ટર્મિનેટર

ટર્મિનેટર

પ્રસ્તુત છે, અમારી નાનકડી ટર્મિનેટર સ્ટોરી. ના, હું કંઇ ભવિષ્યમાં થનારા મશીન v/s માણસોનો યુદ્ધનો નેતા નથી કે નથી પેલો મોડલ T-101. અમે તો છીએ માત્ર એક સરળ અને સીધાં સાદા, જે ડિરેક્ટર બનાવે તેવી ટર્મિનેટર ફિલમો જોનારા અને પછી કોઇ ન વાંચે એવા રીવ્યુ લખનારા.

એમાં થયું એવું કે ૧૯૯૦ના દાયકામાં VCRનો જમાનો હતો અને અમને તેની કેસેટ્સ ભાડે લાવવાનો શોખ ઉપડ્યો હતો. અમે ડાયરીમાં કઇ ફિલ્મો જોઇ એની નોંધ પણ રાખતા. મને યાદ નથી પણ આઠમા કે સાતમા ધોરણમાં ક્યાંકથી (ગુંજ વિડિયો લાઇબ્રેરી? ચોક્કસ નામ યાદ નથી) ટર્મિનેટર-૨ની કેસેટ હાથમાં આવી. નવી નક્કોર પ્રિન્ટ. આપણને તો મઝા પડી ગઇ. ત્રણ દિવસમાં ત્રણ વખત જોઇ ત્યારે સ્ટોરી થોડી સમજમાં આવી. પછી, ટર્મિનેટર ૧ હાથમાં આવી ત્યારે થોડી વધુ સ્ટોરી ખબર પડી. બારેક વર્ષ પછી જ્યારે ટર્મિનેટર ૩ આવી ત્યારે ઘોર નિરાશા થઇ અને જ્યારે ટર્મિનેટર ૪ આવી ત્યારે ક્રિસ્ટીઅન બેલની એક્ટિંગ સિવાય ફિલમમાં કંઇ દમ હતો નહી. ટર્મિનેટર ૫ પછી થયું કે હવે આ ટર્મિનેટર્સ ખરેખર દુનિયાનો નાશ કરે તો સારું. એટલિસ્ટ, આ સીરીઝ તો અટકે!

ટર્મિનેટર્સ ન આવ્યા પણ ટર્મિનેટરની છઠ્ઠી ફિલમ ટર્મિનેટર ડાર્ક ફૅટ આવી અને અમને ફેટવાળી ચીજો પસંદ નથી એટલે બહુ મઝા ન આવી. કવિનને મારા-મારી જોઇને મઝા આવી એવું લાગ્યું. આર્નોલ્ડ હજુ પણ જામે છે, પણ I’ll be back ડાયલોગ ન આવ્યો એટલે લાગ્યું કે હવે આર્નોલ્ડ નિવૃત્તિ લઇ લેશે. પણ, કોને ખબર, પાછો પણ આવે. અને, હા વિકિપીડિયા અનુસાર આના પછી હજુ બીજી ટર્મિનેટર બે ફિલમો આવશે.

હા, આ બ્લોગ પર – I’ll be back. ત્યાં સુધી પોપકોર્ન ખાતા રહેજો!

ફિલમ: ધૂનકી

પ્રતિક ગાંધીની ફિલમ હોય એટલે જોવા જવાનું જ. હું અને કોકી બંને જણાં પ્રતિક ગાંધીના ફેન છીએ. એટલે રીલીઝ પછી આવતા પહેલાં શક્ય સમયમાં ટિકિટ કરાવી દીધી અને મુવી સસ્તામાં પડ્યું (એટલે કે, ક્રેડિટ કાર્ડ ઉપર જે પૈસા ઉડાવ્યા એ રીતે જોઇએ તો). નજીકમાં તો કોઇ થિયેટરમાં અમારા સમય અનુકુળ શૉ હતો નહી અને શનિ-રવિ એટલે આપણે સાયકલિંગમાં બીઝી પણ હોઇએ. રવિવારે સાંજની ટિકિટ મળી. ટકાઉ અને સસ્તા એવા આપણા એક સમયના ફેવરિટ મૉલ રઘુલીલામાં.

ગુજરાતી મુવીમાં સારું. જાહેર ખબર ઓછી હોય. ૫.૪૫ની જગ્યાએ જોકે ૫.૫૫ જેવું શરું થયું અને અમે પોપકોર્ન ન ખાવાનું નક્કી કર્યું હતું. શરૂઆત આપણા જાણીતા એવા સોફ્ટવેર કંપનીના વાતાવરણથી થઇ. હીરો અને હીરોઇન બીબાઢાળ પતિ-પત્નિ કે પ્રેમી-પંખીડા ન હોય અને મિત્ર હોય એ વાત ગુજરાતી ફિલમ માટે નવી નીકળી અને આપણને ગમી. પ્રતિક ગાંધી એક QA એન્જિનિયર તરીકે જામે છે અને પછી સ્ટાર્ટ-અપના સ્ટ્રગલ કરતા ફાઉન્ડર તરીકે પણ જામી જાય છે. દિક્ષા જોશીનો અભિનય પણ સરસ છે. તેના ફિઆન્સ-બોય ફ્રેન્ડ તરીકે હાર્દિક (કોણ છે આ?) ક્યાંથી ઉપાડ્યો છે?

ભાડાનાં ઘરમાં રહેતા લોકો પ્રત્યેની અમદાવાદી માનસિકતા સચોટ રીતે બતાવવામાં આવી છે. ગુજરાત આઇટીમાં હજુ પણ પાછળ છે (“અમારી કંપનીમાં QA જેવી કોઇ પોઝિશન જ નથી”) એ પણ સ્પષ્ટ જણાય છે.

જોવા જેવી ફિલમ. ખાસ કરીને જેને ખાવાનું ભાવતું હોય તેમને 🙂

અપડેટ્સ – ૨૨૭

  • કવિનની પરીક્ષાઓ આવી રહી છે અને મહેનત કોકીને છે. કવિન એક મહિના પછી સ્કૂલે ગયો છે, એટલે હવે તકલીફ તો થવાની છે. સ્પોર્ટસ્ બંધ છે પણ વેકેશનમાં સ્વિમિંગ ફરીથી સાથે કરીશું એટલે મઝા આવશે. હોળી-ધૂળેટી પણ આરામથી જશે એવું લાગે છે. બાજુના આંબા પરથી એક કેરી તોડવામાં આવી છે, એટલે સમર ઇઝ કમિંગ!
  • ફરીથી લાંબો પ્રવાસ આવી રહ્યો છે, જેમાં કપડા ધોવા પડશે. એટલે, મઝા આવશે. ટેકનિકલી, એક અઠવાડિયાના જ કપડા લેવાના. ઉપાડવા કરતા ધોવામાં વધુ મઝા છે 😉
  • ગયા અઠવાડિયે સાયકલની મરમ્મત કરાવી. સપ્ટેમ્બરથી પાછલા ગિયરમાં કંઇક લોચા હતા એમ લાગતું હતું, છેવટે ખબર પડી કે જોકી વ્હિલ્સ ઉલ્ટા-સુલ્ટા થઇ ગયા છે. હવે કંઇક સારું લાગે છે. એ બહાને સહકુટુંબ માસ્ટરમાઇન્ડ અને મુલુંડની મુલાકાત પર લેવાઇ ગઇ.
  • કેપ્ટન માર્વેલ જોયું. સરસ મુવી. ખાસ કરીને જે મુવીમાં બિલાડી હોય એ અમને ન ગમે એવું બને? હવે એવેન્જર: એન્ડ ગેમ જોવામાં આવશે.

સબટાઇટલ્સ

thud thud

નેટફ્લિક્સ અને પ્રાઇમમાં સબટાઇટલ્સને કારણે હવે અંગ્રેજી સાંભળવાનું કાચું થતું હોય એમ લાગે છે. દા.ત. ફિલમમાં કંઇક અવાજ આવતો હોય તો, સબટાઇટલ્સ આવે, thud, thud. પછી રીયલ લાઇફમાં પણ કોઇ બારણા પર ટકોરા મારે ત્યારે મનમાંથી સબટાઇટલ્સ ઉદ્ભવે, thud thud. કોઇ હળવું હસે ત્યારે giggle લખેલું આંખની સામે આવે. અને હા, સેન્સર્ડ સબટાઇટલ્સ તો અહીં લખતો જ નથી 😉

ફ્લાઇટની ફિલમો

આ વખતે સા.ફ્રા.ના ટૂંકા પ્રવાસ દરમિયાન એમિરાતમાં બહુ ફિલમો ડાઝોરવામાં આવી. તેમાં ગુજરાતી ફિલમો જોઇ નવાઇ લાગી.


  1. મિસિંગ. સરસ મુવી. જોકે એક બે ઘડી પર ડિરેક્ટરે થાપ ખાધી હોય તેમ લાગે છે. તબુનો અભિનય સરસ. મોરિશિયસની ભૂગોળ ખબર ન હોય તો થોડું અતડું લાગે.
  2. દો અંજાને. બચ્ચન-રેખાની જૂની ફિલમ. શરૂઆત સરસ. છેલ્લી બે મિનિટમાં જે અંત બતાવ્યો છે એ કદાચ 70ના દાયકાની સામાજિક પરિસ્થતિના દબાણ હેઠળ મૂક્યો હોય એમ મને લાગ્યું.
  3. એજન્ટ વિનોદ. જૂનું. અત્યાર સુધીમાં જોયેલી સૌથી ભંગાર ફિલમ!
  4. અજનબી. હોસ્ટેલના જીવન કાળનું. જે જોવાનું વર્ષોથી બાકી રહી ગયેલું. ઓકે. ઓકે.
  5. Bad times at the El Royale. અલ રોયેલમાં ખરાબ સમય. સરસ લોહિયાળ. સસપેન્સ. અમેરિકન હોટેલ પ્રકારની, પણ વધુ સારી. અભિનય પણ મસ્ત.
  6. જિંદગી ના મિલેગી દોબારા. ધાર્યા કરતા સારા નીકળેલી ફિલમ.
  7. જિવન મૃત્યુ. ધર્મેન્દ્ર. મન અડગ રાખીને જોયેલી અને સારી નીકળેલી ફિલમ.
  8. બાકી રહી ગયેલી ફિલમો: ભાવેશ જોશી સુપરહીરો, થોર, કેશ ઓન ડિલિવરી

અપડેટ્સ – ૨૨૦

* વરસાદ બંધ થયો (જે નવી વસ્તુ છે, કારણ કે સામાન્ય રીતે અહીં નવરાત્રિ સુધી વરસાદ હોય છે) અને અમે આજે પહેલી વાર રસ્તા પર સાયકલિંગ કર્યું અને મુંબઈના રસ્તાઓના ખાડાઓનો અનુભવ પણ લીધો. જોઇએ હવે ફ્રંટ વ્હીલમાં શું તકલીફ થઇ છે! કાલે ખબર પડશે.

* ૧૦ દિવસથી સાયકલ ટ્રેઇનર પર જ પરસેવો પડાય છે. ડોલ ભરાય એટલો પરસેવો! પરસેવો પાડ્યો એને કહેવાય એટલે હવે એક પંખો લાવવો પડશે.

* રનિંગ પણ આજ-કાલ ઓકે છે. ધાર્યા કરતા વધુ થઇ રહ્યું છે, પણ આપણને શું વાંધો છે? 🙂

* શું થયું? અને મિત્રો – થિયેટરમાં જોવામાં આવ્યા. મિત્રો ધાર્યા કરતાં સારુ નીકળ્યું અને શું થયું થોડું લાઉડ અને ઓવરએક્ટિંગના ડોઝ વાળું લાગ્યું, પણ એકંદરે સારું.

* હા, હવે નોટી એટ ફોર્ટી તરફ જઇ રહ્યો છું. મેરેથોનમાં એજ કેટેગરી બદલવાના દિવસો દૂર નથી! 🙂

102 નોટ આઉટ

ગઇકાલે સહ કુટુંબ 102 નોટ આઉટ માણવામાં આવ્યું. 3ડી ન હોય એવી ફિલ્મો જોવાનું વધતું જાય છે એ સારી વાત છે. ચલ મન જીતવા જઇએ પછી લાંબા વિરામ પછી સરસ બ્રેક મળ્યો.

ફિલ્મની આડઅસર રૂપે સૌમ્ય જોશી વિશે ગુજરાતી વિકિપીડિયામાં લેખ અનુવાદ કરી રહ્યો છું.

હા, 77 વર્ષ બાકી છે પેલા ચીનાનો રેકોર્ડ તોડવામાં. 😉

૩ ફિલ્મો

* થ્રી બિલબોર્ડ્સ આઉટસાઇડ ઇબિંગ, મિસૂરી (૨૦૧૮)

* જસ્ટિસ લીગ (૨૦૧૭)

* બ્લેડ રનર ૨૦૪૯ (૨૦૧૭)

આ છે, છેલ્લાં ૩ મહિનામાં જોયેલી ફિલમો. આ સિવાય પાસપોર્ટ ગુજરાતી ફિલમ બે દિવસ પહેલાં યુટ્યુબ પર મળી ગઇ, એકંદરે ઠીક કહેવાય. બ્લેડ રનર અને થ્રી બિલબોર્ડ્સ.. જોયા પછી જે ઝણઝણાટી થાય એવું બહુ ઓછી ફિલમોમાં થાય છે. જસ્ટિસ લીગ પણ ધાર્યા કરતા તો સરસ નીકળી છે. હવે કદાચ એવેન્જર્સ ૨૭ એપ્રિલે જોવા જઇશું એવો પ્લાન છે. રેવાનું ટ્રેલર જોયા પછી લાગે છે, એ ફિલમ સ્કિપ થશે. રતનપુર બાકી છે, અને ટ્રેલર પરથી સારી લાગી છે, એટલે જોવાનો ક્યાંકથી પ્રબંધ કરવો પડશે.

ન જોયેલી ફિલમો

* થોડા સમય પહેલા એવો વિચાર આવ્યો કે લોકપ્રિય બનેલી પણ જોયેલી ફિલમોની યાદી બનાવીએ તો? તો હાજર છે એવી મારી યાદી:

* હિંદી:
** હમ દિલ દે ચૂકે સનમ
** લગાન
** કુછ કુછ હોતા હૈ
** કહો ના પ્યાર હૈ
** ચક દે ઇન્ડિયા!
** સુલ્તાન
** દંગલ (અંશત:)
** તારેં ઝમીં પર (અંશત:)
** બાજીરાવ મસ્તાની
** દબંગ
** ડોન (જૂનું અને નવાં)
** છેલ્લા બે વર્ષોમાં આવેલ મોટાભાગની લોકપ્રિય હિંદી ફિલમો..

* અંગ્રેજી:
** ધ ગોડફાધર સીરીઝ
** ફાઇટ ક્લબ
** મોટાભાગની ઓસ્કાર વિનિંગ ફિલમો. ખબર નહી પણ કેમ, જેને ઓસ્કાર મળે તેના સાથે આપણે પોલીસ અને એસ્કોબાર જેવા સંબંધો હોય છે.

બોલો, અમારો ટેસ્ટ કેવો છે? 🙂 સ્વદેશ પણ આ યાદીમાં હતું પણ તે થોડા સમય પહેલાં સહકુટુંબ જોઇ લીધું છે. ફોરેસ્ટ ગમ્પ પણ યાદીમાં હતું તે પણ જોઇ કાઢ્યું છે.

અપડેટ્સ – ૨૧૪

* ફેબ્રુઆરી મહિનો આવી ગયો છે. આપણો સૌથી મનગમતો મહિનો! સૌથી ઓછાં દિવસો વાળો ખરોને! જોકે નુકશાન એ પણ થાય કે ઓછાં દિવસો સાયકલિંગ-રનિંગ માટે મળે.

* આ વખતે સા.ફ્રા.માં ઠંડી (વત્તા વરસાદ)નો ભારે અનુભવ થયો. વધુમાં દરિયાકિનારો નજીક ન હોવાથી દોડવાના કાર્યક્રમો પણ બહુ ન થયા. સાયકલિંગનો કાર્યક્રમ સાયકલનું રેન્ટ જોઇને પડતો મૂકાયો (અને સાયકલિંગના કપડા પણ ભૂલી ગયેલો). હા, આ વખતે પણ બહુ બધાં મિત્રો મળ્યા. પ્રિમા, બાલાજી, ધ્રુવ (ADR) અને ઓફિસના મિત્રો તો ખરાં જ. પિનટ્રેસ્ટ અને સ્ટ્રાવાની ઓફિસોની મુલાકાત લીધી અને ખાવા-પીવામાં જલ્સા કર્યા. રાફાના સ્ટોરની મુલાકાત ન લેવાઇ એ અફસોસ રહેશે.

* પ્રવાસનો થાક હજુ ઉતર્યો હોય એમ લાગતું નથી. કુલ ૨૨ કલાકની બે ફ્લાઇટ્સ, ઇસ્તંબૂલ એરપોર્ટની સફર (ગેટ નં ૨૦૦ થી ૭૦૦!) અને ૧ કલાક બોરિંગ ઇમિગ્રેશન વત્તા ટેક્સી વાળાનો ત્રાસ સહન કરીને ઘરે આવીને તરત જ સામાજીક કાર્યક્રમમાં દોડ્યો. ત્યાં જલ્દી જવાનો હેતુ કવિનની કોમ્પિટિશન હતી, જે ૯.૩૦ની જગ્યાએ ૧૧.૩૦એ ચાલુ થઇ એટલે ત્યાં સુધી બેઠા-બેઠા ઝોકા ખાધા. પછી વાતોના વડા અને છેલ્લે લાડવા 🙂

* ગઇકાલે “ચલ મન જીતવા જઇએ” જોયું. ધાર્યા જેટલી મઝા ન આવી કારણકે બીજો ભાગ આધ્યાત્મ તરફ દોરી જતો હોય એમ લાગે છે. આપણને તો “તન જીતવા જઇએ” જેવું કંઇક, એટલે કે સાયકલિંગ-રનિંગ એવું કંઇ બતાવે તો મઝા આવે 😉 મજાક બાજુ પર મૂકીએ તો એકંદરે થોડીક ગ્લિચિસને બાદ કરતાં સરસ ફિલમ. મારા જેવા એંગર મેનેજમેન્ટના ક્લાસ કરતાં લોકો માટે ખાસ. સો ટકા જોવા જવાય. ઘણાં વખતે થિયેટર પણ હાઉસફૂલ જોયું.

* રવિવારે મારી પ્રથમ ૫ કિમીની રનિંગ રેસ છે. આ વખતે હું-કવિન અને રીનિત-હિરલ એમ કુટુંબમાંથી ચાર જણા દોડવાના છીએ એટલે મઝા આવશે. જોકે પાંચ કિમીની મારી પહેલી રેસથી હું થોડો નર્વસ છું. અને હા, ફેબ્રુઆરી અંતમાં બીજી સાયકલિંગ રેસ આવે છે!