અપડેટ્સ – ૧૮૪

.. અથવા શું ચાલે છે?

* કવિન વેકેશન માણે છે અને અમે દોડ-મ-દોડી એટલે કે કામ-કાજ.

* ખબર નથી પડતી કે આજ-કાલ દેશમાં શું ચાલી રહ્યું છે. લોકો એકબીજાંને દોષ દેવા મંડી પડ્યા છે. કોઇ આત્મહત્યા માટે પંખાને તો કોઇ પૂર માટે હનીમૂનને દોષ દે છે. એટલે, હું મારા બ્લોગ-દુષ્કાળ માટે મને જ દોષ આપીશ!

* આવતું અઠવાડિયું પ્રવાસોનું છે એટલે એકાદ પોસ્ટ તેના વિશે આવશે (બાકી વિષયોમાં મંદી છે).

* કવિન કોઇ પણ સમર-કેમ્પમાં જવાનો નથી, તે જાણી મને અત્યંત આનંદ થયો છે. તો પણ ક્યાંક સ્વિમિંગમાં જવાનું આયોજન છે. સ્વિમિંગ આવડવું જોઇએ એવું હજુ પણ મારું માનવું છે.

* ગરમી વધી રહી છે. કેરીઓ આવી ગઇ છે (આફૂસ).

* ગયા વર્ષની જેમ દર વર્ષનું મેડિકલ ચેકઅપ કરાવ્યું છે, જોઇએ કેવો રીપોર્ટ આવે છે. ડોક્ટરે પૂછ્યું તમને ૧૦ મિનિટ દોડવામાં કોઇ તકલીફ તો નહી પડે ને? (હું મનમાં હસ્યો, કારણ કે સવારે જ ઝડપી ૫ કિમી દોડીને ત્યાં ગયો હતો) (૧૨ કલાકના ઉપવાસ પછી).

* બાકી, શાંતિ છે.

વ વેકેશનનો વ

* વર્ષો પછી અમે વેકેશન લીધું છે, પણ આ વેકેશન આરામમાં જ જશે. એટલે કે, એકાદ-બે ટૂંકી મુસાફરી વગર સંપૂર્ણ આરામ કરવામાં આવશે. હા, આ વેકેશનમાં પેન્ડિંગ રહેલા કામો પૂરા કરવામાં આવશે. દા.ત. હવે પછી આવતી મુસાફરીની તૈયારીઓ, વિકિપીડિયામાં ઢગલાબંધ એડિટ્સ, નેશનલ પાર્કની મુલાકાત વગેરે.

* કવિનને પણ દુર્ભાગ્યે વેકેશન પડ્યું છે, અને અમારા માથામાં લાગે છે. અમે વિચાર આવે છે અમે પણ આવી જ રીતે લોકોને હેરાન કરતા હતા?🙂

* સાયકલિંગ હજી બંધ છે. એટલે કે, સાયકલિંગ શક્ય નથી.

* બે દિવસ કસરત કર્યા પછી,
** ડાબો હાથ: બરાબર છે.
** જમણો હાથ: બરાબર નથી.
** ડાબો પગ: બરાબર છે.
** જમણો પગ: બરાબર છે.
** પેટના સ્નાયુઓ: બરાબર નથી.
** કમર: બરાબર છે.

હવે, આજે દોડવાનો પ્રયત્ન કરવામાં આવશે.

અપડેટ્સ – ૧૭૨

* અપડેટ ટાઇમ!

* નવી ૪૦૦ કિમીની રાઇડ આવી રહી છે, પણ એના પહેલાં સાયકલ હજી મરમ્મત માંગે છે. નવી સાયકલ લેવાનો પ્લાન પડતો મૂક્યો છે, કારણ: ૧. બજેટ, ૨. રોડ બાઇક ચલાવી પણ મજા ન આવી (ઓહ, કમર).

* દોડવામાં તો હવે વડોદરા અલ્ટ્રા (૫૫ કિમી) નો પ્લાન છે. ચાંપાનેરનો સરસ આંટો. ફન.

* સ્કૂલમાં હવે ગણેશ વિસર્જનનું વેકેશન આવશે, એટલે હવે નોઇઝ રિડક્શન હેડફોન લાવવા પડશે.

* ઓહ અને ગયા અઠવાડિયે ઘણાં દિવસ પછી બિમાર પડવાનો લ્હાવો લઇ લીધો!

અપડેટ્સ – ૧૬૭

* લોંગ ટાઇમ, નો અપડેટ્સ!

* હવે ફરી પાછું રનિંગ પર ધ્યાન કેન્દ્રિત કરવામાં આવ્યું છે. કારણ? સિસ્કિયુ!

* એટલે કે, આવતા મહિને ફરી પાછી લાંબી સફર. બોરિંગ. પણ, અંતે નવી જગ્યાઓ જોવા મળે અને નવાં લોકોને મળવાનું થાય એ વાતનો આનંદ.

* વેકેશન હવે ખતમ થવાં આવ્યું છે (એટલે કે કવિનનું) એટલે ફરી પાછી થોડાં દિવસ દોડા-દોડી રહેશે.

* આજનો પીજે:

એક ભાઇ: બીજું શું નવિનમાં?

હું: આ નવિન કોણ છે?🙂

અપડેટ્સ – ૧૬૫

* ગઇકાલે ડિકાથલોનમાં BRM મેડલ વિતરણ કાર્યક્રમ હતો. ત્યાં પણ સાયકલ લઇને ગયો અને બે મેડલ (નવેમ્બર-ડિસેમ્બર) અને ખરીદીમાં એક ફ્રિસ્બી લઇને આવ્યો. બીજાં સાયકલિસ્ટ્સને સાયકલ રાઇડ સિવાય મળવાની મજા આવી.

* સાયકલિંગમાં જોઇએ તો હવે પછીની રાઇડ ૬૦૦ કિમી છે. સાહસ છે, પણ થઇ જશે! (આ વખતે વધુ સાવધાની સાથે ચલાવવામાં આવશે. રેડ બુલ નહી પીવાનું, અને જ્યુશ પીવાનો. મજાની રાઇડ.)

* કવિનને અત્યારે પરીક્ષાઓ ચાલી રહી છે; પરીક્ષા પછી અમારી પરીક્ષા(ઓ) છે🙂

* ગુજરાતી વિકિપીડિયામાં કન્ટેન્ટ ટ્રાન્સલેશન આજે સક્રિય કરવામાં આવશે!

* વેકેશનનું પ્લાનિંગ થઇ ગયું છે. PS: અમે હવે ક્લિઅરટ્રીપનાં લોયલ કસ્ટમર રહ્યા નથી! પેલી IRCTC ઝિંદાબાદ.

અપડેટ્સ – ૧૫૩

* ફરી પાછી ચૂંટણીઓ આવી અને ગઇ. એટલિસ્ટ, કોંગ્રેસ આવી એટલે શાંતિ છે.

* * વેકેશન પડી ગયું છે પણ મારે વધુ કામકાજ ચાલુ જ છે. આ અઠવાડિયું આખું દોડાદોડમાં રહ્યું. પેલું દોડવા વાળું દોડવાનું નહી પણ, ભાગંભાગ. પુને જવાનું નક્કી થયું અને એમાં ફેરફાર કરવો પડ્યો એટલે કોઇને મળવાનો કે ત્યાં દોડવાનો સમય ન મળ્યો. બીજા દિવસે ગુગલ વેબ ફોન્ટ અંગેની એક વર્કશોપ રચના સાંસદ કોલેજ, દાદર ખાતે હતી. વર્કશોપમાં જવામાં વાંધો નહી પણ “દાદર ઇઝ સ્પાર્ટા”. જતાં જવાય પણ વળતાં તો જેને મદદે ખુદા હોય એજ આવી શકે. અમે આવ્યા, એટલે ખુદા-ભગવાન અમારી જોડે છે એમ કહી શકાય. વર્કશોપ સરસ રહી. મારા ફોન્ટ અંગેના જ્ઞાનમાં વધારો વત્તા નવાં ફોન્ટ બનાવવાના વિશલિસ્ટને અગ્રતા આપવાની જરૂર છે એમ લાગ્યું. ડેવ અને પાથુમને મળવાની અને વાતો કરવાની મજા આવી.

* આજે સવારે ઇસ્ટર્ન એક્સપ્રેસ હાઇવે પર અજય, જે રનર છે અને અકસ્માતમાં હાથ ગુમાવેલો છે, તેની મદદ (પ્રોસ્થેટિક હાથ માટે) માટેની એક ૧૫ કિ.મી.ની નાનકડી દોડમાં ભાગ લીધો. હા, સવારે ચશ્માં પહેરવાનું ભૂલી ગયો અને દરવાજો બંધ કર્યો (લેચ), અને ઘરની ચાવી તો હું જોડે લેતો નથી એટલે ચશ્માં વગર પહેલી દોડ એ પણ મારી રનિંગ કારકિર્દીમાં એક માર્ક (“તેજા મે હું”) ગણી શકાય😉

* અને હા, ફટાકડાં લઇ લેવામાં આવ્યા છે, લાગે છે કે એ બે દિવસમાં પૂરા થઇ જશે…

અપડેટ્સ-૧૩૭

* ગઇકાલે અર્નવને મળ્યો અને વાતો કરવાની અને ગપ્પાં મારવાની મજા આવી ગઇ. તેને અમેરિકન ડ્રીમ માટે અભિનંદન અને શુભેચ્છાઓ.

* કવિન અઠવાડિયાંનું વેકેશન માણીને ઘરે પાછો આવી ગયો છે. ડ્રોઇંગ રુમ અસ્ત-વ્યસ્ત થઇ ગયો છે. કાર્ટૂનના અવાજો આવવા લાગ્યા છે. તેને ગિફ્ટમાં મળેલું હેલિકોપ્ટર અમે ઉડાવ્યું પણ એ એવું પટકાયું કે પછી થયું કે એ માત્ર રેતી વાળી જમીન પરથી ઉડાવવું જ સારું રહેશે. એટલે, રવિવારે ક્યાંક જવામાં આવશે.

* મારી ડ્યુઆથલોન તૈયારી ચાલી રહી છે. સાયકલ હજી સર્વિસમાં છે. આજે સાંજે સાયકલનો ફરી એક ટેસ્ટ કરવામાં આવશે. બાકી તૈયારીમાં તો ખાસ કશું છે જ નહી. (હા, જોડે એર પંપ, સ્પેર ટ્યુબ, ટી-શર્ટ, મોજાં, હેલ્મેટ, લાઇટ્સ, ખજૂર-કેળાં, બિસ્કિટ, પાણી, વોલિની સ્પ્રે, પંકચર કીટ, એલન કીનો પોર્ટેબલ સેટ, સ્વિસ આર્મી નાઇફ, હેન્ડ સેનિટાઇઝર, ગ્લોવ્સ, એકસ્ટ્રા ચડ્ડી, ઘડિયાળ, હાર્ટ રેટ બેલ્ટ, પૈસા, વોલેટ, મોબાઇલ, સાઇકલનું તાળું-ચાવી, ચોકલેટ-પીપર, પેન-નોટપેડ પણ લેવામાં આવશે ;)) રસ્તાનો અભ્યાસ કર્યો છે, પણ જોડે તેનું GPX વર્ઝન લેવામાં આવ્યું છે. સ્ટાર્ટિંગ પોઇંટ પર પહોંચવા માટે જ મારે થોડી મહેનત કરવી પડશે એ વિચારથી જ મને ટેન્શન થઇ રહ્યું છે. જો એક વળાંક ખોટો લીધો તો સીધો ૧૦ થી ૧૨ કિલોમીટરનો ફટકો છે! :O

* માત્ર જ ચાર દિવસ (શનિ-રવિ સાથે!) વેકેશન લીધું છે, તો આ દિવસોમાં શું કરવું એ પ્રશ્ન છે. તેમાંથી ૧૧x૧૧ કલાક તો મુસાફરીમાં જશે. એટલે, હવે મોટા વેકેશનની જરુર વર્તાય રહી છે.

* બાકી શાંતિ જ છે. હવે, કેસર કેરીઓની રાહ જોવાય છે.