* વર્ષો પછી ૨૩ કલાક લાંબી ટ્રેન મુસાફરી-પ્રવાસ-સફર કર્યો, અને એ પણ સ્લિપર કોચમાં. ટ્રેનમાં સૌથી વધુ મિસ થયેલી વસ્તુ હોય તો, એ છે — ઓશીકું, જે બિચારું દુકાનમાં જ પડ્યું રહ્યું.
ટ્રેનમાં મને બીજી વસ્તુ વગર ન ચાલે — ચશ્માનું બોક્સ. જો તમે ચશ્મા ધરાવતા હશો તો, મારી જોડે સહમત હશો કે પછી તમે લાંબી મુસાફરી નહી કરી હોય!
બોધપાઠ: ઓશીકું લઇને જ જવું (અથવા ૩-એસીમાંથી ખેંચી લેવું ;)).
* લોંગ પેન્ડિંગ કામ પૂરા કરવાનું અઠવાડિયું – નવા ચશ્મા (આનંદની વાત, નંબર ઓછાં થયાં!!), પાન સિંગ તોમર, બેટર હાફ (સીડી), અને સ્ટિવ જોબ્સની ઓફિશિઅલ બાયોગ્રાફી. જોકે એક-બે ચેપ્ટર પરથી મને ભાષાંતરમાં મજા ના આવી. પૂરી વાંચ્યા પછી, એક રીવ્યુ પોસ્ટ પાક્કી.
* જ્યારે પણ વેકેશનનો મૂડ હોય ત્યારે જ ભયંકર કામ આવી પડે છે – આવું કેમ? ;)
* હવે દરરોજ અડધો કલાક, ફરજિયાત વાંચન અને, અડધો કલાક કંઈક નવું શીખવામાં ગાળવો એમ નક્કી કર્યું છે, જોઈએ છીએ ક્યાં સુધી ચાલે છે, આ વસ્તુઓ. એમાંથી પહેલો અડધો કલાક કોમ્પ્યુટર બંધ રાખવાનું પણ નક્કી કર્યું છે, જે મુશ્કેલી ભર્યું છે. બાકી અત્યારે coursera.org ના cs101 ક્લાસ પણ ચાલુ કર્યા છે. જો તમને રસ હોય તો સ્ટેનફોર્ડ અને બીજી યુનિવર્સિટીઓ ઓનલાઈન કોર્સ ચલાવે છે. (સર્ટિફિકેટ વગેરે મળશે નહી, એટલે શીખવાની ઈચ્છા હોય તો જ જોડાવું. બાકી એસાઈન્મેન્ટ, ક્લાસવર્ક બધું નિયમિત કોલેજ જેવું જ!).
* વિકિએકેડમી સફળતાપૂર્વક સંપન્ન થઈ. વધુ વિગતો માટે, દિવ્ય ભાસ્કરનો આ લેખ જોવો. જોકે લેખ લખનારે લોચા તો માર્યા જ છે.
* કવિનની સાયકલના સાઈડ ટાયર્સ કાઢી નાખવામાં આવ્યા છે, કારણ કે એને હવે ટુ-વ્હીલર્સની સાયકલની જીદ પકડી છે. હવે દરરોજ મારે તેની પાછળ દોડવાનું પાક્કું (પેલું દોડવાનું તો એકસ્ટ્રા ગણાશે ;))
* આવતા શનિવારે ૧૦ કિ.મી. ની ADR દ્વારા આયોજીત મિડનાઈટ રેસ છે. વધુ વિગતો ડેઈલીમાઈલ.કોમ અને ફેસબુક ઈવેન્ટ પાનાંઓ પર. બધાંને આમંત્રણ છે. એટલે, હવે આ અઠવાડિયું ભારે મહેનત કરવામાં આવશે. રાત્રે મોડા દોડવાનો નવો અનુભવ થશે.
* કેરીની મજા લેવામાં આવી. ઓકે સુધારીને આ રીતે વાંચવું: અત્યંત મોંઘી કેરીની મજા લેવામાં આવી :)
* કવિનની આજે છેલ્લી ‘પરીક્ષા’ હતી. જનરલ અવેરનેસ. અમારી વખતમાં પાંચમાં કે છઠ્ઠામાં એક એકસ્ટ્રા વિષય તરીકે જી.કે એટલે કે જનરલ નોલેજ નામનો વિષય રાખવામાં આવતો, જેમાં મોટાભાગે સામાન્ય જ્ઞાનનાં કોઈ પુસ્તકમાંથી બેઠું ઉઠાવવામાં આવતું. છેક નવમાં સુધી આ ચાલ્યું. પણ, જી.કે.માં આપણે હોંશિયાર એટલે મજા પડતી. દુર્ભાગ્યે આ વિષયને કુલ ગુણમાં ગણવામાં ન આવતાં. એવું જ કોમ્પ્યુટરનું હતું. ત્રણ વર્ષ અમે BASIC પ્રોગ્રામિંગ શીખી-શીખીને કંટાળી ગયા હતા. ૩૨ કેબી અને ૬૪૦ કેબી મેમરી ધરાવતા હાર્ડ ડિસ્ક વગરનાં એ કોમ્પ્યુટર્સ શું ભવ્ય લાગતા હતા :)
* ચશ્માંના નંબર ચેક કરાવવાનો સમય થઈ ગયો લાગે છે. આ વસ્તુ એવી છે કે કેટલાય સમયથી રહી જાય છે.
* આજે થોડો તાવ હોવાથી ઘરે છું – અને હા, કવિને ચશ્માને ફોડવાનો બીજો પ્રયત્ન કર્યો છે.
આ વખતે આક્રમણ કાચ પર થયું છે :(
