મારા વિચારો, મારી ભાષામાં!

* ઓપનસુઝે-ઉબુન્ટુ પાર્ટી વાળી પોસ્ટમાં લખ્યું તેમ હું અશોક પાસેથી મેકબુકનો MiniDVI->VGA કેબલ લઈ આવ્યો. આ કેબલ તમારા મેકબુકને પ્રોજેક્ટર સાથે જોડવા માટે જરુરી છે. મેકબુક VGA પોર્ટની જગ્યાએ વિચિત્ર એવા MiniDVI પોર્ટ સાથે આવે છે અને 99% પ્રોજેક્ટર આ પોર્ટને આધાર આપતા નથી. અને, પાછો આ કેબલ આવે ૧૧૦૦ કે ૧૨૦૦ રુપિયાનો. લેપટોપ જોડે ફ્રી ન આવે! ગમે તે કારણસર મેં હજી સુધી તે ખરીદવાનું ટાળ્યું. એટલે, દર વખતે મારે લેવા જવું પડે. જુઓ નીચે તે કેબલનો ફોટો..

વડોદરામાં પ્રેઝન્ટેશન આપ્યા પછી, મેં કેબલ કાઢીને ક્યાંક મુક્યો. ઘરે આવીને બીજા દિવસે જોયું તો કેબલ ન મળ્યો. મારો તો જીવ અધ્ધર થઈ ગયો. બીજાની ઉછીની લીધેલ વસ્તુ આપણે ખોવાડી દઈએ ત્યારે જે લાગણી થાય એવી આખો દિવસ રહી (અમુક લોકોને આનંદ થાય, પણ એ વાત જુદી છે ). મહિનાનું બજેટ જોયું અને ક્યારે એ કેબલ ખરીદી શકાય એવી ગણતરી પણ કરી દીધેલી. નક્કી કર્યું કે ક્યાંય પણ બહાર પ્રેઝન્ટેશન માટે જઈએ ત્યારે ધ્યાન રાખીને ચેક-લિસ્ટ બનાવી બધી વસ્તુઓ પાછી બેગમાં મૂકવી. આ બાજુ, જીગીશભાઈ અને પ્રતિકને પણ મેં ઊંચા-નીચા કરી મૂક્યા. એકાદ વખત ફોન લગાવ્યો, ઈમેલ કર્યો, ગુગલ વેવ પર પિંગ કર્યું, જીગીશભાઈ તો ત્યાં લેબમાં જઈને પણ જોઈ આવ્યા.

રાત્રે ઘરે આવ્યો, અને કેબલ મારા ૬ પોકેટ જીન્સનાં એક નાનકડાં ખિસ્સામાંથી મળ્યો..

.. દરરોજનું, રાખે ડોક્ટરને દૂર – એ તમારા પર છે કે તમે તેને કેટલું જોરથી ફેંકો છો..

આવું જ એક વાક્ય મારી એક ટી-શર્ટ પર જોવા મળે છે..

* હાજર છે – ધ રેમ સ્ટોરી.

વાત એમ બની કે ઓફિસમાં નક્કી થયું કે આપણે ત્રણ મેકની (૨ મેકબુક અને વિપુલભાઇનું મેકબુક પ્રો) રેમ વધારવી. સ્થિતિ કંઇક નીચે પ્રમાણેની હતી અને નવી સ્થિતિ પ્રમાણે કરવાની હતી:

• મેકબુક પ્રો – ૫૧૨ એમબી રેમ –> ૨ જીબી રેમ (મેકબુક ધોળાની)

• મેકબુક ધોળું – ૨ જીબી રેમ –> ૪ જીબી રેમ (નવી)

• મેકબુક કાળું – ૨ જીબી રેમ –> ૨.૫ જીબી રેમ (૫૧૨, મેકબુક પ્રો માંથી)

અને અમે વિવિધ જગ્યાએ પૂછ્યું અને વિવિધ ભાવો મેળવ્યા પછી ગુલમહોર પાર્ક મોલમાં આવેલ iStore માં રેમ માટે જવાનું નક્કી કર્યું. રાત્રે ૭ વાગે પહોંચીને ત્રણેય લેપટોપ આપી દીધા અને આમતેમ આંટા માર્યા. કાચમાંથી દેખ્યું તો અંદર સર્વિસ કરવા વાળો ફાંફા મારતો જણાયો. હું અને પ્રવિણ (અમારો હાર્ડવેર એક્ઝયુકેટિવ માણસ) અંદર ગયા અને સ્થિતિ એવી હતી કે ૪ જીબી રેમ નાખ્યા પછી મારું મેકબુક (ધોળું) ચાલુ નહોતું થતું! મેં તેને લિનક્સમાં ચાલુ કરી દેખ્યું – તો બરોબર હતું. પછી, મેકમાં ચાલુ કર્યું. થઇ ગયું. ઓકે. પછી વિપુલભાઇનું મેક પ્રો ખોલ્યું તો અંદરથી એક વધારાની રેમ મળી (બન્ને રેમ્સ ઉપર દર્શાવેલી છે!).

તો અમે તેમાં મારાં મેકબુકની રેમ નાંખી. ચાલુ ન થયું. મારી રેમ કાળા મેકબુકમાં નાખી. ચાલુ ન થયું. વિપુલભાઇની રેમ કાળા મેકબુકમાં નાખી. ન ચાલુ થયું! બધા પ્રકારનાં પર્મયુટેશન-કોમ્બિનેશન પ્રયત્નો કર્યા. કંઇ ન થયું.

૯.૩૦ વાગી ગયા અને મને તો ઘરેથી ફોન પર ફોન આવવા લાગ્યા. મને થયું કે જો હું અત્યારે જ ઘરે નહિ જાઉં તો મારા તો ૧૨ વાગી જ જશે! મને એક શંકા હતી તેમ મેકબુક પ્રોની રેમ બરોબર ફીટ નહોતી થઇ. કારણકે તેમાં બે રેમ હતી અને એક જ દર્શાવાતી હતી.

તો, છેલ્લા પ્રયત્નો તરીકે મેં ફરી હાથ અજમાવ્યો અને જાદુ-મંતર – મેકબુક પ્રો ચાલુ!

તો. હવે ઝડપી મશીન મારી પાસે

સાર: મોટી દુકાન જોઇને અંજાઇ જવાની જરૂર નથી એ લોકો તો આપણા કરતા વધુ અજ્ઞાની હોઇ શકે છે!

* મારી મેકબુકનાં ડોક પર આટલા બધાં પ્રાણીઓ? હા, આ બધા કોઇને કોઇ પ્રોજેક્ટનાં આઇકન્સ (ચિહ્નો, લોગો..) છે. પહેલું ફાયરફોક્સ (કહેવાની જરૂર છે કે તે શું છે?), બીજું એપલ મેલ (ઇમેલ સોફ્ટવેર) (થોડા સમય પછી હું થન્ડરબર્ડ પર જવાનો છું – તેનો લોગો પર પક્ષીનો છે!), ત્રીજું ઓપનસોર્સ મેસેન્ડર એડિયમ, ચોથું મેક માટે ઓપનસોર્સ FTP ક્લાયન્ટ સાયબરડક, પાંચમું ઓપનસોર્સ મ્યુઝીક પ્લેયર સોંગબર્ડ. છઠ્ઠું ઓપનઓફિસ, સાતમું ઓપનસોર્સ ઇમેજ એડિટર જીમ્પ…

ટૂંકમાં, મારું કોમ્પ્યુટર હવે પ્રાણી-સંગ્રહાલય બનતું જાય છે અને હવે તો મને એક વાંદરાનો બહુ જ ડર લાગે છે!!

આ સિવાય બીજા કોઇ પ્રાણી-પક્ષીનાં ચિહ્નો કોઇ સોફ્ટવેર પ્રોજેક્ટમાં મળે તો જણાવશો!

* બોલો, શું થયું હશે, મારા મેકબુકનું..?

* વિનયભાઇએ આવીયો iPhone પોસ્ટ પર કોમેન્ટમાં આ વિચાર મૂક્યો ત્યારે યાદ આવ્યું કે આ મહત્વનો મુદ્દો તો હું ભૂલી જ ગયો છું!

ના, આઇફોનમાં ગુજરાતી બરોબર દેખાતું નથી. કદાચ સફારી બ્રાઉઝરમાં ગરબડ લાગે છે. આઇફોન સિમ્યુલેટરમાં નીચે પ્રમાણે પરિણામ મળે છે. વધુમાં મેં જ્યારે આઇફોન વાપરેલો (જુની આવૃત્તિ) ત્યારે તેમાં ગુજરાતી ગોઠવણીનો કોઇ વિકલ્પ નહોતો. નવા આઇફોનમાં જોવું પડશે.

વધારે ખાંખા-ખોળા કરવા પડશે..

(ચિત્ર: http://www.flickr.com/photos/sigalakos તરફથી)

* આજે iPhone નું ઓફિશિયલ લોન્ચ અહીં થયું. ૩૧,૦૦૦ અને ૩૬,૦૦૦ નો ભાવ સાંભળીને મને ચક્કર આવી ગયા અને iPhone ની જગ્યાએ નોકિયાનું કોઇ સાદું ડબલું લેવાનો વિચાર કર્યો. અમેરિકામાં ૧૯૯$ અને સર્વિસ મળીને ૧૫,૦૦૦ થી ૨૦,૦૦૦ ની આસપાસ મળતાં ફોનની કિંમત (મને સુધારશો, કારણકે અહીં પણ ઘણી બધી અસંગતતાઓ છે) અહીં આટલી બધી કેમ રાખી તેની ચર્ચા ગઇકાલે રાત્રે બધી ન્યૂઝ ચેનલ્સ પર ચાલતી હતી.

તમે શું કહો છો?

* .. પણ આટલા બધા?

કમાલ છે, એપલ મેલનો!

.. ગેટ્સ ગયો, થાંભલા અને દરવાજા અને જાળીઓ રહી ગઇ.

તમને ખ્યાલ જ હશે કે, બિલ ગેટ્સે માઇક્રોસોફ્ટમાંથી વિદાય લીધી એટલે બહુ તમાશો કરીને ગયો. તો આપણને કેટલા ટકા? માઇક્રોસોફ્ટની ઇવિલ મોનોપોલિસ્ટીક પોલિસીઓ તો ચાલુ જ રહેવાની છે. એ જ EULA વપરાશકારોને માથે પડવાનું છે અને પાયરસીનો ડર બતાવીને માઇક્રોસોફ્ટ પૈસા બનાવતું રહેશે (હા, ખરી વાત છે કે એપલ કંપની, માઇક્રોસોફ્ટની સાવકી બહેન જ છે — પણ હાર્ડવેરમાં તો એ કંઇક સારું બનાવે છે!).

હા, તમે જો લિનક્સ ન વાપરી શકો તો, તમે માઇક્રોસોફ્ટનાં ગંદા-ગોબરાં સોફ્ટવેર્સની સામે નીચેનાં ફ્રી સોફ્ટવેર વાપરી શકો છો:

સોફ્ટવેર ———-> ફ્રી સોફ્ટવેર

ઇન્ટરનેટ એક્સપ્લોરર            મોઝિલા ફાયરફોક્સ – બ્રાઉઝર, પરિચય આપવાની જરૂર નથી. (ના, ઓપેરા કે સફારી ફ્રી સોફ્ટવેર્સ નથી!!)

આઉટલુક એક્સપ્રેસ              મોઝિલા થન્ડરબર્ડ – ઇમેલ ક્લાયન્ટ.

વિઝ્યુઅલ સ્ટુડિઓ              ઇક્લિપ્સ, નેટબીન્સ વગેરે

કોઇ કેલેન્ડર સોફ્ટવેર            મોઝિલા સનબર્ડ

વિન્ડોઝ મેસેન્જર                પીડગીન, એડિયમ વગેરે

વિન્ડોઝ મીડીઆ પ્લેયર          VLC બધા પ્લેયરનાં પપ્પા!

અને હા, વાંચો, રીચાર્ડ સ્ટોલમેનનો લેખ ગેટ્સની વિદાય પર.

* મેક વિન્ડોઝ કરતાં જુદું કઇ રીતે પડે છે, તે આપણે જોયું. હવે, મેકની બીજી નોંધ પાત્ર વસ્તુઓ…

૧. ડોક

કાર્યક્રમ મેનુની જગ્યાએ મેકમાં નીચેની બાજુએ (તમે ડાબે, જમણે પણ મૂકી શકો છો) એક તરતું ડોક હોય છે. તેનો ઉપયોગ કરી તમે કોઇપણ કાર્યક્રમ ખોલી શકો છો. તેની જમણી બાજુએ તમે કોઇ વિન્ડો મીનીમાઇઝ કરો તો તે ત્યાં ચાલી જાય છે. જે કાર્યક્રમમાં નીચે ઝીણી લાઇટ થયેલ દેખાય તે ચાલુ છે તેમ બતાવે છે.

તમે જોઇ શકો છો કે, ફાઇન્ડર (એટલે કે મેકનું ફાઇલ બ્રાઉઝર (જે હંમેશા ખૂલ્લું જ રહે છે)), ટર્મિનલ, Xcode, મેઇલ, ફાયરફોક્સ, એડિયમ ખૂલ્લાં છે, ઝીણી લાઇટ દેખાય છે? જ્યારે ઓપનઓફિસ, vlc, સ્કાઇપ વગેરે બંધ છે.

૨. ઓલ વિન્ડો વ્યુ

કર્સરને ડેસ્કટોપને એક ખૂણે (તમે ચાર ખૂણામાંથી કોઇપણ ખૂણો પસંદ કરી શકો છો) લઇ જતાં તમારી ખૂલેલ બધી જ વિન્ડો દેખાશે. અને તેમાંથી એક પર ક્લિક કરતાં તે આખી વિન્ડો ખૂલશે.

૩. ડેશબોર્ડ

એકદમ ઝક્કાસ વિજેટ્સ. વિજેટ્સ એટલે નાનકડાં કાર્યક્રમો. F4 બટન દબાવતાં તે આવી જશે.

૪. નો રાઇટ ક્લિક બટન!

હા, એક વાત, મેકમાં રાઇટ ક્લિકનું બટન હોતું નથી. એક જ ક્લિક હોય છે!! પણ, જો રાઇટ ક્લિક કરવું હોય તો, એક આંગળી પેડ પર મુકો અને ક્લિક કરો. ખાસ કરીને વિન્ડોઝ વપરાશકારોને આ બહુ જ નવાઇભર્યુ લાગે છે.

૫. બે આંગળી વડે સ્ક્રોલ

તમે એક આંગળી અને બટન વડે સ્ક્રોલ કરી થાકી ગયા છો? ખાસ કરીને વેબસાઇટું સર્ફ કરતાં કરતાં આંગળીઓની વાટ લાગે છે. તો મૂકો બે આંગળીઓ પેડ પર અને સરકાવો ધીમેથી!

મેકની આમાંથી થોડી લાક્ષણિકતાઓ તમે તેનાં પાનાં પર જોઇ શકો છો. પ્રથમ અને છેલ્લાં બે ચિત્રો આ પાનાં પરથી લીધેલ છે. બાકીનાં મારા લેપટોપમાંથી સ્ક્રિનશોટ વડે..

પછી ક્યારેક આપણે આઇકેલ કેલેન્ડર કાર્યક્રમ (iCal), ફોટોબુથ (PhotoBooth) અને ડેવલોપર્સ માટેનાં ટુલ Xcode વિશે જાણીશું.

નોંધ, તમારે મેક કેમ લેવું જોઇએ તેની સરસ માહિતી.