અપડેટ્સ – ૨૩૬

કીપ કામ અને કામથી કામ રાખો. કશું જ સારું નથી.
  • અપડેટ્સમાં આપવા જેવું તો ઘણું છે, પણ સાચું કહું તો બ્લોગ પર આવવાનું હવે બહુ મન થતું નથી. કોવિડ-૧૯ હજુ છે અને આ વખતે કોવિડે ખરો પરચો બતાવ્યો. કોઇકે ક્યાંય લખ્યું હતું કે “જ્યાં સુધી જંગલની આગ ઘર સુધી ન આવે ત્યાં સુધી તે અફવા જ લાગે”. એવું જ થયું જ્યારે મારા મોટા મામાનું કોવિડમાં અવસાન થયું. ખરી પરિસ્થિતિનો ખ્યાલ આવે ત્યાં સુધી બહુ મોડું થઇ જાય છે.
  • થોડા સમયથી વિકિપીડિયામાં પાછો સક્રિય થયો છું (એમ તો હું ક્યાં નિષ્ક્રિય હતો?) પણ હવે મોટાભાગનો સમય ક્ષતિઓ સુધારવામાં કાઢ્યો છે.
  • સાયકલિંગ પણ ફૂલ્યું-ફાલ્યુ છે. ગયા વર્ષનું બાકીનું કામ એવરેસ્ટિંગ પૂરુ કર્યું. ૨૦ કલાક ઇન્ડોર ટ્રેઇનર પર, ૨૨૯ કિમી અને ૮૯૦૦ મીટર જેટલું એલિવેશન. વધુમાં મારા જીવનનો સૌ પ્રથમ યુટ્યુબ ઇન્ટરવ્યુ પણ આપ્યો, જે નીચેના વિડિયોમાં જોઇ શકાશે. જો કોઇ કારણોસર એમ્બેડેડ કરેલો વિડિયો ન દેખાય તો vEveresters of India : Grinshina & Kartik પર તમે તેને જોઇ શકશો. મારો અવાજ રોબોટિક લાગે છે. વધુ પડતા સાયન્સ ફિક્શન મુવીઝ જોવાનું પરિણામ હશે?
  • લોકડાઉન ચાલુ છે, અને લાગે છે કે ચાલુ જ રહેશે. ત્યાં સુધી – ઘરમાં રહો, સલામત રહો!

અપડેટ્સ – ૨૩૪

  • હાલમાં અમારી પુસ્તક પાવરી ચાલી રહી છે:
    • સત્યજીત રાયની વિજ્ઞાનકથાઓ
    • સત્યજીત રાયની રહસ્યકથાઓ ભાગ ૧ – ૪
    • સોનાનો કિલ્લો – સત્યજીત રાય
    • ગંગટોકમાં ગરબડ – સત્યજીત રાય
    • કાઠમંડુમાં હાહાકાર – સત્યજીત રાય
    • આગન્તુક – ધીરુબહેન પટેલ
    • વેર વૈભવ – સૌરભ શાહ
    • ક્ષણ-પ્રતિક્ષણ – શિશિર રામાવત
    • ઇકિગાઇ – ગુજરાતી આવૃત્તિ
    • સેપિયન્સ – યુવલ નોઆ હરારી.
  • વચ્ચે-વચ્ચે થોડું સાયકલિંગ-રનિંગ આવી જાય છે.
    • ફેબ્રુઆરીમાં ૬૦૦ પછી ૧૫૦+૧૦૦ કિમીની સરસ કોમ્બો બી.આર.એમ. કરી જેનો વિગતે રીપોર્ટ લખવાનો રહી જ ગયો પણ ત્યાં મજા આવી ગઇ. ત્યાર પછી કંઇ ખાસ સાયકલિંગ કર્યું નથી. હવે માર્ચ-એપ્રિલમાં બે નાઇટ બી.આર.એમ. (જો રદ ન થાય તો!) કરવામાં આવશે. પછી, જૂન પછી ફરી વ્યવસ્થિત સાયકલિંગ શરુ કરીશ.
    • સાયકલિંગ ગ્રૂપો નવાં-નવાં સાયકલિસ્ટોથી ઉભરાતા જાય છે. જોકે આ સોડાઓનો ઉભરો શમતા બહુ વાર નહી લાગે!
    • રનિંગ ચેલેન્જ ખાતર કરી રહ્યો છું, પગ હજુ બરાબર દોડતા નથી 🙂
    • હા, બે દિવસ પહેલાં સિલ્વર બીચ પર સ્વિમાથોનમાં વોલિયન્ટર તરીકે કામ કર્યું. મઝા આવી. હવે, સ્વિમિંગ ક્યારે શરુ કરવું એ નક્કી કરવાનું બાકી છે.
  • હેથ-વેનું ઇન્ટરનેટ વાર-તહેવારે ડચકાં ખાય છે એટલે નવા પ્રોવાઇડરની શોધ કરવી પડશે તેમ લાગે છે.
  • બાકી, શાંતિ છે!!

અપડેટ્સ-૨૩૩

  • ઘણાં વખતે અહીં પાછો ફર્યો છું. તો, સાથે મોટી અપડેટ્સ પણ લાવ્યો જ હોઇશ એવી આશા રાખતા હોય તો – માફ કરજો 😉
  • નવેમ્બરમાં ૨૦૦, ૪૦૦ અને ૧૦૦ બી.આર.એમ. કરી. ત્રણેયમાં મજા આવી. એમાંથી ૧૦૦ બી.આર.એમ. ઓર્ગેનાઇઝર તરીકે બે દિવસ પહેલા કિરણ સાથે કરી અને ૧૦૦ ના દિવસે વોલિયન્ટરીંગ કર્યું. હવે ખબર પડી કે કેટલી ધીરજ રાખવી પડે છે અને લોકો કેવી-કેવી માગણીઓ કરે છે. તેમને ખબર નથી કે બી.આર.એમ. એ સેલ્ફ સપોર્ટેડ ઇવેન્ટ છે અને ઓર્ગેનાઇઝર્સને ઠંડું પાણી કેમ નથી અને આટલા બધાં ટેમ્પરેચરમાં મીઠું કેમ નથી રાખ્યું જેવા લેક્ચર્સ ન અપાય. અને હા, આ સાથે બી.આર.એમ.ની કુલ સંખ્યા ૫૦ (અંકે પચાસ રોકડા પૂરા) ને પાર કરી ગઇ. વધુ ૩ બી.આર.એમ. ડિસેમ્બરમાં આવે છે. લા, લા, લા, લા, …
  • રનિંગ ફરી શરુ કર્યું. નવેમ્બરમાં છેલ્લે છેલ્લે સીધું જ ૨૧ કિમી દોડ્યો અને બે દિવસ પગ ટાઇટ થઇ ગયા અને રોબોટની જેમ ચાલ્યો. આજે ફરી ૧૦ કિમી કર્યા પછી થોડી રાહત થઇ છે..
  • ગુજરાતી વિકિપીડિયામાં અમે એક એડિટોથોન રાખી હતી જે ૧૫ દિવસ ચાલી હતી. તેનો અહેવાલ અહીં જોઇ શકાશે. ગુજરાતી સંસ્કૃતિ વિશેના સરસ લેખો બન્યા છે.
  • દિવાળી વેકેશન આજથી પૂરુ થયું છે અને હવે ક્રિસમસ વેકેશનની રાહ જોવાય છે. છેવટે, જીવન એ બે વેકેશન વચ્ચેનો વધારાનો સમય જ તો છે 😉

મારા લોકડાઉન અપડેટ્સ – ૭

આ વખતના લોકડાઉન અપડેટ સચિત્ર છે.

૧. કવિન હવે મોટો થઇ ગયો છે. ઊંચાઇમાં મારા કરતા થોડો જ બાકી છે. લગભગ ૩-૪ સે.મી. ૨. નવું લેપટોપ ડેબિયન સાથે રેડી છે. ૩. ગયા અઠવાડિયે ૧૨ કલાક ઇન્ડોર રેસ કરી. ૩૩૩.૪ કિમી કર્યા, જે ટારગેટ કરતા ૧૬.૬ કિમી ઓછા પડ્યા. ૪. ટ્રાય કલર સ્મૂધી સાથે ૧૫મી ઓગસ્ટ મનાવી. ૫. બ્રેકફાસ્ટ ૬. નાનું પોચું પક્ષી. ૭. નાની પોચી બિલાડી!

વર્ક ફ્રોમ હોમ

છેવટે, વર્ક ફ્રોમ હોમનો બેજ અમને મળ્યો ખરો. ૧૪ દિવસ સુધી દરરોજ સાયકલ ચલાવ્યા પછી! ઝ્વિફ્ટમાં કોવિડ-૧૯ યુગ પહેલા આ બેજનું નામ અનએમ્પલોયડ હતું. અને, ઘણા લોકોને એવું જ લાગતું હતું કે આ માણસ કામ કરે છે કે ખાલી સાયકલ જ ચલાવે છે 😉

ચેન્જલૉગ

આમાં લોકોને બદલવાની વાત નથી, કારણ કે લોકો (લોગ) તો બદલાશે નહી. પણ ગુગલ ક્રોમ જેવી એપ પણ તેમાં શું ફેરફારો કર્યા તે ન દર્શાવે ત્યારે બીજી એપ્લિકેશન કે ઓપરેટિંગ સિસ્ટમ પર કેટલી આશા રાખી શકીએ?

અન્ય ચેન્જમાં નવું થિંકપેડ X1 લેપટોપ આવી ગયું છે એટલે તેના પર ડેબિયન મૂકીને પછી સરસ ફોટો મૂકવામાં આવશે. બાકી, શાંતિ છે.

અને હા, મહત્વની વાત: જય શ્રી રામ!

મારા લોકડાઉન અપડેટ્સ – ૬

એમ તો ટેકનિકલી લોકડાઉન નથી, પણ અમે લોક્ડ છીએ. એટલે કે અર્થહીન રખડપટ્ટી નથી કરી રહ્યા અને હજુ પણ ઘરમાં જ વર્ચ્યુઅલ રાઇડિંગ કરીએ છીએ.

ગુગલ ફોટોસ, ફેસબૂક, જીમેલ, વર્ડપ્રેસ – આ બધાંએ ચૂપચાપ પોતાની ડિઝાઇન અને વર્કફ્લો બદલ્યો અને અમે હજુ તેમાં ફાંફા મારીએ છીએ. ખાસ કરીને ગુગલ ફોટોસ વાળાએ ફોટા ક્યાં ગયા તે શોધવું અઘરું કર્યું છે.

નવાં નોઇઝ કેન્સલેશન હેડફોન (સોની WH-CH700N) લેવામાં આવ્યા છે, જે હજુ લિનક્સ જોડે કામ કરતાં નથી. થોડો પ્રયત્ન કર્યો છે, પણ સફળતા મળી નથી. આ ગાઢ પ્રયત્નમાં સફળ થયા પછી તેના પર વ્યવસ્થિત રીતે હાઉ-ટુ લખવામાં આવશે.

પુસ્તકોમાં જોઇએ તો વાત-વાતમાં પ્રિમા અને કુનાલ જોડે વાત નીકળી અને પેલું ભેદી ટાપુ પુસ્તક મંગાવ્યું અને પછી ખબર પડી કે આ પણ જે જોઇતું હતું તે ભાષાંતર તો (મૂળશંકર મો. ભટ્ટનું) નથી. લો. વેલ, વધુ માહિતી માટે મારી પેલી સાહસિકોની સૃષ્ટિ પોસ્ટ અને તેની કોમેન્ટ્સ વાંચશો તો મજા પડી જશે. (જો મને આ યાદ હોત તો આ એકસ્ટ્રા શોપિંગ ન થાત ;)) પણ, આ ભેદી ટાપુઓ (દા.ત. હાલમાં વાટોપિયા) જીવનમાં ફરી-ફરીને આવતો જ રહે છે!

તૂટેલો સ્ટેક

ઉપરોક્ત છબી છે લોકડાઉન દરમિયાનના મારા ડેબિયન યોગદાનોની. એક ચોરસ ખાનું એક દિવસ દર્શાવે છે અને આછા થી ઘાટો રંગ ગીટ કમિટની આવૃત્તિ દર્શાવે છે. ૧૬ માર્ચથી શરૂ થયેલો આ ક્રમ ૨૧ મે ના રોજ તૂટ્યો છે અને પછી તો કંઇ ખાસ કામ બાકી રહેતું ન હોવાથી અહીં થોડો વિરામ લીધો છે.

હવે એક અઠવાડિયામાં ૩૬૨ કિમી અને ૧૦,૦૦૦+ મીટર ઊંચાઇનું સાયકલિંગ કરવાનું છે એટલે ડેબિયનને થોડો આરામ આપીએ તો સારું. વચ્ચે-વચ્ચે એકાદ-બે બગ્સ પર થોડું ધ્યાન આપી દઇશું. ત્યાં સુધી, વાટોપિયા ઝિંદાબાદ!

મારા લોકડાઉન અપડેટ્સ – ૨

હવે લોકડાઉન લંબાયું છે એટલે પહેલાં અપડેટ્સ પછી આવ્યો છે આ પ્રકારના અપડેટ્સનો ભાગ ૨! આ ભાગમાં કંઇ ખાસ નથી, છતાં જાહેર જનતાને જણાવવાનું કે અમે ઘરમાં જ છીએ અને સલામત છીએ. સાયકલ ચલાવીએ છીએ, કામ કરીએ છીએ અને મસ્ત વાનગીઓ ઝાપટી રહ્યા છીએ.

રસોઇઘરમાં ડોકિયા કરવાનાં થોડા વધુ પ્રયત્નો કર્યા છે, પણ મને ધાર્યા કરતા આ કામ બહુ અઘરું લાગે છે. ખાસ કરીને મારા જેવા અનફોકસ્ડ વ્યક્તિ માટે! છતાં પણ, ત્રણ દિવસ સુધી અલગ-અલગ વસ્તુઓ બનાવી શકું એટલું તો શીખવું છે જ. હા, રસોડાનું પ્લેટફોર્મ સાફ કરવામાં અને પોતું કરવામાં માસ્ટરી આવી રહી છે.

સાયકલિંગ સારું ચાલે છે. દર અઠવાડિયે ૨૦૦ થી ૨૫૦ કિમીની સાથે સારું એવું ક્લાઇમ્બિંગ વત્તા FTPમાં સુધારો-વધારો થયો છે. બીજી કસરતો માત્ર સ્ટ્રાવાની ચેલેન્જીસ પૂરી કરવા કરી રહ્યો છું, પણ તે પણ થોડો ફાયદો તો કરાવે છે જ. અને હા, માર્ચ ૧૩ થી અત્યાર સુધી લગભગ ૧૧૦૦ કિમીનું સાયકલિંગ થયું છે, એટલે મજા તો છે જ! વધુમાં જો તમે ઝ્વિફ્ટ વાપરતા હોવ તો રાઇડના પૃથ્થકરણ (એનાલિસિસ!) માટે ઝ્વિફ્ટપાવર.કોમ સરસ ફોરમ-વેબસાઇટ છે. મોટાભાગની રેસ તેમાં આવેલા પરિણામને જ ફાઇનલ ગણે છે.

લોકડાઉનમાં વસ્તુઓ બગડવાની પરંપરા ચાલુ રહી છે. ડ્રોઇંગ રૂમનું ટેબલ, રસોડાનો માઇક્રો ફેન, પડદાની પાઇપનું સ્ટેન્ડ, કાંસકા મૂકવાનું બોક્સ. હજુ આટલું જ છે. આમાંથી ટેબલ ફેવિકોલ વડે ટેમ્પરરી ફિક્સ કર્યું છે. ફેવિક્વિક વડે કાંસકાનું સ્ટેન્ડ મજબૂત રીતે ચોંટાડ્યું છે અને સેલોટેપથી પડદાની પાઇપ લગાવી છે. હવે ફરીથી રાત્રે બે વાગે પડદો ન પડે તો સારું છે 😉 અમેરિકાની જેમ હવે ડુ-ઇટ-યોરસેલ્ફ અહીં પણ પ્રચલિત થશે.

મિત્રો સાથે હેંગઆઉટ-ઝૂમ-ડ્યુઓ-વોટ્સએપ કોલ્સની મઝા લીધી છે, પણ ઓફિસની મિટિંગોની જેમ હું જરૂર હોય ત્યારે જ મિટિંગમાં બોલું – એવી આદતને લીધે આ બધું હજુ ફાવતું નથી 😀

વોટ્સએપ યુનિવર્સિટીના સ્નાતકોની જેમ ટ્વિટર યુનિવર્સિટીના માસ્ટરોનો કાળો કેર છે. આપણે તો સ્ટ્રાવાના પીએચ.ડી. વાળા વિદ્યાર્થી છીએ એટલે વાંધો નથી આવ્યો 🙂

અપડેટ્સ – ૨૩૩

અપડેટ્સ – ૨૩૨ પછી ઘણા સમયે આવી અપડેટ્સ પોસ્ટ આવી રહી છે..

કોરોના વાયરસે કાળો કેર મચાવ્યો છે. વોટ્સએપ યુનિવર્સિટીના સ્નાતકોએ તેનાથી પણ વધુ કોહરામ મચાવ્યો છે, એટલે સાચવીને રહેવું. સદ્ભાગ્યે, અહીં ટોયલેટ પેપરની કોઇ કમી નથી.

જ્યારે જ્યારે મને એમ લાગે કે માનવતા મરી પરવારી છે, ત્યારે ઇન્ટરનેટ પર આવી પોસ્ટ જોઇને મારી માન્યતા ખોટી પડે છે!

દોડવાનું બંધ છે, કારણ કે ઘણાં ઘણાં સમયે ઢીંચણમાં કંઇક દુખાવો શરૂ થયો છે. કદાચ ગયા અઠવાડિયે પેલી ફાસ્ટ ૩૦૦ કિમી બી.આર.એમ. અથવા તેના પહેલાંના સળંગ રનિંગનું પરિણામ હોઇ શકે છે. અને હા, સાયકલિંગ પણ ઇન્ડોર જ ચાલે છે. હાલમાં તો હું લંડન, ન્યૂ યોર્ક અને વાટોપિયામાં સાયકલિંગ કરી રહ્યો છું – ઝ્વિફ્ટ ઝિંદાબાદ! 😉

PS: કાલે ટુર ઓફ વાટોપિયા રેસનું સ્ટેજ – ૩ છે.

PS II: કવિનને પરીક્ષાઓ રદ્ થઇ છે, પણ ટ્યુશન ક્લાસીસ હજુ ચાલુ છે, જે પણ ટૂંક સમયમાં બંધ થાય તેવું લાગે છે. સદ્ભાગ્યે, તેના હાથમાં કિંડલ આવ્યું છે અને તે હેરી પોટર સીરીઝ ફરી વાંચી રહ્યો છે..