે પાછાં!

with 6 comments

* સૌ પ્રથમ સૌને હેપ્પી ન્યૂ યર એટલે કે સાલ મુબારક! એક અઠવાડિયાનાં વિરામ (અને થાક) પછી અમે પાછાં સહપરિવાર સુખેથી આવી ગયા છીએ. ઘરમાં વંદાઓનું રાજ પણ ખતમ કરી દેવામાં આવ્યું છે. પ્લમ્બર પણ આવીને ગયો, સવાર-સવારમાં દૂધવાળાએ રામાયણ કરી પણ એ સ્ટોરી બીજી પોસ્ટમાં.

એકંદરે વેકેશન સરસ ગયું. નવાં લીધેલાં P&S નો ભરપૂર ઉપયોગ કરવામાં આવ્યો છે. કોકીએ તેનાં ફેસબુકમાં એ ફોટાઓ અપલોડ કર્યા છે. ઔપચારિકતા ખાતર (અને લોકોને બતાવવા કે મને તરતાં નહી પણ તરવા જેવું કંઇક આવડે છે) અહીં એક ફોટો મૂકી રહ્યો છું ;) વધુમાં મારું રનિંગ પણ સારું ચાલ્યું કહેવાય (૨૫ કિલોમીટરની એક ઇન્ટર-વિલેજ દોડ અને ૯.૫ કિમીની હિલ રન).

તરતો કાર્તિક મિસ્ત્રી

તરલ પદાર્થની જેમ તરતો હું

હવે, આખો નવેમ્બર મહિનો બીઝી-બીઝી છું. પોસ્ટની આવૃત્તિ છેલ્લાં મહિનાની જેમ ઓછી જ રહેશે, તેમ છતાંય ડ્રાફ્ટમાં ફિલમોની બે-ત્રણ પોસ્ટ્સ પેન્ડિંગ છે અને વેકેશનની પણ એકાદ પોસ્ટ થવાની શક્યતા છે.

અને હા, વેકેશનનો એક જ વાક્યમાં સાર કહેવો હોય તો, કવિનને જલસા પડી ગયા. બીજું કંઇ કહેવાની જરુર છે? :)

અપડેટ્સ – ૧૧૦

leave a comment »

* યેય, દિવાળી વેકેશન પડી ગયું છે, એટલે આ બ્લોગ પણ વેકેશન-મોડમાં જશે. આમ પણ, છેલ્લાં કેટલાંય સમયથી મૂર્છિત અવસ્થામાં જ છે, એટલે કોઇને ખાસ ગેરહાજરી વર્તાશે નહી. કવિન જ્યારે આજે સ્કૂલથી આવ્યો ત્યારે બૂમો પાડતો-પાડતો આવ્યો કે વેકેશન પડી ગયું છે! આવો આનંદ હવે મને મળતો નથી એનું દુ:ખ છે. વેકેશન છે છતાંય લેપટોપ અને ઢગલાબંધ ઇલેક્ટ્રોનિક્સ કચરો જોડે લઇ જવાનું છોડી શકાતું નથી.

* રવિવારે વસઇ-વિરાર હાફ-મેરેથોન ઠીક-ઠાક સમયમાં પૂરી કરવામાં આવી (સમય: ૨.૩૨.૪૨ નંબર: ૧૨૬૭). મજાની વાત એ હતી કે આ મેરેથોન નગરપાલિકા દ્વારા સ્પોન્સર હતી એટલે રસ્તાની બન્ને બાજુએ લગભગ બધી જગ્યાએ વિવિધ સ્કૂલનાં છોકરાંઓ અમને ઉત્સાહિત કરતા હતા. લેઝિમ, ડ્રમ બેન્ડ અને ડી.જે. લોકો પણ યોગ્ય રીતે પાણી વગેરે પૂરા પાડતા જોયા પછી વસઇ-વિરારને બેસ્ટ સપોર્ટેડ મેરેથોનનો ખિતાબ મુંબઇ મેરેથોનમાંથી છીનવીને આપવામાં આવે છે. હા, થોડાંક લોચા હતા, પણ ઓર્ગેનાઇઝર વગેરેએ ફીડબેક પોઝિટીવ લીધો હોવાનાં અહેવાલો છે. જો તમે મુબંઇમાં હોવ તો, મસ્ટ રન મેરેથોન!

* સાયકલમાં ફરીથી ટાયર પંકચર, જેથી આ અઠવાડિયાનું સાયકલિંગ ખોરવાઇ ગયું છે. હવે વેકેશન પછી તેને પણ યોગ્ય ન્યાય અપાશે. એટલિસ્ટ, મુંબઇ મેરેથોન પહેલાં એકાદ ૧૦૦ કિમીની રાઇડ થઇ જાય તેવું આયોજન ચાલે છે. (જોકે મારા આયોજનો આયોજન પંચ કરતાં બહુ સારા હોતા નથી).

* એકાદ દિવસ અમદાવાદનો પ્લાન છે, પણ ત્યાં ડેન્ટલ ટ્રીટમેન્ટ ડોકિયાં કરે છે, એટલે કોઇને મળવાનો સમય મળે તેમ લાગતો નથી. પેલા ડેકાલથોન સ્ટોરમાં પણ આંટો મારવાની ઇચ્છા સાઇડ પર મૂકવી પડે તેમ છે. તેમ છતાંય ADRians જોડે દોડવાનો મોકો ગુમાવવાનો નથી ;)

* અને છેલ્લે, આ ત્રીજા મોરચાનું સરકસ જોઇને હસવું કે રડવું તે સમજાતું નથી. બંદરોનો નાચ, દેશને સો ટકા મોંઘો પડવાનો છે.

અપડેટ્સ – ૧૦૮

leave a comment »

* આ ૧૦૮ સેવા અંગેની અપડેટ્સ નથી એની નોંધ લેવા વિનંતી.

* કેટલાય સમયથી અપડેટ્સની પોસ્ટ લખાઇ નથી. અને, બ્લોગ પોસ્ટ પણ આજ-કાલ અત્યંત અનિયમિત બનતી જાય છે. કારણ? કિટાણું. (વર્ક કિટાણું એમ વાંચવું).

* સારા અપડેટ્સમાં જોઇએ તો ગઇકાલે જ NCPA<–>મેલા સિગ્નલ (૧૮.૫ કિમી) સુધીનું સરસ દોડવામાં આવ્યું. ત્યારબાદ પગનાં તળિયાનું સ્કેન કરીને મારા માટે કયા શૂઝ સારા તેની માહિતી મને ASICS વાળાઓએ આપી, જે તેમના માર્કેટિંગનો ભાગ હતો એવું લાગ્યું, તેમ છતાંય તેના શૂઝ એકંદરે સારા હોય છે (થોડાંક સસ્તાં પણ). સાંજે બહાર જવાનો કાર્યક્રમ હતો, જે મને ખબર હતી તેમ બાકી-કામના કારણે થોડા અસ્ત-વ્યસ્ત થયો, વચ્ચે નિરવ-વિનયને મળી લેવાયું એટલે કામનું ટેન્શન ઓછું થયું, છેવટે SOS કોલ આવ્યો ત્યારે ફરી લેપટોપ લઇને બેસવું પડ્યું, જે બહાર જવાના કાર્યક્રમમાં લેપટોપ જોડે લઇ જવા સુધી ખેંચાયું (અને રાત્રે મોડા સુધી પણ!). છેવટે, આલ ઇઝ વેલ :)

* કવિનને અત્યારે પરીક્ષાઓ ચાલી રહી છે, તેમ છતાંય તેની મસ્તી એમની એમજ છે. સારી વાત છે!

* વેકેશનની જે થવાની હતી એ ટિકિટ કન્ફર્મ થઇ નથી, પણ બીજી બેકઅપ ટિકિટ્સ લઇ લેવામાં આવી છે, જે એકદમ વિચિત્ર સમયની હોવા છતાં, બીજો કોઇ વિકલ્પ નથી (હાલ પૂરતો).

* દિવાળીનું (મારું) શોપિંગ? થઇ ગયું છે: પાણીની નવી બોટલ, સાયકલ માટે મોબાઇલનું સ્ટેન્ડ વગેરે!

જ્યારે અમે નાના હતાં – વેકેશન

with 4 comments

* અત્યારે કવિનનું વેકેશન ચાલી રહ્યું છે, અને સમગ્ર વેકેશન દરમિયાન તેણે રખડી ખાવા સિવાય કંઇ કામ કર્યું લાગતું નથી (મોસ્ટ હેપનિંગ-એક્સાઇટિંગ  એક્ટિવિટી: શેરીનાં કૂતરાંઓને પથ્થર મારવા. તા.ક. કોઇ ઝોલાંધારી શ્વાનપ્રેમી એક્ટિવિસ્ટે પગલાં લેવા નહીં, નહીતર તેમને પણ પથ્થર ખાવાના આવી શકે છે!). અને, મેં મારી જાતને કવિનને સલાહો આપતો સાંભળ્યા પછી યાદ આવ્યું કે અમે વેકેશનમાં શું કરતાં હતાં? આ જ. રખડી ખાવાનું.

છેલ્લું પેપર ક્યારે પતે એના ઉત્સાહમાં હું ઘણીવાર છેલ્લા પેપરમાં ભોપાળું-ધબડકો વાળીને આવતો. (હા, કોલેજમાં પણ મારે હંમેશા છેલ્લાં પેપરમાં ઓછા માર્ક્સ જ હોય.) વેકેશન શરુ થાય એના પહેલાં ભવ્ય પ્લાન્સ બનાવ્યા હોય કે આમ કરીશું ને તેમ કરીશું. શરુઆતમાં તો બહુ ઉત્સાહથી કંઇક નવી પ્રવૃત્તિ કરવામાં આવે અને પછી ધીમે-ધીમે આખું વેકેશન કારણ વગરના રખડવામાં પસાર ક્યારે થઇ જાય એની ખબર ન પડે. મોટાભાગનું વેકેશન જોકે મામાનાં ઘરે કે બાનાં (નાની) ઘરે જ વીતાવવામાં આવતું. મને યાદ છે ત્યાં સુધી વેકેશનમાં હું ક્યાંય ફરવા ગયો નથી (સિવાય કે આજુ-બાજુ નાનકડી ટ્રીપ્સ).

હા, વેકેશન એના માટે તો હોય જ છે. કવિનને કોઇ જ પ્રકારના ક્લાસિસમાં એની મરજી વગર મૂકવાનો ઇરાદો નથી. એ અત્યારે એના વેકેશનનું છેલ્લું અઠવાડિયું મસ્તીથી કાઢી રહ્યો છે. દા.ત. કાલે પહેલાં વરસાદમાં નહાવાનું :)

અને હવે, ઉનાળું-દિવાળી વેકેશન મળતું જ નથી :( (એટલે કે, લેવું પડે છે!)

અપડેટ્સ – ૪૨

with 9 comments

* લોંગ પેન્ડિંગ કામ પૂરા કરવાનું અઠવાડિયું – નવા ચશ્મા (આનંદની વાત, નંબર ઓછાં થયાં!!), પાન સિંગ તોમર, બેટર હાફ (સીડી), અને સ્ટિવ જોબ્સની ઓફિશિઅલ બાયોગ્રાફી. જોકે એક-બે ચેપ્ટર પરથી મને ભાષાંતરમાં મજા ના આવી. પૂરી વાંચ્યા પછી, એક રીવ્યુ પોસ્ટ પાક્કી.

* જ્યારે પણ વેકેશનનો મૂડ હોય ત્યારે જ ભયંકર કામ આવી પડે છે – આવું કેમ? ;)

* હવે દરરોજ અડધો કલાક, ફરજિયાત વાંચન અને, અડધો કલાક કંઈક નવું શીખવામાં ગાળવો એમ નક્કી કર્યું છે, જોઈએ છીએ ક્યાં સુધી ચાલે છે, આ વસ્તુઓ. એમાંથી પહેલો અડધો કલાક કોમ્પ્યુટર બંધ રાખવાનું પણ નક્કી કર્યું છે, જે મુશ્કેલી ભર્યું છે. બાકી અત્યારે coursera.org ના cs101 ક્લાસ પણ ચાલુ કર્યા છે. જો તમને રસ હોય તો સ્ટેનફોર્ડ અને બીજી યુનિવર્સિટીઓ ઓનલાઈન કોર્સ ચલાવે છે. (સર્ટિફિકેટ વગેરે મળશે નહી, એટલે શીખવાની ઈચ્છા હોય તો જ જોડાવું. બાકી એસાઈન્મેન્ટ, ક્લાસવર્ક બધું નિયમિત કોલેજ જેવું જ!).

* વિકિએકેડમી સફળતાપૂર્વક સંપન્ન થઈ. વધુ વિગતો માટે, દિવ્ય ભાસ્કરનો આ લેખ જોવો. જોકે લેખ લખનારે લોચા તો માર્યા જ છે.

* કવિનની સાયકલના સાઈડ ટાયર્સ કાઢી નાખવામાં આવ્યા છે, કારણ કે એને હવે ટુ-વ્હીલર્સની સાયકલની જીદ પકડી છે. હવે દરરોજ મારે તેની પાછળ દોડવાનું પાક્કું (પેલું દોડવાનું તો એકસ્ટ્રા ગણાશે ;))

અપડેટ્સ – ૩૯

with 2 comments

* દર્દ-એ-દાંત. કારણ? કીટાણું? ના, તદ્ન બેદરકારી. એક જરા સી સાવધાની રાખી હોત તો.. ખેર, જે થવાનું હતું તે થઈ ગયું. છેવટે દાંત કઢાવવા પડ્યા અને સ્ક્રૂ વડે નવા દાંત ફીટ કરવામાં આવશે. એકંદરે પ્રક્રિયા શાંતિથી પતી ગઈ પણ હજી દુખાવો છે, જીંદગીમાં ક્યારેય ન લીધી હોય એટલી પેઈનકિલર લઈ રહ્યો છું. એટલે દોડવાનું હાલ પૂરતું બંધ છે. સાંજે એક પ્રયત્ન કરવામાં આવશે.

અત્યારે તો જ્યુશ, ફ્રુટ અને ખીચડી. બીજુ શું? :)

* ગરમી મસ્ત પડે છે. લેપટોપ ગરમ થઈને એકાદ વખત તો બંધ થઈ ગયું છે. છતાંય, લેપટોપ કૂલર પોતાની ફરજ સારી રીતે બજાવે છે. અને, કદાચ લેપટોપ બેટરીને આ વખતે બચાવી લેશે.

* વેકેશનનું પ્લાનિંગ ચાલી રહ્યું છે! કંઈ ખાસ કે મોટું કે ભવ્ય પ્લાનિંગ નથી છતાંય, વેકેશન એટલે વેકેશન. એક બ્રેક જોઈએ જ.

મુંબઇમાં..

with 3 comments

* હવે, થોડા દિવસ કવિનના વેકેશનને ન્યાય આપવા માટે અને અમદાવાદની ગરમીથી રાહત માટે મુંબઇ ખાતે. કાર્યક્રમો તો કંઈ ખાસ નથી. કેમેરા માટે એક બેગ લેવાની છે. જો મેળ પડે તો પેલો નિફ્ટી ફિફ્ટી પ૦ મીમી લેન્સ લેવાનો છે અને એલિફન્ટા, જે.જે. આર્ટ્સ કોલેજની (કદાચ), મહાલક્ષ્મી મંદિરની મુલાકાત લેવાની છે અને થોડી બીજી રખડપટ્ટી. મિત્રોને મળવાનું છે અને લિનક્સ યુઝર ગ્રુપ, મુંબઇની મિટિંગમાં એક ટોક આપવાની છે. બસ, આટલું જ.

અને, પાછી ઓફિસ તો ચાલુ જ છે.

અપડેટ્સ

leave a comment »

* કવિન અને ડોક્ટરને સારુ બનતું લાગે છે. છેલ્લાં ત્રણ અઠવાડિયાંથી બન્નેની મુલાકાત થાય છે.

* પંખો હવે ૨ નંબરથી ૩ નંબરની ઝડપે ચલાવવો પડે છે. ઓહ, ગરમી. ઓફિસનું ઠંડુગાર વાતાવરણ મિસ થાય છે, સાથેસાથે શાંતિ છે કે બપોરે ૧૨ વાગે એ.એમ.ટી.એસ.ની સફર કરવી પડતી નથી.

* કેમેરો સારો ચાલે છે. ફોટા વીક-એન્ડ પર અપલોડ કરીશ. થોડા નવી ખાસિયતો જાણવા મળી છે. સોફ્ટવેર ઈન્ડસ્ટ્રીમાં એક કહેવત છે: When everything fails, read the manual :)

*પ્રશ્ન – દરેક મોબાઈલ કંપનીઓ બિલ ભરવાની છેલ્લી તારીખનાં એક અઠવાડિયાં પહેલાં કેમ ઊંચી-નીચી થાય છે? અને, બપોરે ભર ઊંઘમાં હોય ત્યારે જ કેમ ફોન કરે છે?

* (કવિનના) વેકેશનનું પ્લાનિંગ થઈ ગયું છે..

વેકેશન: કેરાલા – ભાગ ૩

with 4 comments

* ઠેકડીથી વહેલી સવારે મુન્નાર જવાનો પ્લાન હતો, પણ આગલી રાતનાં થાક અને ખાસ ગાઢ અસરોના કારણે મોડું થઈ ગયું. જોડે બચ્ચાં પાર્ટી હોય એટલે વળી તેમને સંભાળવામાં મોડું થાય એમ ગણીને જ ચાલવાનું. રેસ્ટોરાંમાં બેઠાં હતાં ત્યારે એક સરસ ઘટના બની. નાળિયેરનાં ઝાડ પરથી નાળિયેર પડ્યું અને નળિયાની છત તોડી છેક અમે બેઠાં હતા (અને કવિન, સાનિયા અને પ્રણય રમતાં હતાં) ત્યાં આવી ગયું. કવિને એ નાળિયેર મુન્નાર છોડ્યું ત્યાં સુધી સાચવી રાખ્યું.

થોડા સમય પછી એટલે કે લંચ સમય પછી મુન્નાર હોટલ પર પહોચ્યા. અમારી જગ્યા મુન્નારની ૨૨ કિ.મી. પહેલાં હતી, પણ સ્થળ એકદમ સરસ. ત્યાં પહોંચીને લંચ લીધું, જે લીધાં પછી અમે પસ્તાયા અને ડિનર અમે નાનકડાં ધાબા પર કર્યું, જે ખરેખર સરસ હતું. ત્યાં પછી રાત્રે ભેગાં મળીને પત્તાં અને ક્વિઝ રમ્યા. નિરવ-નિકિતાએ સરસ રીતે ક્વિઝ અને સામાન્ય જ્ઞાનની રમત આયોજન કરી. અમને સૌ કોઈને ઈનામ પણ મળ્યું. બીજા દિવસે પહેલાં એક સ્પાઈસ ગાર્ડન (મુન્નાર અને આજુ-બાજુ આવાં સ્પાઈસ ગાર્ડન ઢગલાબંધ છે, જ્યાં તમને વિવિધ મસાલાનાં છોડ-ઝાડ બતાવવામાં આવે છે). ટી મ્યુઝિયમની મુલાકાત લીધી, જ્યાં મુન્નારનાં ઈતિહાસ અંગેની દસ્તાવેજી ફિલ્મ અને ચા કઈ રીતે બને છે બતાવવામાં આવ્યું. એક બ્લેક ટીનું પેકેટ લીધું. ગઈસાલ મારો ભાઈ ઢગલાબંધ ચા લાવેલો, જે અમને કોઈને ભાવી નહોતી એટલે અમે માપની જ સેમ્પલ ચા લીધી. ચા બનાવવાની સાચી રીત અમને જાણવા મળી (પણ હજી પ્રયોગ કરવામાં આવ્યો નથી).

પછી, હાઈડલ પાર્ક નામના બગીચામાં મસ્તી કાઢવામાં આવી. કવિન આમપણ હિંચકા જોઈને ગાંડો થાય છે.

બપોરે એક ગુજરાતી થાળીને ન્યાય આપ્યા પછી, મટ્ટુપેટ્ટી ડેમની મુલાકાતે ગયા અને સ્પિડબોટમાં સફર કરી. બધાંને બહુ મજા આવી. રાત પડતા સુધી બધાં બહુ થાકી ગયેલા અને બીજા દિવસે વહેલાં કોચીન માટે નીકળવાનું હતું એટલે નિદ્રાધીન જલ્દી થવામાં આવ્યું.

બીજા દિવસે તો અમે એકદમ વહેલાં ઉઠ્યા પછી ખબર પડીકે જ્યોર્જે (અમારા ડ્રાઈવર અંકલ) સમાચાર આપ્યા છેકે વાનમાં ક્લચ બગડી છે, તો ૧-૨ કલાક લાગશે. ત્યાં સુધી અમે રીસેપ્શન આગળ વાઈ-ફાઈની મજા માણી. નિરવે શોધી કાઢ્યુ કે વાઈ-ફાઈમાં DNSના લોચા છે એટલે અમે ૮.૮.૮.૮ નો સહારો લીધો અને મસ્ત રીતે વાઈ-ફાઈ મળ્યું. જોકે ફોન-આઈપોડ પર કોઈ ઈમેલના જવાબ ન આપવામાં આવ્યા.

કોચીન પહોંચતા સુધીમાં સાંજ પડી ગઈ. લંચ અમે ભરપૂર ફ્રુટ્સ વડે કર્યું. કોચીનમાં હોટલમાં ઉતર્યા પછી સાડીઓ વગેરેની ખરીદી માટે એમ.જી. રોડ ગયા. કોચીન બીચ વગેરેનો પ્લાન પડતો મૂકાયો અને એમ.જી. રોડ પર જ ડિનર પતાવવામાં આવ્યું. બીજા દિવસે સવારે કોચીન એરપોર્ટ અને કિંગફીશરે આ વખતે અમને સમયસર મુંબઈ એરપોર્ટ પહોંચાડ્યા.

એટલે કે, એક સરસ વેકેશનનો અંત. હવે આવશે મજા – માથાં પર આવી પડેલાં બાકી કામ પૂરા કરવાની :D

(નોંધ – કેરાલા સીરીઝ સંપૂર્ણ.)

કવિન – વધુ અપડેટ્સ

with one comment

* વેકેશન ભારે ગયું છે.
* આપણે કોઈના ઘરે જઈએ તો આપણને પૂછે કે શું લેશો? ચા, કોફી કે ઠંડુ? ત્યારે કવિનનો જવાબ – દહીં. મારે દહીં પીવું છે! :)
* ગઈકાલે મારા મોજાં (Socks) લેવા બહાર ગયા (દુર્ભાગ્યે, કાલે અમદાવાદનો સૌથી ઠંડો દિવસ હતો) ત્યાં કવિનને જીદ કરી કે મને કંપાસબોક્સ લઈ આપો. છેવટે, લીધો અને ઘરે આવીને કહે કે – આ તો ઉપર છોકરીનો ફોટો છે, આ કાઢી નાખો (ફોટો ડિઝનીના અલ્લાદિન મુવીની પ્રિન્સેસનો છે). હવે?
* આજુ-બાજુમાંથી કવિનની ફરિયાદો હવે આવવા લાગી છે..

વેકેશન ૨૦૦૯

with one comment

* ગઇકાલે અમે યુનિવર્સિટી ગ્રાઉન્ડ (ગુજરાત. જોકે હવે અમદાવાદ યુનિવર્સિટીની જાહેરાત પછી હું નક્કી નથી કે એ ગ્રાઉન્ડ કોનું છે..) પર આવેલા ‘વેકેશન ૨૦૦૯’ પ્રદર્શનમાં જવાનું નક્કી કર્યું. રીક્ષામાં ત્યાં ગયા તો અદ્ભુત ધસારો જોઇને લાગ્યું કે જાહેરાત મુજબ ખરેખર સારુ જ લાગે છે. ટીકીટ લઇને અંદર ગયા ત્યારે આકાશ અને અવકાશનું દર્શન કરાવતા વિભાગથી શરૂઆત થઇ!

જાદુ અને અવકાશયાત્રી

ત્યાં સ્પેશશટલ અને મંગળનો માઉન્ટ ઓલ્મપસ જોઇને કવિનને મજા આવી ગઇ. મને વધુ મજા આવી કારણકે, અવકાશ વિશેનું મારું થોડું જ્ઞાન પ્રદર્શિત કરવાની મને તક પણ મળી. થોડે આગળ ગયા તો શુક્ર પર હોય તેવી ગરમી લાગવાની શરૂઆત થઇ અને અમને થયું કે અહીં એકાદ પંખા મુક્યા હોય તો આનંદ થાત. વધુ આગળ ગયા તો ત્યાં ચંદ્રની ધરતીનાં દર્શન કર્યા અને પછી બીજા વિભાગમાં ગયા અને એમવેની દુકાન દેખી સીધા જ ધરતી પર પટકાયા! ટૂંકમાં, બીજા સામાન્ય પ્રદર્શનો હોય છે તેવું પ્રદર્શન – મસાલા, શરબત, હોમલોન્સ, કોમ્પ્યુટર ક્લાસીસ વગેરેના સ્ટોલ્સ. સફારી મેગેઝિનનો સ્ટોલ પણ છે – અને ત્યાં લવાજમ પણ ભરી શકાય છે, જોડે એક પુસ્તક ફ્રી છે. અમે ત્યાંથી એક ઇન્સ્ટન્ટ મિક્સનું પેકેટ, ખસનો શરબત ઉપાડ્યો (ત્યાં જવાનો કંઇક તો લાભ ઉઠાવવો પડેને!).

આગળ ગયા તો ત્યાં ફુડ કોર્નર હતું – હમમ, લોકોનો પ્રિય વિભાગ. કચરાપેટી હોવા છતાં લોકોને જ્યાં-ત્યાં કચરો નાખતાં જોઇ બહુ નવાઇ ન લાગી, કારણ કે, અહીં આવા દ્રશ્યો સામાન્ય છે. વધુ આગળ જતાં, બાળકો માટેની વિવિધ રાઇડ્સ હતી. અરર, આ તો મને પાલનપુરમાં દર વર્ષે ભરાતા મુરસદના મેળા જેવું જ લાગ્યું (હવે ખ્યાલ નથી કે મેળો ભરાય છે કે નહીં). એ જ મોતનો કૂવો અને ચકડોળ વગેરે. એકાદ બે આઇટમ્સ નવી હતી (સોરી, નો રાખી સાવંત!). કવિનને મજા આવી ગઇ, મને અને કોકીને થાક લાગ્યો, પણ કવિનને મજા આવી એટલે અમારા થાકનો છેદ ઉડી ગયો.

તા.ક. ત્યાં જાવ તો સ્ટફ ઢોકળાં ખાતા નહીં. બહુ જ ગંદા અને ખાટાં હતા.

તા.ક. ૨: વેકેશન નામનું મુવી છે, જે ૨૦૦૯માં આવવાનું છે :)

Follow

Get every new post delivered to your Inbox.

Join 2,359 other followers