મારા લોકડાઉન અપડેટ્સ – ૩

લોકડાઉન લંબાવાયું છે એટલે હવે સમય છે, બીજાં એક લોકડાઉન અપડેટ્સનો!

સૌથી પહેલાં મહત્વના અપડેટ. અમારું ક્યારનુંય મંગાવેલું હેર ટ્રીમર આવ્યું અને પહેલો અખતરો કવિન અને બીજો અખતરો મારા પર થયો. પરિણામી ફોટાઓ અહીં મૂકવા જેવા નથી અને લોકડાઉનમાં ક્યાંય ખાસ બહાર જવાનું નથી એટલે અમારી લાજ સલામત છે 😀

અહીં સ્થિતિ જરાય સારી નથી છતાં મૂર્ખાઓ બહાર રખડે છે, દારૂની દુકાનોએ લાઇનો લગાવે છે. માસ્ક દાઢી પર પહેરીને ફરે છે. રસ્તા પર બુઢ્ઢાઓ ઉભા રહીને માસ્ક નીચો કરીને સિગરેટ ફૂંકે છે. વિશ્વના શ્રેષ્ઠ મુખ્યમંત્રી ઘરમાં બેસીને આ તમાશો જુએ છે અને લોકો મરી રહ્યા છે.

આ વર્ષે પણ અમારો હિમાલય પ્રવાસ (મારા માટે તો બે પ્રવાસો!) રદ થયો છે. જેવી કેદારનાથની મરજી! આવતા વર્ષે ફરી ગોઠવીશું.

સાયકલિંગમાં જોઇએ તો ઝ્વિફટ હજુ ઝિંદાબાદ છે. એક વધુ ચેલેન્જ લેવામાં આવી છે, જેનું પરિણામ આ મહિનાના અંતે આવશે. જો હું ટોપ ૩માં આવીશ તો અહીં પોસ્ટ કરીશ, બાકી નહીં કરું 😉

પુશઅપ્સ-પ્લાન્ક શરૂ કર્યા છે, બાકી શાંતિ છે.

મારા લોકડાઉન અપડેટ્સ – ૨

હવે લોકડાઉન લંબાયું છે એટલે પહેલાં અપડેટ્સ પછી આવ્યો છે આ પ્રકારના અપડેટ્સનો ભાગ ૨! આ ભાગમાં કંઇ ખાસ નથી, છતાં જાહેર જનતાને જણાવવાનું કે અમે ઘરમાં જ છીએ અને સલામત છીએ. સાયકલ ચલાવીએ છીએ, કામ કરીએ છીએ અને મસ્ત વાનગીઓ ઝાપટી રહ્યા છીએ.

રસોઇઘરમાં ડોકિયા કરવાનાં થોડા વધુ પ્રયત્નો કર્યા છે, પણ મને ધાર્યા કરતા આ કામ બહુ અઘરું લાગે છે. ખાસ કરીને મારા જેવા અનફોકસ્ડ વ્યક્તિ માટે! છતાં પણ, ત્રણ દિવસ સુધી અલગ-અલગ વસ્તુઓ બનાવી શકું એટલું તો શીખવું છે જ. હા, રસોડાનું પ્લેટફોર્મ સાફ કરવામાં અને પોતું કરવામાં માસ્ટરી આવી રહી છે.

સાયકલિંગ સારું ચાલે છે. દર અઠવાડિયે ૨૦૦ થી ૨૫૦ કિમીની સાથે સારું એવું ક્લાઇમ્બિંગ વત્તા FTPમાં સુધારો-વધારો થયો છે. બીજી કસરતો માત્ર સ્ટ્રાવાની ચેલેન્જીસ પૂરી કરવા કરી રહ્યો છું, પણ તે પણ થોડો ફાયદો તો કરાવે છે જ. અને હા, માર્ચ ૧૩ થી અત્યાર સુધી લગભગ ૧૧૦૦ કિમીનું સાયકલિંગ થયું છે, એટલે મજા તો છે જ! વધુમાં જો તમે ઝ્વિફ્ટ વાપરતા હોવ તો રાઇડના પૃથ્થકરણ (એનાલિસિસ!) માટે ઝ્વિફ્ટપાવર.કોમ સરસ ફોરમ-વેબસાઇટ છે. મોટાભાગની રેસ તેમાં આવેલા પરિણામને જ ફાઇનલ ગણે છે.

લોકડાઉનમાં વસ્તુઓ બગડવાની પરંપરા ચાલુ રહી છે. ડ્રોઇંગ રૂમનું ટેબલ, રસોડાનો માઇક્રો ફેન, પડદાની પાઇપનું સ્ટેન્ડ, કાંસકા મૂકવાનું બોક્સ. હજુ આટલું જ છે. આમાંથી ટેબલ ફેવિકોલ વડે ટેમ્પરરી ફિક્સ કર્યું છે. ફેવિક્વિક વડે કાંસકાનું સ્ટેન્ડ મજબૂત રીતે ચોંટાડ્યું છે અને સેલોટેપથી પડદાની પાઇપ લગાવી છે. હવે ફરીથી રાત્રે બે વાગે પડદો ન પડે તો સારું છે 😉 અમેરિકાની જેમ હવે ડુ-ઇટ-યોરસેલ્ફ અહીં પણ પ્રચલિત થશે.

મિત્રો સાથે હેંગઆઉટ-ઝૂમ-ડ્યુઓ-વોટ્સએપ કોલ્સની મઝા લીધી છે, પણ ઓફિસની મિટિંગોની જેમ હું જરૂર હોય ત્યારે જ મિટિંગમાં બોલું – એવી આદતને લીધે આ બધું હજુ ફાવતું નથી 😀

વોટ્સએપ યુનિવર્સિટીના સ્નાતકોની જેમ ટ્વિટર યુનિવર્સિટીના માસ્ટરોનો કાળો કેર છે. આપણે તો સ્ટ્રાવાના પીએચ.ડી. વાળા વિદ્યાર્થી છીએ એટલે વાંધો નથી આવ્યો 🙂

મારા લોકડાઉન અપડેટ્સ

આમ તો ઘરમાં રહેવું એ મારા માટે એટલે કે વર્ક ફ્રોમ હોમ વાળા લોકો માટે કંઇ નવું નથી. છતાં પણ, થોડું પણ બહાર ન જવાના ફાયદા ઘણાં થયા છે:

૧. ઓનલાઇન શોપિંગ બંધ થવાથી ઘણી બચત થઇ છે અથવા તો હાલ પૂરતું લાગે છે, જ્યાં સુધી એમેઝોન વગેરે બંધ છે. પછી તેના પર તૂટી ન પડાય તો સારું!

૨. સાયકલિંગ સારું થાય છે, પણ હવે ઝ્વિફ્ટનો ટેમ્પો ક્યાં સુધી દોડે છે, તે પણ જોવામાં આવશે. આવતા અઠવાડિયા પછી, કોઇ સારો પ્લાન શરૂ કરીશ. જેથી આ દરરોજની રેસમાંથી મુક્તિ મળે. હાલ તો કંટાળો અને તણાવ દૂર કરવા માટે સાયકલિંગ કરી-કરીને થાકી જવું એ જ ઉપાય છે!

૩. જમવાનું બનાવવાનું શીખવાનું શરૂ કર્યું છે, પણ બહુ અઘરી વસ્તુ છે. લાગે છે કે બે-ત્રણ વસ્તુઓ વારંવાર બનાવીશ તો આવડી તો જશે જ.

૪. પોતું કરવામાં મજા આવે છે. ફ્રોગ પોઝિશનમાં જરૂરી સ્ટ્રેચિંગ થઇ જાય છે 😉 અમારો ખાસ “પોતાં” ઓર્ડર એમેઝોનમાં અટકી ગયો છે, એટલે થોડી તકલીફ પડે છે, પણ ચાલી જશે. ત્યાં સુધીમાં હું નિષ્ણાત થઇ જઇશ.

૫. વાળ કપાવવાના રહી ગયા. જાતે કાપવાનો થોડો પ્રયત્ન કર્યો છે, પણ હજુ વધુ હિંમત થતી નથી અને સારી કાતર-કાંસકાઓ-ટ્રીમરની કમી વર્તાય છે. હવે, આવતા બજેટમાં આ વસ્તુઓને મૂકવામાં આવશે.

૫. ગઇકાલે અમારી ચા પરની ચર્ચા જે સામાન્ય રીતે બોરીવલી-કાંદિવલીમાં થતી હતી તે ઓનલાઇન થઇ અને દોઢ કલાક ક્યાં જતો રહ્યો તેની ખબર જ ન પડી!

૬. લોકો મૂર્ખ છે, પણ એ લોકોને છાવરતાં લોકો તો મહામૂર્ખ છે! લાગતા-વળગતાંઓએ પાઘડી પહેરવાંની છૂટ છે.

કોરોના

સૌ પ્રથમ તો..

હાંફળા-ફાંફળા થવાની જરૂર નથી!!

બીજી વાત. આલ્કોહોલથી આ રોગ સામે રક્ષણ મળતું નથી. પણ, કેટલાંક મૂર્ખ લોકોએ આવું કર્યું અને મર્યા. આ પણ જુઓ: ઇરાનમાં દારૂબંધી પર વિકિપીડિયાનો લેખ

ત્રીજી વાત. સમગ્ર દેશમાં રોગચાળો વધુ ફેલાતો અટકાવવો મહત્વનો છે, નહી કે પોતાના જ રાજ્યવાસીઓને બચાવવાની પીપૂડી વગાડવી. ફરી એકવાર સાબિત થયું છે કે વધુ પડતું ભણતર કંઇ કામનું નથી.

ચોથી વાત. કોરોના બીયર અને કોરોનાવાયરસ વચ્ચે કોઇ સંબંધ નથી.

નિર્દોષ બીયર. નિર્દોષ કોરોના એક્સ્ટ્રા.

પાંચમી અને છેલ્લી વાત! કોરોનાવાયરસ રોગ ૨૦૧૯ પર ગુજરાતી વિકિપીડિયામાં લેખ શરૂ કર્યો છે. મોટાભાગે દરરોજ અપડેટ કરતો રહું છું.

બે નંબર

હવે બધાંની પાસે બે મોબાઇલ નંબર હોય છે. દાખલા તરીકે એક વોડાફોન અને એક જિયો.

હવે ધારો કે મારી પાસે બે નંબર હોય અને એમાંથી બીજો જે નવો લીધો હોય એ તમારી પાસે ન હોય. હું તમને ફોન કરું અને અજાણ્યા નંબર પરથી આવેલો કોલ તમે ન ઉપાડો અને પૈસા બચાવવા તમારા નવાં જિયો નંબર પરથી મને પાછો કોલ કરો જે મારી પાસે ન હોય, એટલે અજાણ્યો માર્કેટિંગ કે સ્પામ નંબર સમજી એ હું પણ ન ઉપાડું તો..

આપણા દેશમાં હાલ આ જ સ્થિતિ છે 😉

એરપોર્ટનું અકળ રહસ્ય

જ્યારે પણ હું એરપોર્ટ સિકયુરિટી ચકાસણી માટે ઊભો રહ્યો હોઉં છું, ત્યારે વિચાર આવે કે લોકો આટલું બધું ટ્રાવેલ કરતા હોય તો પણ જાતજાતની વસ્તુઓ બેગમાં કેમ ભરી આવે છે. અને, ખબર હોય કે લેપટોપ બહાર કાઢવાનું છે કે જૂતાં નીકાળવાનાં છે તો પણ.. જવા દો. બીજું શું? 💁

સાફ-સફાઇ!

સાફ-સફાઇ મને બહુ ગમે. હું સમયાંતરે ઇમેલ, જીમેલ અને ડેસ્કની (ના, તમે ધાર્યો હતો એવો પ્રાસ બેસતો ત્રીજો શબ્દ અહીં નહી આવે!) સાફ-સફાઇ કરતો રહું છું. છેલ્લાં થોડા દિવસોથી ફેસબૂકમાંથી પણ કચરો સાફ કરી રહ્યો છું. આ ઉપરથી યાદ આવ્યું કે,

કરતાં સોબત શ્વાનની બે બાજુનું દુ:ખ
ખિજ્યું કરડે પિંડીએ રિઝ્યું ચાટે મુખ

સંદર્ભ

અને ફરીથી યાદ આવ્યું કે મારે મારી સાયકલ સાફ કરવાની છે, જે માટે ચેઇન-ક્લિનર સ્પ્રે લાવવાનું છે, જે માટે કદાચ આવતા મહિનાના બજેટની રાહ જોવી પડશે! 😀

ફ્રી

ગઇ કાલે હું અને કવિન ઘરની સામે આવેલા ડિમાર્ટ પીકઅપ સેન્ટરમાંથી અમારો સામાન લેવા ગયા હતા, ત્યાં એક આંટી આવ્યા.

આંટી: હું અહીંથી આ ટિફિન લઇ ગઇ હતી તેની જોડે આવતી ફ્રી વસ્તુ મળી નથી. એ આપો.

હું: આ તો BPA Free લખ્યું છે. કંઇ વસ્તુ ફ્રી નથી.

પછી કવિને આંટી અને ડિમાર્ટ વાળા બંનેને સમજાવ્યું.

બોલો મારી સાથે, ફ્રી ફ્રી ફ્રી!

કમન-સનસ

ઈ.સ. ૨૦૧૯માં પણ વર્ડપ્રેસ.કોમ ગુજરાતીમાં સરખા હેશટેગ દર્શાવી શકતું નથી!

દા.ત.

હવે ઉપરના #કોમન-સેન્સ ટેગ પર ક્લિક કરતાં..

કમન-સનસ ખરખર કોમન નથ હત 😉

KBC

ગઇકાલે સંદિપભાઇએ ધ્યાન દોર્યું કે અંગ્રેજી વિકિપીડિયાના KBC લેખ પરની ઓફિશિયલ વેબસાઇટ સ્પામ-બોગસ છે. લેખના ઇતિહાસ-હિસ્ટરીમાં જઇને જોયું તો લોકોએ વિકિપીડિયાનો ભરપૂર ફાયદો લઇને પોત-પોતાની બોગસ વેબસાઇટ્સ ઉમેરી હતી. ટૂંકમાં,

૧. લોકો લાલચુ હોય છે. ie ઇઝી મની જોઇએ છે.

૨. લોકો છેતરતા હોય છે અને છેતરાઇ જવામાં માહિર છે.

૩. વિકિપીડિયા એમના બાપનું માર્કેટિંગ ખેતર છે.

ગુજરાતી વિકિપીડિયામાં પણ આવા આક્રમણો થતા હોય છે. પણ, જ્યાં સુધી અમે છીએ, અમે યુદ્ધ ચાલુ રાખીશું! મને ખબર છે કે સ્પામ-માર્કેટિંગ-લાલચ-લોભનો અંત નથી, પણ આ જ જીવન છે 🙂