રેસ રિપોર્ટ: વસઈ-વિરાર હાફ મેરેથોન

ગયા અઠવાડિયાની ઇજા હજુ બરોબર ગઇ ન હોવા છતાં વસઈ-વિરાર હાફ મેરેથોન આપણી ફેવરિટ હોવાથી દોડવાનું નક્કી કરેલું.

સવારે ૩.૩૦ વાગે ઉઠીને સ્ટેશન પર જવા નીકળ્યો પણ રીક્ષા ન મળી એટલે વાર્મ અપ માટે દોડીને સ્ટેશન ગયો. ત્યાં ગુંજન-કલ્પના અને સોપાન-અમી મળ્યા. સોપાન અને ગુંજન – બંને એટલા એનર્જેટિક માણસો કે બંને જ્યારે પણ મળે ત્યારે મઝા આવી જાય. ત્યાંથી ૪.૪૩ની ટ્રેને અમને ૫.૧૫ જેવા વસઈ પહોંચાડ્યા. ત્યાંથી વસઈના મ્યુનિસિપલ કોર્પોરેશને બસની વ્યવસ્થા કરેલી. સ્ટાર્ટ પોઇન્ટ પર બીજાં ઘણાં રનર્સ મળ્યા અને મારું દોડવાનું હવે દિવસે-દિવસે ઘટતું જતું હોવાથી તેમને ઘણાં સમય પછી મળવાની મઝા આવી.

દોડ એકદમ નિયત સમયે બરોબર ૬.૩૦ના રોજ શરૂ થઇ ગઇ. દોડવામાં તો આપણ ડિઝાસ્ટર નક્કી હતો તો પણ પહેલાં ૧૦ કિમી સારા ગયા. ૧૨ કિમી પર કુણાલ તેની પ્રથમ મેરેથોન પૂર્ણ કરવા તરફ જતો મળ્યો! અભિનંદન કુણાલ! ૧૪ કિમી પર ફૂલ મેરેથોન વાળા એલિટ્સ રનર્સે મને ક્રોસ કર્યો. એ પહેલાં બે વખત ૧૬-૧૭ કિમીએ મને તેઓ ક્રોસ કરતાં. આ ઘટના પરથી બે તારણ નીકળે: ૧. હું ધીમો પડ્યો છું, ૨. તેઓ ઝડપી બન્યા છે. મારા મનને તારણ નંબર ૨ જ છે એમ મનાવી આગળ દોડ્યો, તો પણ પછી ધીમો જ રહ્યો. ખાલી છેલ્લો એક કિમીમાં થોડી ઝડપ કરી અને છેવટે ૨ કલાક અને ૧૩ મિનિટમાં માંડ-માંડ હાફ મેરેથોન પૂરી થઇ. સરસ નાસ્તો કર્યા પછી પ્રદિપ-આરતી મળ્યા. બીજું એક એનર્જેટિક કપલ – જે દર વર્ષે વસઈ-વિરારમાં મળે છે. બહુ વાતો કરી અને વિરારથી ટ્રેનમાં જવા નીકળ્યા. મને એમ થાય છે કે રવિવારે પણ આટલાં બધાં લોકો વિરારથી ક્યાં જતાં હશે? અમે તો ડોબાઓ મેરેથોન કરવા ગયા હતા એટલે વિરાર આવ્યા હતા, પણ બીજાં મોર્ટલ લોકો? 😀

IVMS01956

ઘરે પહોંચ્યો ત્યારે ટ્રેનની મુસાફરીથી હાફ મેરેથોન કરતાં વધુ થાક લાગ્યો હતો!

આ પણ જુઓ:
* ૨૦૧૪નો રીપોર્ટ

Advertisements

ડિસેમ્બરના ડાકલા

આ દરવખતે ડિસેમ્બરમાં કંઇને કંઇ ડાકલા વાગે. બે વર્ષ પહેલાં સાયકલ વાગી, ગયા વર્ષે કમર ભાંગી, આ વર્ષે ફરી સાયકલ પરથી પડી ભાંગ્યો (કંઇ તૂટ્યું હોય એવું જણાતું નથી). બોલો, કોણ કરે છે આ ડાકલા? કાલની બી.આર.એમ. પડતી મૂકવામાં આવી છે. અમારે હવે સ્પેશિયલ ભૂવો પકડવો પડશે એવું લાગે છે. તેમ છતાંય,

ડિસેમ્બરનો પ્લાન કંઇક આવો છે:

* આવતા અઠવાડિયે વસઇ-વિરાર હાફ-મેરેથોન.
* ત્યાર પછી થોડા દિવસમાં ચૂંટણીની ચટણી.
* પછી, બીજા જ દિવસે – માસ્ટરમાઇન્ડ ગ્રાન્ડમાસ્ટર ૧૨૦ કિમી રાઇડ (કે રેસ, જે ગણો તે).
* ક્રિસમસની રજાઓમાં – ૬૦૦ કિમી બી.આર.એમ. (અથવા ૧૦૦૦? :D)
* એક ટ્રેકિંગ (ક્યાં જવું તે અંગે અસમંજસ છે, તો પણ ટ્રેકિંગ દૂર છે, જવું જરૂર છે!)
* એક પાર્ટી.

બસ પછી નવું વર્ષ 😀

બે હાફ-મેરેથોન્સ

* એમ તો આ પોસ્ટમાં ગોઆ વિશે લખવું હતું પણ હવે બહુ મોડું થઇ ગયું છે એટલે વાત કરીએ છેલ્લે દોડેલી બે હાફ-મેરેથોન્સની.

૧. ગોઆ રીવર હાફ મેરેથોન
આ મેરેથોન માટે સહકુટુંબ જવામાં આવ્યું અને અત્યાર સુધીની સૌથી મોંઘી મેરેથોન! 😉 હોટલમાં પહોંચીને ખબર પડીકે બીજા રનર્સ સવારે જવાનાં છે એટલે ટેક્સી શેરિંગનો મેળ સરસ રીતે પડી ગયો (અને નવાં રનર્સની ઓળખાણ પણ થઇ). મેરેથોન સમયસર શરુ થઇ અને જોડે આપેલી પેલી ફ્રી બીઅર કુપન પણ સંભાળીને રાખી હતી એટલે દોડવાનો ઉત્સાહ સારો હતો. દસ પોઇન્ટ પાંચ કિલોમીટરનો ટર્નિંગ પોઇન્ટ આવ્યો ત્યારે થયું કે આનું નામ ગોઆ હીલ મેરેથોન કરવું જોઇએ! વેલ, ૧૬-૧૭ કિલોમીટર પછી બહુ મજા ન આવી અને છેલ્લાં બે કિલોમીટર માંડ-માંડ પૂરા કર્યા. વાતાવરણે પણ મને ધીમો પાડવામાં ભાગ ભજવ્યો. જે હોય તે. રનિંગ પછી મજા જ આવે. આવતા વર્ષે ટ્રેનમાં જઇએ, સસ્તી હોટેલમાં રહીએ તો અહીં ફરી જવાશે.

૨. વસઇ-વિરાર હાફ મેરેથોન
ગઇ સાલ આ મેરેથોન દોડ્યો ત્યારે થયું કે ક્યાં આવી ગયો. કારણ કે ઓક્ટોબરમાં હોવાથી બહુ જ ગરમી-ભેજ હતાં. આ વખતે ડિસેમ્બરમાં હોવાથી આખો માહોલ જ અલગ હતો. રસ્તામાં લેઝિમ કરતાં વિદ્યાર્થીઓ, સરસ પાણીની સગવડ, સરસ રોડ, સરસ આયોજન. વસઇ વિરાર હવે દર વર્ષે પાક્કું. જોકે આ વખતે આ મેરેથોન ઇલેક્શનના કારણે ડિસેમ્બરમાં હતી એટલે મોડી થઇ અને આપણે કંઇ દર વર્ષે ઇલેક્શન ઇચ્છતા નથી, પણ તેમ છતાંય ડિસેમ્બરમાં થાય તો સારો એવો સમય આવી શકે. આ વખતે ૨.૦૯.૫૯ (ઘડિયાળ જોકે ૨.૦૮.૫૫ બતાવે છે) સમય આવ્યો.

હવે પછી? થોડું સાયકલિંગ અને પછી મુંબઇ મેરેથોન!!!

અપડેટ્સ – ૧૪૮

* ગુગર રીડરની કમી હજુ પણ વર્તાય છે…

વણવાંચ્યા લેખો...

* હમણાં ખબર પડી કે, મારી ફેવરિટ સંખ્યા, 0x1f1f એ યુનિકોડ નંબર પણ છે, એટલે કે “἟” છે 🙂

* ૩૦૦ કિમીની તૈયારી રૂપે ગઇકાલે ૮૦ કિમીની નાનકડી સાયકલ સફર કરવામાં આવી. ખરેખર, મુંબઇના રસ્તા હવે સાયકલ માટે તદ્દન નક્કામાં બની ગયા છે. અરે, NCPA આગળ પર ખાડાં? કહેવું પડે, થીગડાં મારતી મુંબઇ મ્યુન્સિટાપલીને (શબ્દ ચોરી, અધિરભાઇ. આભાર સાથે).

* છેલ્લે કદાચ લખ્યું હતું કે ઓક્ટોબર-નવેમ્બરમાં રનિંગમાં આરામ કરવો છે, પણ પેલી વસઇ-વિરાર (હાફ) મેરેથોન માટે નોંધણી કરવામાં આવી છે (૨જી નવેમ્બર). આ મેરેથોન એકદમ અલગ છે. રસ્તાની બંન્ને બાજુએ (વસઇ-વિરાર) મ્યુન્સિપાલિટી શાળાઓના છોકરા-છોકરીઓ લેજીમ, ડ્રમ વગાડતા હોય, વસઇની પબ્લિક સ્ટીલના ગ્લાસમાં પાણી ઓફર કરતી હોય અને કદાચ આખા ભારતમાં થતી રેસમાં ચીઅર-અપ કરવા આવતા લોકો કરતાં પણ વધુ લોકો રસ્તા પર જોવા મળે ત્યારે મન ધન્ય ન થાય? એ માટે જ અહીં દોડવા જેવું ખરું. એકંદરે સસ્તી ફી અને સ્ટાર્ટ પોઇન્ટ નજીક. તેમાં ખાટલે મોટી ખોડ હતી કે શરૂઆત મોડી થતી હતી, પણ સંચાલકોએ આ વાત પર ધ્યાન આપીને અડધો કલાક વહેલી રેસ શરુ કરવાનું વચન આપ્યું છે, એટલે હવે મજા આવશે. (ઓહ, ફરી પાછું તેના પહેલાં કદાચ ટ્રાવેલિંગ છે. જોઇએ, શું થાય છે!!)