અપડેટ્સ – ૨૧૪

* ફેબ્રુઆરી મહિનો આવી ગયો છે. આપણો સૌથી મનગમતો મહિનો! સૌથી ઓછાં દિવસો વાળો ખરોને! જોકે નુકશાન એ પણ થાય કે ઓછાં દિવસો સાયકલિંગ-રનિંગ માટે મળે.

* આ વખતે સા.ફ્રા.માં ઠંડી (વત્તા વરસાદ)નો ભારે અનુભવ થયો. વધુમાં દરિયાકિનારો નજીક ન હોવાથી દોડવાના કાર્યક્રમો પણ બહુ ન થયા. સાયકલિંગનો કાર્યક્રમ સાયકલનું રેન્ટ જોઇને પડતો મૂકાયો (અને સાયકલિંગના કપડા પણ ભૂલી ગયેલો). હા, આ વખતે પણ બહુ બધાં મિત્રો મળ્યા. પ્રિમા, બાલાજી, ધ્રુવ (ADR) અને ઓફિસના મિત્રો તો ખરાં જ. પિનટ્રેસ્ટ અને સ્ટ્રાવાની ઓફિસોની મુલાકાત લીધી અને ખાવા-પીવામાં જલ્સા કર્યા. રાફાના સ્ટોરની મુલાકાત ન લેવાઇ એ અફસોસ રહેશે.

* પ્રવાસનો થાક હજુ ઉતર્યો હોય એમ લાગતું નથી. કુલ ૨૨ કલાકની બે ફ્લાઇટ્સ, ઇસ્તંબૂલ એરપોર્ટની સફર (ગેટ નં ૨૦૦ થી ૭૦૦!) અને ૧ કલાક બોરિંગ ઇમિગ્રેશન વત્તા ટેક્સી વાળાનો ત્રાસ સહન કરીને ઘરે આવીને તરત જ સામાજીક કાર્યક્રમમાં દોડ્યો. ત્યાં જલ્દી જવાનો હેતુ કવિનની કોમ્પિટિશન હતી, જે ૯.૩૦ની જગ્યાએ ૧૧.૩૦એ ચાલુ થઇ એટલે ત્યાં સુધી બેઠા-બેઠા ઝોકા ખાધા. પછી વાતોના વડા અને છેલ્લે લાડવા 🙂

* ગઇકાલે “ચલ મન જીતવા જઇએ” જોયું. ધાર્યા જેટલી મઝા ન આવી કારણકે બીજો ભાગ આધ્યાત્મ તરફ દોરી જતો હોય એમ લાગે છે. આપણને તો “તન જીતવા જઇએ” જેવું કંઇક, એટલે કે સાયકલિંગ-રનિંગ એવું કંઇ બતાવે તો મઝા આવે 😉 મજાક બાજુ પર મૂકીએ તો એકંદરે થોડીક ગ્લિચિસને બાદ કરતાં સરસ ફિલમ. મારા જેવા એંગર મેનેજમેન્ટના ક્લાસ કરતાં લોકો માટે ખાસ. સો ટકા જોવા જવાય. ઘણાં વખતે થિયેટર પણ હાઉસફૂલ જોયું.

* રવિવારે મારી પ્રથમ ૫ કિમીની રનિંગ રેસ છે. આ વખતે હું-કવિન અને રીનિત-હિરલ એમ કુટુંબમાંથી ચાર જણા દોડવાના છીએ એટલે મઝા આવશે. જોકે પાંચ કિમીની મારી પહેલી રેસથી હું થોડો નર્વસ છું. અને હા, ફેબ્રુઆરી અંતમાં બીજી સાયકલિંગ રેસ આવે છે!

ફ્લાઇટની ફિલ્મો

* લાંબી ફ્લાઇટમાં જવાનું થાય એ પહેલાં હું થોડો સમય ફિલ્મો જોવાનું ટાળું છું એટલે એ સમય દરમિયાન થોડા વધુ વિકલ્પો મળી રહે.

1. કિંગ્સમેન: ગોલ્ડન સર્કલ. સરસ ફિલ્મ. આગલા ભાગની જેમ જ ધમાધમી મચાવી દે છે. જોકે પોલિટિકલ મસાલો ઉમેર્યો એ મઝા ન આવી.

2. એટોમિક બ્લોન્ડ. ડાર્ક. કોલ્ડ. અને ચાર્લીઝ થેરોન. ધીમી પણ સરસ.

3. ધ એકાઉન્ટન્ટ. કોઇ સી.એ. બંદૂકો ચલાવે? હા. સરસ સ્ટોરી. અંતમાં થોડો હિસાબ પરચૂરણ ખર્ચામાં મૂકી દઇને તાળો મેળવ્યો એમ લાગ્યું.

4. અનફરગિવન. ક્લાસિક. આજકાલ મને વેસ્ટર્ન અને કાઉબોયની ફિલ્મો ગમવા લાગી છે.

અને, પછી જેટલેગના કારણે યુટ્યુબ પર,

5. ધ ગુડ, બેડ એન્ડ અગ્લી અને 6. જેંગો. બંને જૂનાં અને જાણીતા.

અપડેટ્સ – ૨૧૩

* વેકેશનમાં સ્ટાર વોર્સ જોવામાં આવ્યું. એકંદરે સારું મુવી. કોઇ રીવ્યુ લખતો નથી, કારણ કે અત્યાર સુધી તો લોકોએ તે જોઇ કાઢ્યું જ હશે. સ્ટાર વોર્સની સાથે-સાથે શોપિંગ પણ થઇ ગઇ અને એ ત્રણ-ચાર દિવસમાં ભેગી કરેલી કેલરી સાયકલિંગ કરીને બાળી પણ કાઢી.

* આજ-કાલ મુંબઈમાં પણ ઠંડી લાગે છે. નવાઈની વાત છે. બે-ત્રણ દિવસથી સાયકલિંગ કરતી વખતે થોડો અનુભવ થાય છે. હવે આવતા સા.ફા. પ્રવાસમાં આવું કંઇ ન અનુભવાય તો સારી વાત છે. ગઇસાલ તો ઠંડીને કારણે દોડવાની બહુ મઝા નહોતી આવી. આ વખતે સાયકલિંગનો પણ પ્લાન છે, પણ એ તો દરવખતે હોય છે 😉

* ઉત્તરાયણની પણ રાહ જોવાય છે. રે નિર્દોષ પક્ષીઓ. સોરી, કબૂતરો!

* હવે પછીની રેસ પણ સાયકલિંગની છે. ના, આ વખતે પણ મુંબઈ મેરેથોન (હવે ટાટા મુંબઈ મેરેથોન) નહી થાય. નવી મુંબઈ હાફ-મેરેથોન કે થાણેની હિરાનંદાની પણ નહી કરવામાં આવે. હા, આપણી ફેવરિટ ૬૦૦ – મહાબળેશ્વર બી.આર.એમ. તો કરીશું જ.

વચ્ચે આવતા પ્રવાસ વત્તા રેસના પ્રવાસોના પાછલાં અનુભવો પરથી હું બોધપાઠ નહી લઉં તો, રેસની પેસ પર અસર પડશે!!

* આજનું ક્રોમ એક્ટેન્શન: હેલ્ધી બ્રાઉઝિંગ

ટ્રમ્પેટ

.. અને જેમ ધાર્યું હતું તેમ આપણા ટ્રમ્પે આવતાવેંત જ ટ્રમ્પેટ વગાડીને ચાર-પાંચ દેશોના નાગરિકોને લગભગ ધક્કો મારી દીધો. જોકે, વધુ મહત્વની વાત એ છે કે આખી પ્રક્રિયાને સમજવી અઘરી છે (ભારતીયો પર પણ કંઇક નિયંત્રણો આવ્યા છે, એટલે હવે અમેરિકાની આવતી મુલાકાત મારા માટે પણ તકલીફ વાળી થવાની એ નક્કી) અને લોકો તેનો સમજ્યા વગર વિરોધ કરશે (નોટ માય પ્રેસિડેન્ટમાં થયું તેમ). પણ સરવાળે, ફેઇલ્ડ નેશન્શની મારી યાદીમાં એક વધુ દેશનો ઉમેરો થયો છે (આમાં પાકિસ્તાનનો વર્ષોથી ટોચ પર છે). વિઝા વસ્તુ જ એવી કંટાળાજનક છે કે એમ થાય કે ક્યાંય બહાર જવું જ નહી, પણ બીજી બાજુ એમ થાય કે, બહારના દેશો જોવા મળે તો કેમ ન જવું.

બીજી વાત રેફ્યુજીઓની. ભારત કરતાં આ વિશે બીજો કયો દેશ બોલી શકે? પારસીઓથી માંડીને દલાઇ લામાથી લઇને બાંગ્લાદેશી “શરણાર્થીઓ”ને આપણે સ્વીકાર્યા છે – એટલે આપણને ખુશી અને ગમ બંને છે.

ત્રીજી વાત – યુદ્ધ અને રાજકારણમાં લાગણીઓ ન હોય – બધું જ ચાલે છે. એટલે, જો લોકો એમ સમજતા હોય કે આ તેમના દિલની લાગણીઓનો વિષય છે, તો તેમણે ઇતિહાસ વાંચ્યો નથી કે સમજ્યો નથી.

મુંબઈ મેરેથોન

img-20170108-wa0005

હવે બધાંએ મુંબઈ મેરેથોનનો રીપોર્ટ લખ્યો તો અમારે પણ લખવો પડેને? તો થઇ જાય મુંબઈ મેરેથોન ૨૦૧૭ની પોસ્ટ?

રીપોર્ટ:

હું ન દોડ્યો.

કારણ:

કીટાણું? ના. સાન ફ્રાન્સિસ્કોણું.

😉

અપડેટ્સ – ૧૯૮

* ફરી પાછાં મેક જોડે મગજમારી છે, એટલે ગુજરાતી બરોબર લખાશે નહી એટલે હું એકદમ સરળ લખાણ અહીં લખીશ.

* જેટ લેગ હજુ અસર કરે છે, અને ફરી પાછું આવતાં અઠવાડિયે અસર કરશે. મુંબઈ મેરેથોન ગુમાવવી એ ગયા અઠવાડિયાની સૌથી મોટી આઘાતજનક ઘટના હતી, પણ અહીં ૪ દિવસ સતત દોડાયું તે સારી ઘટના કહેવાય. વધુમાં, ટીમ અને ઓફિસની મુલાકાત પણ સારી ઘટના કહી શકાય. જોકે તેને ઘટના ન કહેવાય, તો પણ…

* શનિવારે નજીકમાં સરસ હાઇકિંગ થયું પણ સાત કિમી સતત ચાલીને પણ મારા પગ ન દુખવા આવે તે સારી વાત કહેવાય. ગઇકાલે સાંજે દોડવાનું મન થયું અને મને એમ કે સાંજે ઠંડી ઓછી હશે પણ સાંજ તો વધુ ઠંડી નીકળી.

* આવતો મહિનો રનિંગ-સાયકલિંગ-ફરવા-હરવામાં ભારે છે. વધુ ડોઝ મેળવવાની તૈયારી રાખજો! 😉

અપડેટ્સ – ૧૯૪

* છેલ્લી અપડેટ આવ્યાને ઘણો સમય થઇ ગયો અને ત્યારબાદ તો મુંબઈમાં ઠંડી પણ શરુ થઇ ગઇ છે! હા, અમે ૨૩ ડિગ્રી તાપમાન થાય એને ઠંડી કહીએ છીએ. સીએટલમાં ૯ ડિગ્રી સે. માં દોડવાની મજા આવી પણ વચ્ચે વરસાદ નડી ગયો. નવાં શૂઝ અને મોજાં આવ્યા એટલે આજકાલ દોડવાનું પણ જોશમાં ચાલે છે, સાયકલિંગ ઠંડુ છે, પણ કાલે “રાઇડ અગેઇન્સ્ટ કરપ્શન”માં ૧૦૦ કિમીનો પ્લાન છે (એમ તો રાઇડ તો ૨૦ કિમીની છે, પણ આવવા જવામાં ૭૦ વત્તા દસેક બીજા કરી દઇશું).

* કવિનના વેકેશનનાં છેલ્લાં દિવસો છે. આ વખતે દિવાળીમાં મજાથી ફટાકડા ફોડ્યા. પોલ્યુશન કર્યું અને નોઇઝ પોલ્યુશન પણ. વળી, કોઇકના મુજબ લાઇટ પોલ્યુશન પણ. ઢગલાબંધ મિઠાઇઓ (ઘરનું મગસ, બહારનો મુંબઈ હલવો વગેરે) ખાઇને બીજા પ્રકારનું પોલ્યુશન પણ કર્યું હશે જે અમે તો અનુભવ્યું નથી, પણ જેણે અનુભવ્યું હોય એના નશીબ!

* દિવાળીની બીજી મહત્વની ખરીદી કરી – નવો બેલ્ટ. જૂનાં બેલ્ટમાં કાણાં પડાવવા (ઢીલા પડતાં બેલ્ટ માટે) એના કરતાં નવો સરસ બેલ્ટ લીધો. એમાં વળી હજુ પણ વજન (અને કમર) ઓછું થાય તો એક કાણું હાજર છે જ એટલે થોડા વર્ષો સુધી ચિંતા નથી 😉

ફિલમ: ધ હેટફુલ એઇટ

image

ઓકે. મોડી પોસ્ટ છે, પણ મોટી નથી એટલે વાંધો નહી આવે. થયું એવું કે એક સાન ફ્રાન્સિસ્કોની સાંજે હું કંટાળતો હતો ત્યારે નિર્ઝાર અને પાઉએ કહ્યું કે અમે મુવી જોવા જઇએ છીએ. તો આપણે આ તક ઝડપી લીધી અને બાહ્ય દેશમાં ફિલ્મ જોવાનો પ્રથમ અનુભવ લીધો. તેમજ, આટલો મોડો શો પણ પહેલી વાર.

ફિલ્મ જો ટારાન્ટિનોની હોય ત્યારે શરૂઆત ધીમી થાય પણ પછી જામતી જાય. જોકે અહીં બેકગ્રાઉન્ડમાં બરફ વત્તા ઠંડી લાગવાને કારણે હું પણ જામી ગયો. સેમ્યુઅલ જેક્સન દર વખતની જેમ રંગ જમાવે છે. હિંસા, વધુ હિંસા અને છેવટે લોહીની છોળો ન ઉડે તો ટારાન્ટિનોનું નામ બગડે.

ખાસ નોંધ:
1. અહીં ઇન્ટરવલ હોતો નથી.
2. વહેલા તે પહેલાના ધોરણે સીટ લઇ લેવાની.
3. થિયેટરમાં પણ આઠ જણાં જ હતા.
4. ફિલ્મનું સંગીત સરસ છે.

રેસ રિપોર્ટ: સિસ્કિયુઆઉટબેક ૫૦ માઇલ

* લોંગ પેન્ડિંગ લોંગ રેસ રિપોર્ટ!

આમાં થયું એવું કે ઓફિસની ઓલ હેન્ડ્સ મિટિંગ વખતે આપણે રનિંગ ઉપર લાઇટનિંગ ટોક આપેલી. એ વખતે ઓફિસમાં ડેઈઝી જોડે પરિચય થયો અને એ પણ દોડવીર. તેણે સૂચન આપ્યું કે વિકિમેનિઆ પછી આ રેસ દોડી શકાય. બધું વ્યસ્થિત પ્લાન થયું અને મેક્સિકોથી સાન ફ્રાન્સિસ્કો પહોંચી ગયો. ત્યાંથી લગભગ ૫.૩૦ કલાકની રોડ ટ્રીપ પછી ઓરેગોનમાં આવેલા એશલેન્ડ પહોંચ્યા. સરસ રસ્તો અને પહેલી વાર અમેરિકામાં આટલા લાંબા સમય માટે ગાડીમાં બેઠો (એરપોર્ટ શટલ કે ટેક્સી સિવાય!). ત્યાં પહોંચીને એક દિવસ આમ-તેમ ફર્યા, આરામ કર્યો.

રેસની શરુઆત ૬ વાગે હતી. ડેઈઝીએ છેલ્લી ઘડીએ ૫૦ માઇલમાંથી ૫૦ કિમીમાં કૂદકો માર્યો (મારે પણ એમ કરવા જેવું પણ આપણે અડગ મનના ગુજરાતી એટલે પાછાં ન પડીએ!). હવે ત્યાં પહોંચ્યા ત્યારે સરસ ઠંડક હતી. રેસની શરુઆત જ ૪૫૦૦ ફીટ પર હતી એટલે ઉંચાઈ વર્તાતી હતી.

રેસ એકદમ સમયસર શરુ થઇ અને લગભગ બે કિમી પછી સરસ ઉંચાઇ આવવાની શરુઆત થઇ. માઇલ મને બહુ લાંબા લાગે. અને આ અમેરિકનો મેટ્રિક સિસ્ટમમાં માને નહી. પહેલાં સ્ટેશન પર પહોંચ્યા પછી થોડું સારુ લાગ્યું અને બીજા સ્ટેશન પર પહોંચ્યો ત્યારે ૨૪ કિમી સુધી બહુ ઠીક હતું. પછીનાં ૧૬ કિમી મસ્ત ચઢાણ અને ઉતરાણ હતું એટલે ધીમો પડ્યો. ૩૦ કિમી સુધી તો મને લોકો સામે આવતાં મળ્યાં (૪૦ કિમી પૂરા કરીને). ૩૫ કિમી પછી મસ્ત ચઢાણ. ત્યારે લાગ્યું કે હવે મુશ્કેલ બને છે. ૫ કિમી તો લગભગ સીધાં ચઢાણ. ઉપર પહોંચીને વળી બિગ રોક નામનો ખડક. હા, આ દરમિયાન હું કેલિફોર્નિઆમાં આવી ગયો હતો!

બિગ રોકથી વળતી મુસાફરી ઓકે રહી. ફરી સ્ટેશન પર અને પછી લાગ્યું કે હવે કદાચ સમયસર પૂરુ નહીં થાય. હા, રેસમાં અમુક અંતરે પણ કટ-ઓફ હતાં. છેવટે ૪૬ થી ૫૬ કિમી માત્ર દોડવા ખાતર દોડ્યો-ચાલ્યો અને ૫૬ કિમીએ હું પહોંચ્યો ત્યારે કટ-ઓફ સમય પસાર થઇ ગયો હતો અને મારી આ રેસનો કરુણ અંત આવ્યો.

પણ.. પણ..

૧. મજા આવી.

૨. આવતાં વર્ષે (મેળ પડે તો) ૫૦ માઇલ પૂરા કરવા છે.

૩. ટી-શર્ટ સરસ મળી. આવતાં વખતે – વોટર બોટલ, મગ, બોટલ ઓપનર – લઇને જ આવવાનાં!

🙂

અપડેટ્સ – ૧૬૯

* છેલ્લી પોસ્ટમાં લખ્યું તેમ અહીં બહુ દોડા-દોડી રહે છે. એકાદ વખત સારું એવું દોડાયા પછી બહાર દોડવાનું બંધ છે. બે વખત જિમનો આંટો માર્યો પણ મજા ન આવી. હવે દોડવાનું થશે, લાંબી દોડમાં. ચોક્કસ, એ રીપોર્ટ લાંબો અને મજાનો હશે.

* વિકિમેનિઆ પછી એક દિવસનો બ્રેક લઇને અહીંના પિરામીડ જોઇ આવ્યા. સરસ જગ્યા. પિરામીડ ચડવાની મજા આવી અને સાથે-સાથ ટકિલાનો ટેસ્ટ પણ કર્યો.

* સાથે-સાથ લોકલ માર્કેટમાં પણ જઇ આવ્યા. અહીં બધાંને ખોપડીઓનો બહુ ક્રેઝ લાગે છે 🙂

* એકંદરે મુલાકાત સારી રહી છે. હવે જોઇએ શું થાય છે. વેજિટેરિયન્સને દરરોજ શું ખાવું એ પ્રશ્ન તો હોય જ!

હોલા મેક્સિકો!

* લાંબી મુસાફરી, લેટ ફ્લાઇટ (ખરેખરમાં ફ્લાઇટો), ન્યૂયોર્કમાં બોરિંગ ૯+ કલાક અને જ્યાં અલ ચેપો હવે છૂટો ફરે છે એવી મેક્સિકો સીટીમાં આવી પહોંચ્યો.

* પહેલો દિવસ નાનકડો પિરામીડ જોવામાં, આજુ-બાજુ રખડવામાં અને ઉંઘવામાં ગયો. હજુ પ્રેઝન્ટેશન બનાવવાનું બાકી છે, પણ નિયમ મુજબ તે આગલાં દિવસે જ બનશે 😀

* આજે હેકેથોનનો પહેલો દિવસ છે. અને, સવારમાંજ ધવલભાઇની સરપ્રાઇઝ મુલાકાત થઇ. દોડવાનો કાર્યક્રમ આજ પૂરતો તો પડતો મૂકવામાં આવ્યો છે. આ શહેર સમુદ્રથી ૭,૦૦૦ ફીટની ઉંચાઈ પર છે, એટલે આગલી દોડ માટે અનુકુળ થઇ જવાશે.

* વિગતે પોસ્ટ કાલે કે પરમ દિવસે.

અપડેટ્સ – ૧૬૭

* લોંગ ટાઇમ, નો અપડેટ્સ!

* હવે ફરી પાછું રનિંગ પર ધ્યાન કેન્દ્રિત કરવામાં આવ્યું છે. કારણ? સિસ્કિયુ!

* એટલે કે, આવતા મહિને ફરી પાછી લાંબી સફર. બોરિંગ. પણ, અંતે નવી જગ્યાઓ જોવા મળે અને નવાં લોકોને મળવાનું થાય એ વાતનો આનંદ.

* વેકેશન હવે ખતમ થવાં આવ્યું છે (એટલે કે કવિનનું) એટલે ફરી પાછી થોડાં દિવસ દોડા-દોડી રહેશે.

* આજનો પીજે:

એક ભાઇ: બીજું શું નવિનમાં?

હું: આ નવિન કોણ છે? 🙂

હેન્રીની કેબ

ખાસ નોંધ: આ પોસ્ટ ઓ.હેન્રી વિશે નથી 😉

થયું એવું કે ડલ્લાસથી પાછાં આવતી વખતે ચિંતનના ઘરેથી એરપોર્ટ (DFW) જવાનું હતું. આગલી રાત્રે ટેક્સી માટે ગુગલમાં શોધ કરી તો આ હેન્રીભાઇની કેબ સેવા સસ્તી અને સારી લાગી. ઓનલાઇન ફોર્મનો ઉપયોગ કર્યો. પહેલી વખત પ્રયત્ન કર્યો તો સફળ ન થયો (કારણ? એડબ્લોક, નો સ્ક્રિપ્ટ, વગેરે કિટાણુંઓ). બીજી વખત પ્રયત્ન સફળ થયો પણ હું વેલિડ યુએસ ફોન નંબર આપવાનું ભૂલી ગયો (મેન્ડેટરી ફિલ્ડ હોવા છતાંય!) અને તારીખ ખોટી આપી (ફેબ્રુઆરીની જગ્યાએ જાન્યુઆરી!) તોય ફોર્મ સબમિટ થઇ ગયું અને સક્સેસ! નો મેસેજ સ્ક્રિન પર આવ્યો. ખાતરી કરવા માટે ચિંતને ફોન કર્યો તો હેન્રી વાળાઓએ કહ્યું કે તમે જો ફોર્મ સબમિટ કર્યું હશે તો ટેક્સી બૂક થઇ ગઇ છે. ઓહ. એમ?

થોડી વાર પછી ઇમેલ આવ્યો કે અમુક માહિતી ખૂટે છે (ઉપર જણાવેલ). મેં જરુરી વિગતો મોકલી અને લખ્યું કે ટેક્સી કન્ફર્મ થાય તો મને વળતો ઇમેલ કરજો. રાત્રે મોડા સુધી ઇમેલ ન આવ્યો તો મેં ફરી ઇમેલ કર્યો. જવાબ ‘હા’ આપ્યો હોય તો ચાલત, પણ અહીં જવાબ આવ્યો…

The last question on your reservation form states that once you press the submit button, you can consider that your confirmation that you are on the schedule.

બોલો. બે-ત્રણ વખત વાંચ્યુ ત્યારે ખબર પડી કે હેન્રીવાળાઓએ હા પાડી છે 😀

બીજા દિવસે ટેક્સી સમયસર આવી, ડ્રાઇવર પણ મદદરુપ હતો અને સરવાળે આરામથી એરપોર્ટ પહોંચ્યો અને અમેરિકન બર્ગર ખાધું.

અપડેટ્સ – ૧૬૦

* હેલ્લો ઇન્ડિયા. (અને, હેલ્લો નો લગેજ પણ!) લગેજ મોડા પડવાની શક્યતા તો હતી, કારણ કે ડલ્લાસ થી એટલાન્ટા અને એટલાન્ટા થી એમસ્ટરડેમ થી મુંબઇ. ખાસ કરીને એમસ્ટરડેમમાં બે ફ્લાઇટ વચ્ચે ૪૦ મિનિટ કરતાં પણ ઓછો સમય હતો. સદ્ભાગ્યે કોઇ ફ્લાઇટ મોડી નહોતી, નહીતર નો લગેજની જગ્યાએ નો કાર્તિક હોત. એટલે કે, મોડો-મોડો કાર્તિક એમ કહેવાત.

* થાને હિરાનંદાની હાફ મેરેથોનની તારીખ જતી રહી છે, પણ વાંધો નહી. બહુ થઇ ગયું દોડવાનું. એટલે, ફરી પાછાં મુંબઇ-નાસિક-મુંબઇની સાયકલ સવારી કરીશું (અને, આ વખતે પૂરી પણ કરવામાં આવશે!). કસારાઘાટ, સાવધાન!

* કદાચ પહેલીવાર કવિન માટે કોઇ જ ટોય-રમકડું લાવ્યો નથી, પણ કવિને ટેમ્પરેચર ગુમાવ્યું નહી. શાબાશ, કવિન 😀

* વન પ્લસ વાળા ઢગલાબંધ આમંત્રણો મોકલ્યા કરે છે.

* બીજું શું? કામ-કાજ ફરી પાછું શરું. જોકે સરવાળે ૪ દિવસ કોન્ફરન્સ, ૭ ફ્લાઇટ્સ, લે-ઓવર, ખોવાયેલ સામાન, જેટ લેગ, ઠંડી, મેરેથોન અને ટેન્શન – વજન એટલું જ છે 😉

* છેલ્લે. યુગયાત્રા – યશવન્ત મહેતા (લેખ આજે જ બનાવ્યો છે, એઝ યુઝઅલ, કોઇની પાસે યશવંતભાઇનો ફોટો હોય તો, કોમન્સમાં મોસ્ટ વેલકમ!) આવી ગઇ છે. પહેલા વાંચેલી અને રેડિયો પર સાંભળેલી આ વિજ્ઞાન સેમી-નોવેલ મળતાં મને અનેરો આનંદ થયો છે. રીવ્યુ અને અલગ પોસ્ટ આવતી કાલે કે પરમ દિવસે ચોક્કસ!

અપડેટ્સ – ૧૫૯

* શુક્રવારે સાન ફ્રાન્સિસ્કોને બાય-બાય કહ્યું અને ટેક્સાસને હેલ્લો.

* ચિંતન મને એરપોર્ટ પર લેવા આવ્યો. આ DFW બહુ મોટ્ટું એરપોર્ટ છે. ચિંતન આવ્યો એટલે મારી ચિંતા ઓછી થઇ ગઇ. ત્યાંથી તેના ઘરે ગયા જે ટેક્સાસ હાફ મેરેથોનનાં સ્થળ જોડે જ હતું. અને ચિંતને ત્યાં ઘર અઠવાડિયાં પહેલાં જ બદલ્યું એટલે સરસ કોમ્બો.

* શનિવારે ડલ્લાસનાં એક્વેરિયમમાં ગયા. સરસ જગ્યા. પહેલી વાર પેંગ્વિન જોડે ફોટો પડાવ્યો અને ત્યાર પછી પેરોટ સાયન્સ મ્યુઝિયમમાં ગયા. આ પણ મસ્ત જગ્યા છે. ત્રણ-ચાર કલાક તો આરામથી નીકળી જાય. નીકળતી વખતે સારો એવો વરસાદ આવતો હતો એટલે મને ટેન્શન થઇ ગયું. પછી થયું, જે થાય તે. એકાદ શોપમાં રનિંગ સંબંધિત વસ્તુઓની તપાસ કરી પણ GU જેલ સિવાય બીજું કંઇ લેવો જેવું ન લાગ્યું. એટલે હવે ડિકાથલોનની મુલાકાત પાક્કી.

* સવારે ચિંતન એરવિંગ કન્વેન્શન સેન્ટર મૂકવા માટે આવ્યો અને રેસ ૮ વાગ્યે શરુ થઇ. આટલા ઓછા (સાડા પાંચસો) લોકો વાળી મારી પહેલી દોડ હતી. ઠંડી અને વરસાદ હતાં નહી પણ પવન સારો એવો હતો. રેસ શરુ થઇ એ પહેલાં સેન્ટરમાં પાણી, કેળાં, હોટ ચોકલેટ! વગેરેની સરસ વ્યવસ્થા હતી. ઓકે. રેસનો રસ્તો મસ્ત. પહેલી હાફ ૧ કલાકમાં સરસ રીતે પૂરી કરી, પણ પછી ૧૪ અને ૧૭ કિલોમીટર પર ડચકાં ખાવાની શરુઆત થઇ એટલે મજા ન આવી. વળી પાછાં, ૫૦૦ મીટર બાકી હતાં જ ત્યારે ડાબા પગે ટેમ્પરરી દગો દીધો. ટોટલ સમય ૨.૦૯.૦૦ રોકડા.

અને મેડલ? મસ્ત.

ટેક્સાસ હાફ

ટેક્સાસ હાફ મેડલ

ઘરે આવી આરામ કર્યો. કદાચ ભારત તરફથી આ રેસમાં દોડવા વાળો હું એકલો જ હતો 😉

* જમીને ટેક્સાસ અરલિંગ્ટન યુનિવર્સિટી જોવા ગયા. ત્યાં કલ્પના ચાવલા મેમોરિયલ જોયું. ૩ડી શો જોયો. જે થોડો ટૂંકો હોત તો મજા આવત, પણ ઓવરઓલ સરસ હતો.

* અમેરિકન એડવેન્ચરનો કાલે અંત આવશે. ફરી પાછી ફ્લાઇટ્સ બદલવાની મગજમારી થશે, પણ ઘરે પહોંચવાનો આનંદ? 😀

ખાસ નોંધ: આ પોસ્ટ અમેરિકન સમય પ્રમાણે લખવામાં આવેલ છે!