ફ્રેન્ડ રિકવેસ્ટ

* એમાં થયું એવું કે પીપલ યુ મે નૉમાં ભૂલથી ક્યાંક ક્લિક થઇ ગયું અને એક ભાઇને ફ્રેન્ડ રિકવેસ્ટ મોકલાઇ ગઇ (એવું હું માનું છું, કારણ કે મને પોતાને ખબર નથી એ આમ કેમ બન્યું!). હવે તેમણે રિકવેસ્ટ ઉર્ફે વિનંતી સ્વિકારી પણ લીધી અને તેનું નોટિફિકેશન આવ્યું ત્યારે ખબર પડી. અરે! આ કોણ છે? કોઇ પણ ઓળખીતા કે મ્યુચ્યલ મિત્રો પણ નહી. ગજબ છે. ગમે તેને સ્વિકારી લેવાના?

તેમને કાઢ્યા પછી! 😉

અપડેટ્સ – ૨૦૨

* ફરી પાછી આવી અપડેટ્સ. હંમેશા જેમ હોય છે તેમ – વીકએન્ડ ગયો સાયકલિંગમાં! આ વખતે એ જ અમારા ફેવરિટ મુંબઈ-ચીખલી (હકીકતમાં, વાગલધારા)-મુંબઈનો માર્ગ હતો. અને, દર વખતની જેમ ૪૦૦માંથી છેલ્લા ૧૦૦ કિમી અઘરા પડ્યા. પણ મઝા આવી ગઇ. હવે આવતા અઠવાડિયે સુરતમાં ૩૦૦ કિમી છે. વધુ મઝા આવશે!

* હોળી રમ્યા અને લાડવા જમ્યા. હોળી પર દોડવા જવાનો રંગીન રનનો કાર્યક્રમ જોકે છેલ્લી ઘડીએ મોકૂફ રાખવો પડ્યો. એ પહેલાં વિલે પાર્લે બીબ નંબર લેવા જવાનું મહેનતનું કામ કર્યું ખરું (હું મેરેથોન દોડવા કરતાં બીબ નંબર લેવા જવાનું વધારે અઘરું ગણું છું).

* કવિનને અને હાડવૈધો (એટલે કે ઓર્થોપેડિક ડોક્ટરોને) બહુ સારુ બને 😉

* આ નેટફ્લિક્સ વાળા નવી ફિલમો તો મૂકતા જ નથી :/

સ્ટ્રાવા

* સ્ટ્રાવા અમારું ફેસબુક છે – એટલે કે સાયલિસ્ટ અને રનર્સનું. જોકે એ અમને અમારી રાઇડ્સ અને રનનો ઇતિહાસ બતાવે છે, તેમજ પોતાના જ અને બીજાનાં પરાક્રમોની જાણ કરે છે. ૨૦૧૫થી (એ પહેલાં હું ડેઇલીમાઇલ.કોમ વાપરતો) એકાદ-બે અપવાદ સિવાય ક્યારેય સ્ટ્રાવા સિવાય રનિંગ કે સાયકલિંગ કર્યું નથી. તેમાં ઘણાં એવા ફિચર્સ છે કે બીજી કોઇ એપમાં નથી. સ્ટ્રાવામાં દર મહિને ચેલેન્જ (ઉર્ફે પડકારો) અને કોઇ ચોક્કસ માર્ગ પરના નાનાં ભાગ પર સૌથી વધુ ઝડપી કોણ છે એ માટે સેગમેન્ટ જેવી વસ્તુઓ હોય છે. કેટલાક લોકો, આમાં પોતાને ચડિયાતા બતાવવા માટે ગાડી કે બાઇકમાં બેસી સ્ટ્રાવા ચાલુ રાખીને આગળ આવે છે અથવા કોઇક રીતે લોકોને ઉલ્લુ બનાવે છે.

વેલ, આ પોસ્ટ લખવાનો હેતુ એ હતો કે મારા વીકએન્ડ્સનો સારો એવો સમય આવા લોકોને શોધી કાઢવામાં જાય છે. સ્વાભાવિક રીતે, ઘણાં નવાં લોકો ભૂલથી સાયકલિંગને રનિંગ તરીકે મૂકે છે, જે તરત સુધારી શકાય છે. અમુક લોકો હાર્ટ રેટ માહિતી પરથી પકડાય છે (ગાડી-બાઇકમાં હાર્ટ રેટ, સાયકલિંગ-રનિંગ કરતાં ઘણાં ઓછા હોય છે). અમુક લોકો તેમનાં ભૂતકાળના ડેટા પરથી પકડાય છે, તો અમુક લોકોને અમે ઓળખતા હોઇએ છીએ. ઘણી વખત સ્ટ્રાવાનું જીપીએસ પણ દગો દે છે, એવા કિસ્સામાં એ પણ સુધારી શકાય છે.

ટૂંકમાં, ચિટીંગ કરવું નહી, અમે અહીં હાજર છીએ! 🙂

અપડેટ્સ – ૨૦૧

* માર્ચ આવી ગયો પણ એક પણ પોસ્ટ હજુ સુધી નથી આવી એ નાઇન્સાફી કહેવાય.

* ઉદેપુર-પાલનપુરનો નાનકડો પ્રવાસ કર્યો અને દર વર્ષે ફેબ્રુઆરીની પરંપરા જાળવી. બંને જગ્યાએ મઝા આવી પણ થાકી ગયા. હવે આવતો પ્રવાસ આરામથી પડ્યા રહીએ એવો જ રાખવો એવા સૂચનો મળ્યા છે.

* માર્ચ પણ બહુ બીઝી-બીઝી રહેશે. કાલે એક ૧૦ કિમી (ગુંજનની ઇનસાઇટ ૧૦કે), બે બીઆરએમ (૪૦૦ અને ૩૦૦) અને એક બીજી ૧૦ કે. મહિનો પૂરો. વધુમાં એક ધુળેટી નિમિત્તે ‘રંગીન રન’નું આયોજન છે, જેમાં કવિન જોડે રંગ ઉડાડતા દોડવામાં આવશે. જોકે વધુ વિગતો મળશે ત્યારે વાત.

* કવિનની ટીમ ફૂટબોલમાં (ક્વાટર ફાઇનલ) હારી ગઇ છે, પણ બોયસ્ પ્લેડ વેલ. હારીએ તો જીતીએ, હાર કર જીતને વાલે કો બાજી-ઘર કહેતે હૈ, ડર કે આગે જીત હૈ વગેરે વગેરે ક્વોટ્સથી તેને ઉત્સાહિત કરવામાં આવશે. ટૂંકમાં, તેમની ટીમને વધુ પ્રેક્ટિસની જરુર છે, પણ હવે સ્કૂલવાળાઓને કંઇક અક્કલ કે જ્ઞાન આપવા જઇએ તો સામે ભડકે એટલે કવિને ઉનાળુ વેકેશનમાં આ પર રનિંગ, સ્ફર્તિ વગેરે પર ધ્યાન આપવું એવું નક્કી કર્યું છે.

* મીઠીવાવ, પાલનપુર વિશે લેખ શરુ કર્યો છે. ખૂટતી વિગતો ઉમેરવા Edit બટન છે જ!

PS: હોળી ક્યારે છે, હોળી?

અપડેટ્સ – ૨૦૦

* તમને સૌ કોઇને જણાવતા અત્યંત આનંદ થાય છે કે આ પોસ્ટ સાથે પરમ કૃપાળુ વર્ડપ્રેસ દેવતાના આશીર્વાદ અને બ્લોગબાબાની કૃપા તેમજ સર્વ વાચકોના સ્નેહથી અપડેટ્સ શ્રેણીના ૨૦૦ પોસ્ટ્સ પૂરા થાય છે 🙂

* અન્ય અપડેટ્સમાં:
૧. શનિ-રવિમાં ૬૦૦ કિમીની BRM (મુંબઇ-પુને-મહાબળેશ્વર-સતારા-પુને-મુંબઇ) પૂરી કરી. મઝા આવી અને હાલત ખરાબ પણ થઇ. ગયા વખતનો બાકી રહેલો હિસાબ પૂરો કર્યો.
૨. છેવટે નવું ટીવી લઇ લીધું અને નેટફ્લિક્સ પર એક ફિલમ પણ જોઇ કાઢી! (આ પણ જુઓ)
૩. કવિનની ફૂટબોલ મેચો(!) ચાલે છે.
૪. બાકી શાંતિ છે.

અપડેટ્સ – ૧૯૯

* શનિ-રવિ બહુ જ વ્યસ્ત રહ્યા. રે ફૂટેલા નસીબ અને અમે નવી મુંબઈ હાફ મેરેથોનની પસંદગી કરી અને તેનો બીબ નંબર લેવા જવા માટે મારે છેક ડી.વાય. પાટીલ સ્ટેડિયમ ધક્કો ખાવો પડ્યો. જતી વખતે તો ટ્રેનમાં જઇને સસ્તામાં પતાવ્યું, વળતી વખતે ટેક્સીમાં આવવું પડ્યું. કુલ સમયનો વેડફાટ – ૫.૩૦ કલાક. રેસ તો હજુ બાકી હતી. બીજા દિવસે સવારે ૩ વાગ્યે ઉઠીને ૫ વાગ્યા જેવો સ્ટેડિયમ પહોંચ્યો. સદ્ભાગ્યે, જાણીતા ચહેરા મળ્યા એટલે થોડું સારુ લાગ્યું. રેસ સમયસર શરુ થઇ પણ પહેલા ત્રણ કિમી અંધારામાં દોડવાની મઝા ન આવી, બાકીનો રસ્તો પણ ઠીક હતો (પામ બીચ રોડ). રસ્તામાં રનર્સને જરુરી કેળાં-સંતરા ગાયબ હતા અને છેલ્લે ખબર પડી કે બ્રેકફાસ્ટમાં ભલીવાર નથી અને અંતર ૨૧.૦૯૫ની જગ્યાએ ઓછામાં ઓછું ૨૦૦ મીટર જેટલું વધુ છે. જે હોય તે, ૨ કલાક, ૧ મિનિટ અને ૫૮ સેકન્ડ અમારો અધિકૃત સમય આવ્યો અને પછી એ જ મોંઘી દાટ ટેક્સીમાં પાછા આવ્યા. ૨૧ કિમી દોડવા માટે અમે ૫૦x૪ એટલે કે ૨૦૦ કિમી જેટલી મુસાફરી કરી. હવે આવી રેસના નામે ચોકડી. વસઇ-વિરાર ઉત્તરમાં અને થાણે પૂર્વમાં અને નરીમાન પોઇન્ટ દક્ષિણમાં – બસ આટલી જ જગ્યાઓએ મુંબઈમાં રેસ હોય તો કરવી, બાકી – ના રે ના!

અને હા, રવિવારે હાફ મેરેથોન પછી સુશાંતભાઇનો સંદેશો આવ્યો કે એ કાંદિવલીમાં છે, તો સાંજે મળવાનું નક્કી કર્યું. જોકે મારે બપોરે આરામ કરવો જરુરી હતોને સાંજે કવિનને ફૂટબોલના નવા કપડાં-મોજા લેવા હતા. તો મોકાનો ફાયદો ઉઠાવી મેં પણ બે ચડ્ડીઓ ઉઠાવી લીધી. રનિંગમાં મને ઝીપ પોકેટ વાળી ચડ્ડી જોઇએ – જે પેલી મોંઘી દાટ નાઇકી, એડિડાસ, રીબોક વગેરે બનાવતી નથી. એ ખાસ લોકલ જેવી કંપનીઓ જ બનાવે અને આપણને એજ ફાવે. ફોન તો વ્યવસ્થિત આવી જાય – અને આ ફોન કંપનીઓ પણ આજ-કાલ પ.૫ ઇંચ કરતાં નાનાં ફોન બનાવતી નથી – એટલે અમને મોંઘી ચડ્ડીઓ પહેરવા મળતી નથી 😀

સાંજે મોડા સુશાંતભાઇ ઘરે મળવા આવ્યા અને વાતોના વડા કર્યા. હવે ફરી આરામથી મળીશું.

* હવે આવતા અઠવાડિયે ગયા વર્ષે બાકી રહી ગયેલ ૬૦૦ કિમી બીઆરએમ છે. મઝા આવશે!

* બે દિવસથી ફરીથી વાચન કાર્યક્રમ શરુ કર્યો છે અને પેન્ડિંગ પુસ્તકો પૂરા કરવામાં આવશે. આ છે સિઆચેન મંગાવી લેવામાં આવ્યું છે. પહેલી નજરે – મસ્ત છે.

ટ્રમ્પેટ

.. અને જેમ ધાર્યું હતું તેમ આપણા ટ્રમ્પે આવતાવેંત જ ટ્રમ્પેટ વગાડીને ચાર-પાંચ દેશોના નાગરિકોને લગભગ ધક્કો મારી દીધો. જોકે, વધુ મહત્વની વાત એ છે કે આખી પ્રક્રિયાને સમજવી અઘરી છે (ભારતીયો પર પણ કંઇક નિયંત્રણો આવ્યા છે, એટલે હવે અમેરિકાની આવતી મુલાકાત મારા માટે પણ તકલીફ વાળી થવાની એ નક્કી) અને લોકો તેનો સમજ્યા વગર વિરોધ કરશે (નોટ માય પ્રેસિડેન્ટમાં થયું તેમ). પણ સરવાળે, ફેઇલ્ડ નેશન્શની મારી યાદીમાં એક વધુ દેશનો ઉમેરો થયો છે (આમાં પાકિસ્તાનનો વર્ષોથી ટોચ પર છે). વિઝા વસ્તુ જ એવી કંટાળાજનક છે કે એમ થાય કે ક્યાંય બહાર જવું જ નહી, પણ બીજી બાજુ એમ થાય કે, બહારના દેશો જોવા મળે તો કેમ ન જવું.

બીજી વાત રેફ્યુજીઓની. ભારત કરતાં આ વિશે બીજો કયો દેશ બોલી શકે? પારસીઓથી માંડીને દલાઇ લામાથી લઇને બાંગ્લાદેશી “શરણાર્થીઓ”ને આપણે સ્વીકાર્યા છે – એટલે આપણને ખુશી અને ગમ બંને છે.

ત્રીજી વાત – યુદ્ધ અને રાજકારણમાં લાગણીઓ ન હોય – બધું જ ચાલે છે. એટલે, જો લોકો એમ સમજતા હોય કે આ તેમના દિલની લાગણીઓનો વિષય છે, તો તેમણે ઇતિહાસ વાંચ્યો નથી કે સમજ્યો નથી.

૨૦૧૭

ઇ.સ. ૨૦૧૭ કે વિક્રમ સંવત ૨૦૭૩ હોવા છતાંય અમુક વ્યક્તિઓ..

* સોસાયટીમાં જ્યાં-ત્યાં થૂંકે છે અને કચરો રસ્તા પર ફેંકે છે!
* નજર ઉતારે છે!
* ફોર્વડ ઇમેલ મોકલાવે છે.
* ઇમેલના જવાબમાં ટોપ-પોસ્ટિંગ કરે છે.
* ફેસબુકમાં કારણ વગર ટેગ કરે છે.
* વોટ્સએપમાં ગુડ મોર્નિગ, આફ્ટરનૂન, ઇવનિંગ અને નાઇટનો ધોધ વહેવડાવે છે.
* સોસાયટીના સભ્યો મેઇન્ટનન્સ ન ભરે તો ચાલે, પણ ભાડેથી રહેતા લોકો પાસેથી પૈસા પડાવે છે!
* ફોન કે મેસેજ કર્યા વગર બપોરે ઘરે ટપકી પડે છે.

તા.ક. ૧ – આ બધાં વ્યક્તિઓ અલગ-અલગ છે.
તા.ક. ૨ – બંધ બેસતી ચડ્ડી પહેરવી નહી.

મુંબઈ મેરેથોન

img-20170108-wa0005

હવે બધાંએ મુંબઈ મેરેથોનનો રીપોર્ટ લખ્યો તો અમારે પણ લખવો પડેને? તો થઇ જાય મુંબઈ મેરેથોન ૨૦૧૭ની પોસ્ટ?

રીપોર્ટ:

હું ન દોડ્યો.

કારણ:

કીટાણું? ના. સાન ફ્રાન્સિસ્કોણું.

😉

અપડેટ્સ – ૧૯૮

* ફરી પાછાં મેક જોડે મગજમારી છે, એટલે ગુજરાતી બરોબર લખાશે નહી એટલે હું એકદમ સરળ લખાણ અહીં લખીશ.

* જેટ લેગ હજુ અસર કરે છે, અને ફરી પાછું આવતાં અઠવાડિયે અસર કરશે. મુંબઈ મેરેથોન ગુમાવવી એ ગયા અઠવાડિયાની સૌથી મોટી આઘાતજનક ઘટના હતી, પણ અહીં ૪ દિવસ સતત દોડાયું તે સારી ઘટના કહેવાય. વધુમાં, ટીમ અને ઓફિસની મુલાકાત પણ સારી ઘટના કહી શકાય. જોકે તેને ઘટના ન કહેવાય, તો પણ…

* શનિવારે નજીકમાં સરસ હાઇકિંગ થયું પણ સાત કિમી સતત ચાલીને પણ મારા પગ ન દુખવા આવે તે સારી વાત કહેવાય. ગઇકાલે સાંજે દોડવાનું મન થયું અને મને એમ કે સાંજે ઠંડી ઓછી હશે પણ સાંજ તો વધુ ઠંડી નીકળી.

* આવતો મહિનો રનિંગ-સાયકલિંગ-ફરવા-હરવામાં ભારે છે. વધુ ડોઝ મેળવવાની તૈયારી રાખજો! 😉

૨ ભાગ્યા ૩

જીયો જીયો
નવા વર્ષના પ્રારંભે પહેલું પાપ કર્યું અને જીયોના બે સીમકાર્ડ લીધા. હવે પરિસ્થિતિ એવી થઇ કે ર કાર્ડ વચ્ચે ૩ મોબાઇલ છે. જેમાં,

* એક ફોન ૪જી છે, જેમાં બે સીમકાર્ડ સ્લોટ છે – જેને જીયોની જરુર છે, અને બરાબર ચાલે છે.
* એક ફોન ૪જી છે, જેમાં એક જ સીમકાર્ડ સ્લોટ છે – જેને જીયોની જરુર નથી.
* એક ફોન ૩જી છે, જેમાં બે સીમકાર્ડ સ્લોટ છે – જેને જીયોની જરુર છે અને શક્ય નથી.

કપરા સંજોગોમાંથી અમે પસાર થઇ રહ્યા છીએ!!

તા.ક. આ જીયોવાળો ઘરે આવેલો તો, એનું જ નેટવર્ક નહોતું આવતું 😉

૨૦૧૭ની ઇચ્છાયાદી – રનિંગ અને સાયકલિંગ

૨૦૧૭ની ઇચ્છાયાદીની યાદી અત્રે આપેલ છે. એમાં જોગ-સંજોગ મુજબ ફેરફાર થઇ શકે છે.

સાયકલિંગ અને રનિંગ

રનિંગ ૩૦૦૦ કિમી, સાયકલિંગ ૧૦,૦૦૦ કિમી. ૨૦૧૬માં સાયકલિંગમાં ધબડકો થયો છે, એવો ન થાય તો સારુ.

૧. જાન્યુઆરી: ૨૦૦ બી.આર.એમ.

૨. ફેબ્રુઆરી: ૬૦૦ બી.આર.એમ., હાફ-મેરેથોન (નવી મુંબઈ).

૩. માર્ચ: ૪૦૦ બી.આર.એમ.

૪. એપ્રિલ: ૨૦૦ બી.આર.એમ.

૫. મે: ૩૦૦ બી.આર.એમ.

૬. જૂન: ૧૦૦૦ બી.આર.એમ.

૭. જુલાઇ: ૩૦૦ બી.આર.એમ. ૨૫ કિમી. બોરિવલી નેશનલ પાર્ક એન્ડ્યુરોથોન.

૮. ઓગસ્ટ: ૪૦૦ બી.આર.એમ., મુંબઈ અલ્ટ્રા.

૯. સપ્ટેમ્બર: ૬૦૦ બી.આર.એમ.

૧૦. ઓક્ટોબર: માલનાડ અલ્ટ્રા ૮૦ કિમી અથવા નવેમ્બરમાં બેંગ્લોર અલ્ટ્રા ૧૦૦ કિમી.

૧૧. નવેમ્બર: એક બી.આર.એમ., શક્ય હોય તો એકાદ ફુલ મેરેથોન.

૧૨. ડિસેમ્બર:એક બી.આર.એમ., એક હાફ મેરેથોન (મોટાભાગે નેવી હાફ મેરેથોન).

બસ આટલું જ! 🙂

અપડેટ્સ – ૧૯૭

* આજના અપડેટમાં મહત્વનું એટલું જ છે કે અમે સાયકલની સાફ-સફાઇ કરેલ છે, એટલે આજે ભરબપોરે સાયકલનો ટેસ્ટ કરવામાં આવશે (જેથી અમને બંનેને પૂરતું વિટામીન-ડી મળી રહે). સાફ-સફાઇ પછી યાદ આવ્યું કે હજુ પાછલું ટાયર બદલવાનું (એટલે કે નવું લેવાનું) બાકી છે, પણ આ મહિનાનું બજેટ જોખમાયું હોવાથી તેને ક્રેડિટ કાર્ડ કે પછી આવતા મહિને લેવામાં આવશે (કે પછી આવતા મહિનાની લાંબી મુસાફરી પછી).

* બાકી વેકેશન પડ્યું છે, એટલે સોસાયટીમાં શાંતિ-શાંતિ લાગે છે (પણ બપોરે છોકરાઓનો અવાજનો ત્રાસ વધવાની પૂરી શક્યતા છે).

* ૨૦૧૬ – સાયકલિંગ અને રનિંગ બંનેમાં ત્રાસદાયક રહ્યું છે (સિવાય કે પેલી થોડીક બી.આર.એમ. અને મુંબઈ અલ્ટ્રા વત્તા નેવી હાફ મેરેથોન). આવતા વર્ષે લક્ષ્ય લગભગ બેવડું (બીયર વાળું નહી) રાખીશું 🙂

અને હા, ૨૦૧૭ના લક્ષ્યો વિશે અલગ પોસ્ટ ૩૧ ડિસેમ્બરના રોજ પાક્કી છે.

નવી ઘડિયાળ

પેબલ સ્માર્ટવોચ

આમ તો અમને સ્માર્ટવોચનો આખો ખ્યાલ બહુ ગમતો નથી, પણ શું થાય? પેબલની બીજી આવૃત્તિની રાહ જોવાતી હતીને એવામાં જ સમાચાર આવ્યા કે પેબલ કંપનીને ફિટબિટ નામની બીજી કંપનીએ હસ્તગત કરી લીધી. લો, અમે તો રાહ જોતા હતા, એટલે એમેઝોનમાંથી ફટાફટ ઘડિયાળ લઇ લીધી અને બે દિવસથી તો બહુ જ ગમે છે.

સારી વાત:
૧. લાંબી બેટ્રી. ૭ દિવસ.
૨. સ્ટ્રાવા લાઇવ દેખાય, એટલે દોડતી વખતે મોબલો હાથમાં ન લેવો પડે. સાયકલિંગમાં પણ.
૩. બ્લેક-એન્ડ-વ્હાઇટ ડિસ્પ્લે.
૪. વાઇબ્રેશન વાળું એલાર્મ.
૫. નોટિફિકેન્શ ટાઇમલાઇન.
૬. નો નોનસેન્સ સિસ્ટમ ઇન્ટરફેસ.

ફિટબિટે હજુ ૨૦૧૭-૧૮ સુધી પેબલ ઘડિયાળોને સપોર્ટ (વોરન્ટી નહી) આપવાની જાહેરાત કરી છે, ત્યાં સુધી પેબલ ડેવલોપર્સ ભેગા થઇને વૈકલ્પિક એપસ્ટોર કે એવું કંઇક બનાવવાનું વિચારે છે. સમય મળ્યે તો આપણે પણ હાથ અજમાવીશું.

ત્યાં સુધી, હાથ સલામત તો ઘડિયાળો ઘણી!

કાર્તિકબૉટ

* હવે ખાટલે પડ્યા પડ્યા નવરા એવા મગજમાં શેતાની વિચારો આવે તેના કરતાં કંઇક સારું થાય એ માટે વચ્ચે-વચ્ચે સમય મળ્યે ગુજરાતી વિકિપીડિયા પર એક બૉટ કાર્તિકબૉટ (રોબૉટનું ટૂંકું નામ – બૉટ) ચલાવવામાં આવે છે (એમ તો ક્યારનોય ચાલુ છે, પણ હવે થોડો સ્માર્ટ બનાવવામાં આવેલો છે). બૉટ વડે કંટાળાજનક અને વારંવાર કરવા પડતાં ફેરફારો ઝડપથી કરી શકાય છે. દા.ત. ગુજરાતમાં નવા જિલ્લાઓ અને તાલુકાઓ બન્યા પછી તેનાં ગામોનાં નામ અને વિગતો બદલવી પડે એ જો જાતે કરવા જઇએ તો મહિનાઓ લાગે. કાર્તિકબૉટ વડે આ ફેરફારો (લગભગ ૧૫,૦૦૦ જેટલાં) માત્ર એક અઠવાડિયા જેટલાં સમયમાં કરી દેવાયા છે. હજુ ઘણું કામ બાકી છે, પણ બૉટ હજુ ચાલુ છે. એટલે કે જ્યાં સુધી હું અસ્તિત્વમાં છું અને વિકિપીડિયામાં યોગદાન આપુ છું – ત્યાં સુધી તો!

PS: આ આખું બૉટ ફ્રેમવર્ક પાયથોનમાં લખાયેલું છે અને અહીં તેના વિશે વધુ માહિતી મળી શકે છે.

PS II: મહારાષ્ટ્રમાં પાલઘર નજીક બૉટ નામનું ગામ છે, તેના પાટિયાનો ફોટો આવતી કોઇ રાઇડમાં લેવામાં આવશે 🙂